KOBANÊ- Endamê Tevgera Ciwanên Şoreşger ên Kobanê Mihamed Mihamed ê ku di çalakiya nobedê ya li dijî êrîşên dewleta Tirk a dagirker a 26’ê Çile li Tişrînê birîndar bû, ji ajansa me re axivî.
Mihamed di destpêka axaftina xwe de komploya navneteweyî ya 15’ê Sibatê şermezar kir û diyar kir ku komplo ne tenê li dijî gelê Kurd li dijî hemû gelan hatiye kirin. Mihamed da zanîn ku êrîşên li ser Tişrînê û bi giştî gelên Bakur û Rojhilatê Sûriyê berdewama komployê ye û da zanîn ku divê her kes bi ruhê “Tu nikarî roja me tarî bike” û bi rihê berxwedana Tişrînê, li dijî komployê raweste û ji bo azadiya Rêber APO têbikoşe.
Mihamed di axaftina xwe de meşa dirêj a ji bo azadiya Rêber APO ku ji aliyê ciwanên Kurd û enternasyonalîst ve hatiye destpêkirin jî silav kir û bang li ciwanên li Ewropayê dijîn kir ku tevlî meşa dirêj bibin.
Mihamed Mihamed, anî ziman ku 15’ê Sibatê ji bo gelê Kurd û hemû gelan rojeke reş e û got, “Di vê mehê de gelek çalakî tên lidarxistin. Ji ber ku di 15’ê Sibatê de Rêber APO di destê dewletên dagirker, faşîst de dîl hat girtin û radestî dewleta Tirk hat kirin. Rêber APO di nava 26 salan de berxwedaneke dîrokî nîşan da. Ji bo têkoşîna ku Rêber APO 27 sal in li Girava Îmraliyê dide em bejna xwe ditewininin. Em weke ciwan û gel xwe deyndarê Rêber APO dibînin.
Mihamed Mihamed da zanîn ku Komploya 15’ê Sibatê ne tenê li dijî gelê Kurd, di şexsê Rêber APO de li dijî hemû gelên azadîxwaz hate kirin û got, “Li gorî vê yekê em dîsa di meha Sibatê de ne. Ev 2 meh in li Bendava Tişrînê şerekî mezin tê meşandin. Berxwedana dewleta Tirk a dagirker û çeteyên wê êrîşa li ser gelê me ye. Di Bendava Tişrînê de berxwedaneke ku ruhê berxwedanê yê sala 2014’an tîne bîra mirov, ji 7’an heta 70’î her kes, ciwan û zarok bi ruhê şerê gel ê Şoreşgerî berê xwe didin bendava Tişrînê.”
Mihamed, da zanîn ku wî hebûna gel, ciwan û zarokan di nava QSD’ê de dibîne û got, “Gel û ciwan bi şervanên xwe re şev û rojê xwe kirine yek, Pariyek nanê xwe kirine yek. Jiyana xwe bi şervanên xwe re dikin yek. Gelê me şervanan weke hebûna xwe dibîne, şerwan jî gelê me hebûna xwe dibîne û li hemberî dewleta Tirk şerekî mezin didin meşandin.”
Mihamed, diyar kir ku êrîşên dewleta Tirk a dagirker ên li dijî gelan berdewamiya komployê ye û got, “Dixwazin fikrên azad û demokratîk careke din tine bikin. Dixwazin vîna gelê Kurd tine bikin, lê gelê me ji wan derbas bû. Ciwan, zarok, gel bi dirûşma “Em ji mirinê mezintir in.” ber bi Tişrînê ve diçin. Polîtîkayên ku dewleta Tirk a dagirker dixwaze li dijî gel û axê bimeşîne,ji gel re ji mirinê girantir tê. Tevî bomberdûmanên rojane, tevî komkujiyan, tevî şehîdan, tevî ewqas birindaran jî gel bi hêviya serkeftinê berê xwe dide bendava Tişrînê. Bi stran û govendên xwe yên şoreşgerî berxwedanê didomîne û ew tu carî gav paş de navêje.
Mihamed, da zanîn ku di pêvajoya ku tê re derbas dibe de gel ji bilî serketinê tiştekî din qebûl nake û got, “Gelê me di vê berxwedanê de berdêlên mezin da. Di berxwedana heta niha de 24 kes şehîd bûne û nêzî 200 kes jî birîndar bûne. Ez jî yek ji wan birîndaran im. Di 26’ê Çile de ez birîndar bûm. Dema me govend gerand em bûn hedef.”
Mihamed di axaftina xwe de meşa dirêj a ku ciwanên Kurd û ciwanên enternasyonalîst di çarçoveya pêngava azadiya Rêber APO û çareseriya pirsgirêka Kurd de dane destpêkirin jî silav kir û got, “Em niha di pêvajoyek hestiyar re derbas dibin. Pêwîste her ciwan û jin li gorî vê pêvajoyê tevbigerin. Pêwîste her kes xwe berpirsyar bibîne û tevlî vê meşê bibe. Û xewnên 15’ê Sibatê yên dewleta Tirk a dagirker pûç bike. Çawa ku li gelek deverên Kurdistanê û Ewropayê bi dirûşma “Tu Nikarî Rojê Me Tarî Bikî” li dijî komployê çalakî li dar xistin û bi ruhê fedaî li ber xwe dan em jî bi vê rihê û bi rihê berxwedaniya Tişrînê tekoşîn bikin. Bi giştî cîhanê re em bêjin Em xwedî Serok in, fikirin, xwedî îradane û kes nikare îradeya me bişkîne.”
