Koordînasyona Ciwanên Kurd biryara çûyîna Efrînê girt.
RÊMILAN – Koordînasyona Ciwanên Kurd li ser mijara Efrînê civîna xwe ya salane lidarxist. Koordînasyon Encamnameya Civîna Berfireh a salane bi raya giştî û çapemeniyê re parve kir. Koordînasyon bal kişand ser berxwedana Efrînê û biryara çûyîna Efrînê girt.
Encamname wiha ye:
“Bi hêz û moralekê mezin em wekî Kordînasyona Ciwanên Kurd li Rojavayê Kurdistanê encama civîna xwe ya berfireh a salane ji raya giştî û ragihandinê re radigihînin. Bi amadebûna nêzikî 100 delegeyên 15 partî û 5 rêxistinên ciwanan û her wiha nûnerên 4 partiyên derveyî kordînasyonê, civîna me îro bi awayekî serkeftî bi rê ve çû. Di serî de û beriya her tiştî em carekê din bejna xwe beramberî tevahî şehîdên şoreşê ditewînin û di şaxsê şehîdên berxwedana serdemê de em hemu şehîdên Kurdistanê bi rêzdarî bibîrtînin. Her wiha em spas dikin hemu mêvanên ku beşdarî civînê bûn, Tev-Dem, Rêveberiya Xweser, Desteya Ciwanan a Kantona Cizîrê û Saziya Malbatên Şehîdan. Her wiha em radigihînin ku di encama vê civîna berfireh de 3 partiyên nû tevlî kordînasyonê bûn: Partiya Zehmetkêşên Kurdistan, Yekitiya Kedkarên Kurdistan û Partiya Yekitiya Niştimaniya Azad. Bi vî awayî hejmara endamên Kordînasyona Ciwanên Kurd li Rojavayê Kurdistanê bû 18 partî û 5 rêxistinên ciwanan. Civîna me a berfireh bi rastî di demekî dîrokî de pêkhat. Bi taybetî berxwedana serdemê, berxwedana gelê me li Efrînê bi pêşengtiya şervanên YPG û YPJ’ê di vê demê de tevahî gelê Kurdistanê û gelên bindest ên cîhanê pê serbilind in. Di civîna me de nirxandinek hat kirin, em çiqasî jî li ser biaxivin, em nikarin heqê vê berxwedanê bidin, di encam de ev dem dema kar, xebat û pratîkê ye. Yekîtî bi xwe ne mijarekê siyasî û gotinê ye, yekitiya netewî li ser erdê pêktê û tê pêkanîn. Heger îro ciwanên ji çar parçeyên Kurdistanê û derveyî welat mil bi mil li dijî dagirkeriyê şer dikin, ev yek tê wateya yekitiya netewî ye. Heger îro li Reqa û carekê din li Efrînê xwîna şehîdan xwîna kurda, ereba û suryana be, ev tê wateya biratiya gelan. Di vê çarçoveyê de civîna me bi dirûşmeya “Bi rihê berxwedana Efrînê ve, ber bi yekitiya netewî ve” hate lidarxistin.
Li Efrînê îro em bi êrîşên herî hovane û dijwar ji aliye dagirkerî û faşîzma Tirkiye re rû bi rû ne. Li hemberî van êrîşên hovane bes yek çareserî heye û ev jî yekitiya netewî ye. Bi yekitiya netewî û seferberîya ciwanên çar parçeyên Kurdistanê û derveyî welat wê serkeftina şoreşa me mîsoger bibe. Di encama nîqaşên siyasî û rêxistinî ku hatine kirin îradeya civînê ku ji tevahî delegeyên 16 partî û 5 rêxistinên ciwanan pêkhat gihîşt biryardariyekî nû li gorî rihê demê. Biryarên ku hatine girtin ev in:
1. Berxwedana serdemê ya Efrînê rûmeta me hemuyan e. Şehîdên berxwedana Efrînê rihê serdemê ne û li wan xwedî derketin erka me ya herî sereke ye.
2. Ji bo helwesta rast beramberî berxwedana ku tê meşandin were dayîn em ê di 11’ê meha Adarê de wekî Kordînasyona Ciwanên Kurd berê xwe bidine Efrînê. 3. Dagirkeriya dewleta Tirk tehdît li ser tevahî Rojava û çar perçeyên Kurdistanê ye. Li hemberî vê xeteriyê divê ciwanên Kurdistanê xwe rêxistin bikin Girêdayî vê biryarê: • 1. Em ê ji nava hemu partî û rêxistinên endam yekîneyên parastinê avabikin. • 2. Ev yekîneyên parastinê perwerdeyên leşkerî bibînin. •
3. Em ê wekî ciwanên kurd li Rojava li gund û bajaran de beşdarî hemu amadekariyên parastinê bibin û di vê çarçoveyê de em ê çêkirina mevziyan, tunelan û sinaqan esas bigirin, pêkbînin. • Broşur derbare zanistiya parastine were amadekirin
4. Ji bo ku em îradeya ciwanên kurd bidine xuyakirin, em ê mektub ji saziyên navnetewî yên cur bi cur bi navê Kordînasyona Ciwanên Kurd li Rojavayê Kurdistanê re bişînin.
5. Komîte ku berê hatibûn avakirin carekê din werine rêxistinkirin û dest bi kar û xebatê bikin. 6. Bi berdewamî û bi îsrar em ê li ser 17 biyarên Konferansa yekemîn a Ciwanên Kurd li Rojavayê Kurdistanê ku di 31’ê meha Adarê 2017’an de pêkhat bimeşin û kar û xebat bikin.
Em di vê xalê de îqna ne û bi bawer in, heger em li ser biryarên Konferansa me ya beriya salekî bimeşin, kar û xebat bikin, heger em van biryarên xwe yên nû di gotinê de nehêlin, lê pêkbînin, ewçax em ê serbikevin û ti hêz, ti kes jî nikare li pêşiya me bigire. Em li ser van esasan silavên xwe yên germ ji gelê Efrînê û şervanên azadiyê di cepheyên şer de dişînin û berxwedana wan hezar caran pîroz dikin.”
