NAVENDA NÛÇEYAN- Bi dehan ciwanên sosyalîst li Endonezyayê ji bo pîrozkirina hejmara 17’emîn a Kovara Enternasyonalîst Lêgerin hatin cem hev. Ciwanên ku di çalakiyê de hatin cem hev, pêşî li ser wate û girîngiya rojê gotarek vekirinê pêşkêş kirin û dû re gelek gotarên di hejmara 17’emîn a kovarê de bi hev re xwendin.
Armanca sereke ya ciwanên ku di heman demê de komîteya Endonezyayî ya kovara Lêgerin pêk tînin, ew e ku paradîgmaya Netewa Demokratîk û Sosyalîzma Demokratîk a ku ji hêla Rêber APO ve hatî pêşxistin li her derê belav bikin û li ser vê bingehê enternasyonalîzmek ciwanan a nû pêş bixin.
Di axaftina vekirinê de wiha hat gotin:
“Wekî komîteya Kovara Navneteweyî ya Endonezyayî Lêgerîn, em dixwazin ragihînin ku rojeva îro destpêkirina yekem tûra navneteweyî ya Lêgerînê ye. Ji bo pîrozkirina weşandina 17’emîn Kovara me ya Enternasyonalîst, dê li çaraliyê cîhanê çalakiyên cûrbecûr werin lidarxistin! Ji bo niha, ji 7ê Hezîranê heta 28ê Hezîranê li Brezîlya, Almanya, Endonezya, Îtalya, Oksîtanya û Brîtanyayê çalakî hatine plankirin. Armanca me wekî kovara navneteweyî ya Lêgerînê zelal e: belavkirina paradîgmaya Sosyalîzma Demokratîk a ku ji hêla Abdullah Öcalan ve hatî pêşxistin li derveyî welêt û pêşxistina enternasyonalîzmek ciwanan a nû.”
Di çarçoveya heyî de, hat gotin ku pêvajoya avakirina Enternasyonalîzm û sosyalîzma demokratîk li Tirkiye û Kurdistanê bi baldarî tê şopandin. Axaftin wiha berdewam kir “Her peyama ku Öcalan li girtîgeha Îmraliyê daye, îro hêvî û perspektîfê tîne mirovên li çaraliyê cîhanê û ji salên 70’î vir ve ev hîn bêtir belav bûye. Pêvajoya ku niha berdewam dike encama têkoşînek bêhempa ye.”
Di axaftinê de bang li hemû ciwanên cîhanê hat kirin ku beşdarî Roja Çalakiyê ya Cîhanî ya 30’ê Hezîranê bibin da ku azadiya fîzîkî ya Rêber APO bi dest bixin.
Axaftin bi van gotinan bi dawî bû: “Ji Papua Rojava heta Kurdistan, Filistîn, Belûcistan û Sûdanê, em ê şerê emperyalîst bi dawî bikin û jiyanek azad li ser bingeha xwîşk û biratiyê ava bikin!
Bijî enternasyonalîzma gelan!
Bijî Rêber APO!”
