ŞENGAL- Komxebata Ciwanên Şengalê bi encamnameyekê dawî bû, di encamnameyê de hate gotin; “Divê ciwan li hemberî hişmendiya dewletê hişyar bin, xwe perwerde bikin û xwe bi hişmendiya demokratîk û azadiyê xurt bikin.”
Komxebata ‘Dewlet, desthilatdarî û demokrasî’ ku ji aliyê Yekîtiya Ciwanên Êzîdxanê û Jin ên Ciwan ên Şengalê ve li navenda Şengalê hate lidarxistin û 60 delege beşdar bûn, bi encamnameyekê bi dawî bû.
Li gorî vê yekê, di komxebatê de zextên pergala desthilatdariyê yên li ser civaka Êzidî û Şengalê hatin nirxandin û têkoşîna li hemberî vê pergalê bi berfirehî hate nîqaşkirin.
Di vê çarçoveyê de fikrê Neteweya Demokratîk weke rêya çareseriyê hate destnîşankirin.
Di encamnameyê de hate ragihandin ku divê ciwan li hemberî hişmendiya dewletê hişyar bin, xwe perwerde bikin û xwe bi hişmendiya demokratîk û azadiyê xurt bikin.
Li gorî encamnameyê, di komxebatê de 9 xalên girîng ji bo têkoşîna dema pêş hate destnîşankirin.
Ev 9 xal jî bi vî rengî hatin diyarkirin:
* Têkoşîna li dijî dewlet û desthilatdariyê li Şengalê divê bi rengekî radîkal were meşandin.
* Divê broşurên li ser derbaskirina desthilatdariyê werin amadekirin û di hemû komînan de werin xwendin da ku civak li ser vê bingehê perwerde bibe.
* Ji bo zêdekirina hişmendiya civakê, divê li ser feraseta dewlet û desthilatdariyê semîner û komxebat werin lidarxistin.
* Weke Tevgera Ciwanên Şengalê, divê girîngî bide ser xebatên perwerdehiyê da ku zihniyeta desthilatdariyê derbas bike.
* Divê ciwan rastiya dewlet û desthilatdariyê di aliyê dîrokî de nas bikin û têkoşîneke xurt bimeşînin.
* Ji bo derbaskirina zihniyeta dewletê, divê giranî li ser pergala Neteweya Demokratîk were danîn.
* Pêwîst e têkoşîn di nav malbatan, dibistanan û saziyên civakî de jî were meşandin.
* Her ciwanek divê çanda demokratîk fêr bibe û girîngî bide xebatên perwerdehiyê.
* Ji bo geşkirina çanda komunal û demokratîk, divê her ciwanek xwe di kesayetiya Rêber Abdullah Ocalan de kûr bike.
Ciwanên Şengalê banga tevlêbûna van xebatan li hemû civakê, bi taybetî li jinên ciwan û ciwanên Iraqê kirin.
Di dawiya encamnameyê de hate gotin, “Em paşeroja vî welatî ne û em ê xwe bi demokrasiyê û azadiyê re birêxistin bikin.”
Komxebat bi dirûşma ‘Bê Serok jiyan nabe’ bi dawî bû.
