Fermandariya Yekîneyên Parastina Gel a Herêma Efrînê bi daxuyaniyekê berxwedana Efrînê vegot.
NÛÇE CIWAN- NAVENDA NÛÇEYAN- Daxuyaniya YPG’ê li ser malpera xwe ya fermî belav kir bi vî rengî bû:
Artêşa Tirk a dagirker di dîroka 20.01.2018an de, bi balafirên şer êrîşî kantona Efrîn, navçe û gundewarên wê kir.
Artêşa Tirk a dagirker, di bombebarana ku ji saet 16:00 heya niha berdewam dike de di serî de sîvîlên herêmê, çeperên şervanên YPG, YPJ û Hêzên Şoreşger jî di nav de herî kêm 100 xalan hedef girt. Êrîşa ku bi 72 balafiran hat pêkanîn de navçe û gundên Efrînê ku piranî niştecîhên sîvîl tê de ne hedef hate girtin. Herwiha navenda bajarê Efrînê, kampa penaberan a Rûbar û saziyên sîvîl jî hatin hedef girtin. Di êrîşên ku heya van kêliyan didome de herî kêm 13 sîvîl brîndar bûn û 3 ji wan rewşa wan giran e. Di encama êrîşan de 6 sîvîl şehîd bûn. Herwiha 2 şervanên YPJê û şervaneke YPGê jî di van êrîşan de şehîd bûne. Herwiha bi êrîşan re hemwext leşkerên artêşa Tirk a dagirker û çeteyên wî li gundên Kurdo û Baliya yên girêdayî navçeya Bilbilê xwestin sînor derbas bikin. Li ser bersivdana şervanên YPG û YPJê leşkerên artêşa dagirker neçar man ku paş de birevin.
Artêşa Tirk a dagirker û çeteyên girêdayî wî yên ku dixwazin xaka Efrînê dagir bikin, piştî gelek hewldanên wan yên binpêkirina sînor hate ji alî şervanên YPG, YPJ û Hêzên Şoreşger ve vala hate derxistin bi êrîşên hewayî hewl didin ku sîvîlên herêmê bitirsînin; niştecîhên Efrînê bidin revandin da ku bikaribin ji dagirkeriya xwe re rê vekin. Êrîşkirina artêşa Tirk a dagirker ya raste rast li ser sîvîlên herêmê û li hemû navçeyan neçariya wan ya li dijî hêzên YPG û YPJê careke din diyar dike. Fêm dibe ku artêşa Tirk a dagirker dixwaze bi bomberankirina sîvîlan herêmê vala bike û sîvîlan bide revandin, bi vî awayî çeteyên xwe bajo ser Kantona Efrînê.
Em baş dizanin ku bêyî destûra hêzên navneteweyî û di serî de Rûsya, ku leşkerên xwe jî di Efrînê de digire, ne mimkun e ku ev êrîş pêk werin. Ji ber vê sedemê em ji van êrîşan bi qasî dewleta Tirk a dagirker, dewleta Rûsya yê jî berpirs dibînin û dibêjin ji komkujiya ku pêk were ew jî sûcdar in.
Em weke Fermandariya Yekîneyên Parastina Gel ya Efrînê ji gelê xwe yê welatparêz, hemû pêkhateyên Bakûrê Sûriyê û gelê Kantona Efrînê re dibêjin ku; em bi dek û dolabên faşîzma Tirk û lîstokên wê yên faşîzan binnakevin! Heya vê kêliyê tê dîtin ku bi tu awayî gelê Efrînê cîh û warên xwe bernade û weke ku dijmin plan dikir ji Efrînê dernakeve. Em jî li ser vê bingehê û di çarçoveya amadekariya ku demeke dirêj e tê kirin de, biryardariya xwe ya parastina xaka Efrînê û gelê Efrînê careke din diyar dikin! Yekîneyên Parastina Gel û Yekîneyên Parastina Jin di bin her şert û mercî de di çeperên xwe de parastina welatê xwe li dijî faşîzma Tirk wê her tim bikin. Em bang li gelê xwe yê welatparêz û mirovahiya pêşverû dikin ku bi ruhê seferberiyê berê xwe bidin çeperên parastina Kantona Efrînê.
