STENBOL – Meclisa Jinên Ciwan a Partiya Wekhevî û Demokrasiyê ya Gelan (Partiya DEM) li ber avahiya parêzgeha Stenbolê ya Partiya DEM kom bûn da ku bi boneya 1’ê Îlonê, Roja Aştiyê ya Cîhanê, li ber Mala Hevgirtinê ya Dolapdere Güneş a li Taksîmê pîrozbahiyek bi dirûşmeya “Em li ser jiyana sosyalîst israr dikin, bi rêbertiya azad xwe birêxistin dikin” lidar bixin. Polîsan rê li ber meşa jinan girt. Piştre jinan li ber avahiya parêzgehê daxuyaniyek dan. Pankarta li ser wê nivîsandibû, “Navê aştiya mayînde jinên azad, civaka demokratîk e.” Jinan dirûşmeyên wekî “Bijî Rêber Apo”, “Jin jiyan azadî”, “Bijî berxwedane ciwane”, û “Na ji şer re, aştî niha” qîr kirin.
Ayşegül Sakallı, endama Lijneya Jinên Ciwan a Partiya DEM, daxuyanî da û got, “Di 1’ê Îlonê de behsa aştiyê kirin sûc e, û cejna aştiyê qedexe ye. Ji ber ku ev pergal bi zorê bi şer, qedexe û baviksalariyê tê domandin. Lê em jinên ciwan hem azadî û hem jî aştiyê dipejirînin. Em natirsin, em bêdeng namînin. Em ê aştiyê ava bikin û em ê jiyanê biguherînin.”
‘AŞTÎ DAXWAZ NÎNE, MAF E’
Ayşegül Sakallı diyar kir ku dengê aştiyê li Tirkiyeyê tê bêdengkirin û got, “Dewletek ku şahiyên aştiyê qedexe dike, israr dike ku bi zimanê şer biaxive. Ji ber ku aştî dê sultanetiya wan bihejîne. Ji ber ku aştî xwişk û biratiya gelan pêş dixe, lê ew bi veguherandina gelan bo dijminan geş dibin. Yên ku ji aştiyê ditirsin, dê heta navê aştiyê jî sansûr bikin da ku pergala xwe ya rizî biparêzin. Lê bila ji bîr nekin ku ew nikarin bi qedexekirina wê aştiyê hilweşînin! Aştî ne daxwaz e, ew mafek e.”
“EM Ê DI 31’Ê TEBAXÊ DE LI KADIKÖYÊ BIN”
Hevseroka Parêzgehê ya Partiya DEMê Arife Çınar wiha domand: “Em ê îro li vir meşekê li dar bixin, bi pêşengiya jinên ciwan. Em ê di cihekî ku em dikarin jê re bibêjin 300 metre bimeşin. Ciwanên me piştî hewldanên dijwar li wir şahiyek amade kiribûn, û li şûna ku wan biparêzin, polîsan rê li ber wan girt. Ev astengiyek li pêşiya rêya aştiyê ye. Em vê astengiyê li tu derê nas nakin, û em ê dev ji dayîna daxuyaniyên çapemeniyê bernedin. Dema ku xweza tê talankirin, dema ku jin têne kuştin em evqas polîs nabînin . Lê ew hewl didin ku rê li ber jiyana wekhev a gel bigirin. Em ê wekî jin û gel têkoşîna xwe bidomînin da ku aştî li vî welatî geş bibe. Em ê di 31’ê Tebaxê de saet di 14:00’an de li mîtînga Kadıköyê bin. Em li benda we hemûyan in.”
