Li Wargeha Mexmûrê rêxistina xwendekarên wargehê YXA duh 2’emîn konferansa xwe bi dirûşma ‘Serî Hilde, Şer Bike, Rêbertî Azad Bike’ li dar xist.
MAXMUR – NUÇE CIWAN
Yekîtiya Xwendekarên Azad (YXA) duh li Wargeha Şehîd Rûstem Cûdî (Mexmûr) bi beşdariya 423 delegeyên ji xwendekarên amadeyî, peymangeh û zanîngehê her wisa mêvan û nûnerên saziyan pêk dihat, li Salona Konferansê ya wargehê 2. Konferansa xwe di bin dirûşma ‘Serî Hilde, Şer Bike, Rêbertî Azad Bike’ li dar xist.
Piştî rêzgirtin, hilbijartina dîwana konferansê, axaftina vekirinê, perspektîfên Rêberê PKK’ê Abdullah Ocalan, xwendina rapora xebatên du salan ên YXA’yê her wiha peyamên saziyan, rûnîştina piştî nîvro bi nîqaş û nirxandinên siyasî û rêxistinî berdewam kir. Mijara sereke ya nirxandinên siyasî rewşa Ocalan ya di bin tecrîda girankirî û çawaniya têkoşîna li dijî zîhniyeta tecrîdkar a dewleta Tirk, hikûmeta AKP’ê û dewletên hevkarên wê bû. Her wisa mijarên weke pêngava ‘Serî Hilde’, şer û têkoşîna li her çar parçeyên Kurdistanê û pêşketinên dawiyê yên Rojhilata Navîn û cîhanê bû.
Piştî rojeva siyasî û rêxistinî rêvebernameya û biryarên YXA’yê hatin xwendin û di dengê çêkera konferansê re hatin derbaskirin.
Axaftina girtinê ya 2. Konferansa Yekîtiya Xwendekarên Azad (YXA) ji aliyê endamê Koordînasyona Meclîsa Gel a Demokratîk a Wargeha Mexmûrê Nadîr Garzan ve hate kirin. Garzan di axaftina xwe de konferans li Rêberê PKK’ê Abdullah Ocalan, şervanên azadiyê, berxwedêrên siyasî yên zindanan, li tevayî gelê Kurd û li ciwanên Wargeha Mexmûrê pîroz kir. Her wiha Garzan di naveroka axaftina xwe de bal kişand ser rewşa tecrîda girankirî ya li ser Ocalan û da zanîn ku heta kesek ji gelê Kurd û ciwanên Kurd ma be ew ê bi şev û roj têkoşîna ji bo azadiya cesteyî ya Ocalan têbikoşîn û wê serkeftina ya gelê Kurd û Tevgera Azadiyê be. Garzan di dawiya axaftina xwe de hêviyên serkeftinê ji bo xwendekarên wargehê xwest û da zanîn ku têkoşîna azadiyê weke Ocalan dibêje ‘Me bi ciwantî dest pê kir û em ê bi ciwantî bi ser bikevin’ her roja hîn zêdetir û xurtir dibe û di arenaya siyasî û dîplomasî ya cîhan û Rojhilata Navîn de bi hêztir dibe.
Piştî axaftina girtinê, bi dirûşmên ‘Bijî Serok Apo’, ‘Şehîd Namirin’, ‘Bê Serok Jiyan Nabe’, ‘Ji bo Azadiya Rêbertî û jiyanek bi rûmet Serî Hilde’ û ‘Bimre Zîhniyeta Tecrîdkar û Faşîst’ 2. Konferansa Yekîtiya Xwendekarên Azad (YXA) bi coş û kelecanek mezin bi dawî bû.
Piştî bidawîbûna 2. Konferansa YXA’ê têkildarî rewşa tecrîda girankirî ya li ser Rêberê PKK’ê Abdullah Ocalan û pêngava ‘Serî Hilde’ ji aliyê delegasyona konferansê ve daxuyaniyek ya çapemeniyê hate dayîn. Daxuyaniya çapemeniyê ji aliyê Endamê Rêveberiya Meclîsa TCM’ê û Rêveberê YXA’yê Mahsûn Sezgîn ve hate dayîn. Di daxuyaniyê de hate gotin ku ew weke xwendekar û ciwanên Mexmûrê ji bilî jiyanek bi Ocalan re her wisa ji bilî azadiya cesteyî ya Ocalan tu jiyanek din nas nakin û lewra wê ji bo gihiştina armanca xwe wê heta azadiyê bi şev û roj di nava çalakî, têkoşîn û berxwedanê de bin.
Her wisa di daxuyaniya çapemeniyê de bal hat kişandin ser pêngava ‘Serî Hilde’ ya ji aliyê Komalên Ciwan ve hatiye destpêkirin û hate gotin ku ew weke xwendekar û ciwanên Wargeha Şehîd Rûstem Cûdî (Mexmûr) heta dawiyê piştgiriyê didin vê pêngavê û ew ê di çarçoveya vê pêngavê de çalakiyên curbicur li dar bixin.
Piştî daxuyaniyê dirûşmên ‘Bijî Serok Apo’, ‘Bê Serok Jiyan Nabe’ hatin qêrîn.
