Hevseroka Giştî ya HDP’ê Pervîn Buldan di hevdîtinên xwe yên Hewlerê de, diyar kir ku li dijî hemû cûreyên şer, êrîş û zilmê yekîtiya kurdan şerte û got: “Ev pêvajo ji bo gelê kurd pir girîng e. Divê demildest yekîtiya kurdan pêk bê û kongreya neteweyî bê lidarxistin.”
NAVENDA NÛÇEYAN – Hevdîtinên şandeya Partiya Demokratik a Gelan (HDP) a ji Hevseroka Giştî ya HDP’ê Perwîn Buldan, parlamenterên HDP’ê Feleknas Uca, Dîlek Ocalan, Îmam Taşçier, endama Meclîsa HDP’ê Zeyneb Boga û Hevserokê KCD’ê Berdan Ozturk pêk tê, li Başûrê Kurdistanê di roja duyemîn de dewam dike. Şandeya HDP’ê li Hewlêrê di saetên serê sibê de Partiya komûnîst a Kurdistanê (Hizbî Şuî) ziyaret kir. Şandeya HDP’ê ji aliyê Sekreterê Giştî yê Hizba Şûî Kawa Mehmût û endamên rêveberiya Hizba Şûî ve hat pêşwazî kirin.
Piştî hevdîtina ji çapemeniyê re girtî, şandeya HDP û Hizba Şûî daxuyaniyek hevpar dan.
Hevseroka Giştî ya HDP’ê Pervîn Buldan di daxuyaniyê de axivî û wiha got: “Ev du rojin hevdîtinên me yên li Hewlêrê berdewam dikin. Di roja yekemîn me serdana Nêçîrvan Barzanî, Mesûd Barzanî, nûnerên partiyên siyasî û rêxistinên civakî kir. Ev hevdîtin bi giştî erênî bûn. Divê êdî demildest yekîtiya Kurdan çêbibe û kongreya neteweyî kom bibe. Di hevdîtinên me de hat gotin ji bo yekîtiya Kurdan gelek dereng maye.”
‘DIVÊ KURD YEKÎTIYA XWE AVA BIKIN’
Buldan, di berdewamiya axaftina xwe de wiha got: “Ji ber zilm, zext û komkujiyên li ser gelê kurd ên di vê demê de, divê em êdî yekîtiya xwe ava bikin. Divê ew siyaseta şer a bi Kerkûkê destpê kir, bi Efrînê dewam dike û wisan diyare dê berdewam bike, divê êdî bi dawî bibin. Em li her derê aştî û azadiyê diparêzin. Em ê ji vêya şûn ve jî xizmetê ji aştî û azadiyê re bikin. Li dijî hewldanên şer û zilmê yên dixwazin destkeftiyên Kurdan têk bibin jî divê em yekîtiya xwe ava bikin. Di vê demê de yekîtiya Kurdan gelek girîng e. Em behsa tifaqê dikin, ev tifaq ji bo pêşeroj û azadiya Kurdan gelekî girînge. Armanca van hevdîtinên me tifaqe. Me di hevdîtina xwe ya bi Hizba Şûî re jî îşaret bi van mijaran kir û me got, divê diyalog berdewam bikin.”
Buldan, li ser pirsa wê li Tirkiyeyê pêvajoyeke nû destpê bike jî wiha axivî: “Ez nizanim wê pêvajoyeke nû li Tirkiyê destpê bike an na, lê pêwîstî bi pêvajoyeke nû heye. Divê li Tirkiyeyê hûzûr çêbibe. Ji ber pêvajoya çareseriyê hat sekinandin û têkiliya bi Ocalan re hat qût kirin pêvajo ket qonaxeke nû. Diviyabû hevdîtin berdewam bikin. Bi qûtkirina hevdîtinan re tecrîda li ser Ocalan jî giran bû. Bi tecrîda Ocalan re bandoreke nebaş li ser Tirkiyeyê û Rojhilata Navîn kir. Divê tecrîd were rakirin û pêvajoyeke nû dest pê bike. Ne tenê Tirkiye pêwîstiya Rojhilata Navîn jî bi aşitiyê heye. Divê derfetên diyalogê zêdetir werin avakirin. Emê van hevdîtinên xwe bi partiyên Rojava, Rojhilat û Bakur re jî berdewam bikin.”
‘TÊKOŞÎNA ME YEKE’
Piştî Buldan, Sekreterê Giştî yê Hizba Şuî ya Kurdistanê Kawa Mehmûd jî axivî û wiha got: “Li Bakurê Kurdistanê siyasetek li dijî Kurdan tê meşandin. Bi hezaran endam û 9 parlamenterên HDP’ê hatin girtin. Ji bo vê divê em hemû piştgiriya partiyên Kurd yên li Bakurê Kurdistanê bikin û raya giştî ya navneteweyî jî agahdar bikin. Têkoşîna me ya li çar parçeyên Kurdistanê yeke.”
Di dawiya dawiya daxuyaniyê de parlamenterê HDP’ê Îmam Taşçier jî axivî û wiha bilêv kir: “Pêwîste aliyên Kurdistanî ji bo nakokiyên heyî nîqaş bikin û nakokiyên xwe çareser bikin. Yekdengî ji bo gelê Kurd gelek girînge, em dixwazin yekîtiya neteweyî bi dest bixin. Armanca me ya serdana parçeyên Kurdistanê eve.”
