HESEKÊ– Ciwanên Bakur û Rojhilatê Sûriyeyê li hember êrîşên ku hikûmeta Şamê di du rojên dawî de li bajarê Siwêdayê li dijî gelê Durzî pêk anîn, nerazîbûn nîşan dan. Tevgera Ciwanên Şoreşger ên Hesekê û Yekîtiya Jinên Ciwan daxuyaniyek çapemeniyê dan û êrîş şermezar kirin û hevgirtina xwe bi gelê Durzî re nîşan dan.
Rêxistinên ciwanan daxuyaniyek weşandin û gotin:
“Em, Tevgera Ciwanên Şoreşger ên Hesekê û Yekîtiya Jinên Ciwan, êrîşên li dijî gelê Durzî şermezar dikin û dixwazin hevgirtina xwe bi wan re tekez bikin. Hemû gelên li Bakur û Rojhilatê Sûriyeyê dijîn yek reng, yek deng û yek dest in. Em ê li dijî her êrîşek li ser her gelî bisekinin. Em ê li dijî wê şer bikin û helwesta xwe nîşan bidin.”
Daxuyaniyê her wiha dijberiya xwe ya li dijî modela Sûriyeya navendî tekez kir û ev peyam da:
“Ne hikûmeta Şamê û ne jî ti dewletek din nikare di navbera gel de fitne û fesadî çêbike. Em helwesta xwe ya leşkerî û siyasî li dijî vê yekê radigihînin. Em Sûriyeyeke navendî naxwazin. Em Sûriyeyeke ku hemû reng, deng û ol bikaribin xwe bi azadî îfade bikin dixwazin. Ger pêwîst be, em, gelê vir, bi taybetî ciwan, amade ne kuji bo vê yekê şer bikin.”
Daxuyanî wiha domand: “Em ji komkujiyên li dijî jin, zarok û mirovan re dibêjin na!” Daxuyaniya çapemeniyê bi dirûşmeyên “Bijî berxwedana Durziyan” bi dawî bû.
