NAVENDA NÛÇEYAN – Endamê Rêvebereya Komelgeha Ciwanên KurdîstanÊ (KCR) Helbest Remizdar Qendîl ji ajansa me re li ser Xebat Emînî, Hemîd Muradî û Çiyako Yusufi Nejad ku di dema hewl didan agirê ku di 14’ê Tîrmehê de li Çiyayê Aviya li Sine, Rojhilatê Kurdistanê derketibû vemirînin, şehîd bûn, axivî.
Endamê KCR rêzgirtina xwe ji bo şehîdan û hemû şehîdên jîngehê anî ziman û got, “Sê dilên paqij rê nîşanî me dan, îspat kirin ku parastina jîngehê û welat ne ji hev cuda ne.”
Qendîl tekez kir ku her darek li Kurdistanê şahidiya têkoşîna gelê Kurd a ji bo azadiyê dike:
“Li Kurdistanê her darek ji daristanan, xiwîna şehîd li ber hatiye rijandin. Her sê şehîd, hersê ciwanên me jî, ku bi fedakarî jibo parastina van nirxan canê xwe dan, di zanebûna vê rastiyê de bûn.”
Qendîl bi bîr xist ku hersê şehîd jî ciwan bûn û got, “Ciwan ew kes in ku dikarin rêya wan bi awayê herî baş bişopînin. Wekî ciwanên Rojhilatê Kurdistan û Îranê, erkê me ye ku em vê têkoşînê hembêz bikin û xeta wan xwedî derkevin.”
Qendîl diyar kir ku ciwan dikarin bi rêya xweperwerdekirinê hêz û îradeyê ava bikin û got, “Hersê şehîd ji rastiya Kurdistanê û welatparêziyê haydar bûn. Wan ev hişmendî di kesayetiya xwe de ava kirin. Ger em bixwazin rêya wan bişopînin, divê em nirxên welatparêziyê di nav xwe de ava bikin. Ev bi rêya xweperwerdekirinê mimkun e.”
Qendîl diyar kir ku bi xweperwerdekirinê, ciwan dê hêza şerkirina li dijî polîtîkayên qirkirinê yên dijmin bi dest bixin:
“Divê em li dijî polîtîkayên înkar û tunekirinê yên dijmin şer bikin. Divê em li dijî kesên ku van polîtîkayan ji bo berjewendiyên xwe piştgirî dikin bisekinin. Wekî jin û xortên ciwan, divê em li dijî wan bisekinin û helwestek bigirin.”
Qendîl, destnîşan kir ku raya giştî di merasîmên cenaze de rêya şehîdan hembêz kir û got, “Em, wekî ciwan û jinên ciwan, divê vê têkoşînê bi rê ve bibin. Divê em berxwedana xwe tenê bi çend rojan sînordar nekin; divê em agirê berxwedanê li dijî hişmendiya qirker bi berdewamî zindî bihêlin.”
Di dawiyê de, wê axaftina xwe bi gotina “Ger em îro vê rêyê hembêz bikin, ciwanên din jî wê di pêşerojê de vê têkoşînê bidomînin. Armanca me ew e ku em xewnên şehîdan pêk bînin û ji bo avakirina civakek azad şer bikin.”
