NAVENDA NUÇEYAN- Bi wesîleya yekemîn salvegera şehadeta Sorxwîn Rojhilat û Azadî Dêrik ên 11’ê Sibata 2024’an di êrîşeke dewleta Tirk a dagirker a li hember Federasyona Gaziyên Bakur û Rojhilatê Sûriyeyê de şehîd bûn, hevalê wan ê têkoşînê Mazlûm Yildiz ji ajansa me re axivî.
Gaziyê şer Mazlûm Yildiz diyar kir ku şehîd Sorxwîn û şehîd Azadî pir ji mirovan hez dikirin û got, “Her du heval ji bo me xwedawendên pîroz in. Em ê têkoşîna wan ji her demê zêdetir pêş bixin.”
Gaziyê şer Mazlûm Yildiz anî ziman ku fermandar Sorxwîn ji Rojhilatê Kurdistanê bû, lê qet xwe cuda his nedikir û got, “Hevrê Sorxwîn her digot, ‘Eger ez şehîd bibim, darbesta min li bajarê min Kobanê bigerînin û li nava xaka pîroz a şehîdan min veşêrin.’ Li gor wê wesîyet û daxwazê heval û hogirên wê darbesta wê bi kesk û sor û zer xemilandin û berê wê dan bajarê berxwedanê Kobanê da ku di merqeda xwe de aram razê.”
Mazlûm Yildiz bi bîr xist ku fermandar Sorxwîn ji tevahî netewe û gelan hez dikir û wer dewam kir, “Hevala Sorxwîn dildara azadî û pêkve jiyana gelan bû. Timî digot, ‘Em tev mirov in. Divê di nav me de ferq û cudatî nebe. Hewce ye em pergala xwe ya demokratîk pir bi lezgîn jiyanî bikin.’ Hevala Sorxwîn di jiyana xwe de her nimûne bû. Hevalan jî pir jê hez dikirin û qîmet didanê. Wê jî pir ji hevalan hez dikir û bi wan re mijûl dibû, pirsgirêkên wan jî çareser dikirin. Hevala Sorxwîn di rêveberiya giştî ya gaziyan de cih digirt. Lê qet xwe ji hevalan cuda nedidît. Hevalek fedakar, jîr û zana bû. Jixwe hevala Sorxwîn bi xwe jî hevalek gazî bû. Di şerê Kobanê de çavekî xwe winda kiribû. Lê hingî xwezayî û têkoşer bû, mirov qet ferq nedikir û çavekî heval protez e. Hevala delal Sorxwîn pir zû diket dilê hevalan û gel jî pir jê hez dikir. Bi taybet jî gelê Kobanê pir pêve girêdayî bû. Ji bo gelê Kobanê şer kiribû û ew ji çeteyên DAIŞ’ê parastibûn. Di heman demê de di nava gelê Kobanê de pir kar û xebat kiribû.
‘Pir nazik û hestiyar nêzî gaziyan dibû’
Gaziyê şer Mazlûm Yildiz têkildarî Azadî Dêrik jî wiha axivî, “Hevala Azadî jî weke hevala Sorxwîn pir jîr bû. Jidil û can dixebitî. Dixwest ji xebatên hevalên gazî yên federasyonê re bibe bersiv û karekî serketî pêk bîne. Hevala Azadî ne gazî bû, lê pir nazik û hestiyar nêzî hevalên gazî dibû. Timî rûken û bi heyecan bû. Pir bi hevalan re mijûl dibû. Dixwest derûniya wan fêm bike û bi wan re bibe alîkar. Bi rastî windakirina fermandar Sorxwîn û Azadî ji bo me tevahî gaziyan pir giran bû. Lê li ser wan qehreman û şêrejinan girî û hezn, şaş e. Ya girîng ew e, em wan ji xwe re bikin pîvanên xeta azadiyê.”
Mazlûm Yildiz axaftina xwe wiha bi dawî kir, “Di şexsê van her du fermandarên pîroz de tevahî şehîdan bi bîr tînim û bejna xwe li hemberî wan ditewînim. Em şopdarê xeta wan in, em ê tol û heyfa wan rakin. Her du heval ji bo me xwedawendên pîroz in. Em ê têkoşîna wan ji her demê zêdetir pêş bixin”
