WINTERTHUR – Li bajarê Winterthûr ê Swîsreyê bi pêşengiya jinên ciwan ên endamên Jinên Ciwan ên Tekoşer (TekoJIN) ji bo şervanên jin ên ji Ewropayê beşdarî Têkoşîna Azadiya Kurdistanê bûne û di demên cuda de şehîd bûne, bîranînek navendî hate lidarxistin.
Di bîranîna navendî de ku bi pêşengiya jinên ciwan şehîd Berjîn Zenda, Seher Deniz, Tavîn Tekoşîn, Tîjda Ekecîk, Besê Tolhildan, Dîdar Harûn, Elefterîa Hambî, Sara Tolhildan, Sara Dorşîn, Tekoşîn Koçgîrî, Zenda Ekîn, Avaşîn Tekoşîn, Hemû şehîdên jin ên ji Ewropayê yên tevlî têkoşîna azadiyê bûne Hêlîn Qereçox, Ronahî Amed û Ş. Ivana Hoffmann hatin bibîranîn.
Bernameya bîranînê bi deqeyek rêzgirtina ji bo bîranîna şehîdên şoreşa Kurdistanê destpê kir. Piştî rêzgirtinê li ser navê KOMAW’ê Heval Mistefa û Heval Fîdan axivîn û gotin, “Ez hemû şehîdên me yên pêşeng bi ruhê têkoşînê bi bîr tînim û gelê me yê qehreman, QSD, YPG, YPJ, şervanên me yên di tunelan de berxwe didin, silav dikim. Em lehengiya şehîdên xwe ji bîr nakin. Şehîd namirin!”
Di axaftina li ser navê CDK-S’ê ya piştî KOMAW’ê de wiha hat gotin: “Li ser şehîdên me gelek tişt tên gotin, lê ya sereke fêmkirina wan e. Çima şehîd bûn, armanca wan çi bû?” Paşê got: “Ev der cihê me ye, ne welatê me ye. Divê em Ewrûpayê wek welatê xwe qebûl nekin. Welatê me, diyar e. Eger em li ser vê yekê bifikirin ku çima li Kurdistanê têkoşîn tê dayîn, belkî em hinekî layiqî şehîdên xwe bin.”
Di axaftina li ser navê TekoJIN’ê ya piştî CDK-S’ê de hat gotin, “Çiqas ji Kurdistanê dûr bûn jî dilê wan her tim li çiyayên Kurdistanê lêdixist. Herî dawî jî dûriyên fizîkî derbas kirin û çiyayên azadiyê dîtin. Dengê berxwedanê yê ku ji çiyayên Kurdistanê belav dibû, guhdarî kirin û deng dan dengê vê berxwedanê.”
“Paradîgmaya Rêber APO ji xwe re kirin kulm û bûn tîr û riman, dilê pergala serdest a mêr qul kirin. Birîna van hemû şervanên jin ên qehreman ewqas kûr e ku dewleta Tirk a faşîst îro jî li Rojava hewl dide vê birîna xwe bigire. Her bombeya ku li Rojava tê avêtin û her guleyek ku li Rojava tê avêtin xeyalên jinan ên azadiyê û mîrateyên şehîdên me dike hedef.”
Ji ber vê yekê banga me ji hemû jinan, bi taybetî jinên ciwan, gelê Kurd, welatparêz û hemû gelên aştî û demokrasiyê re heye: Bila xwe bi rêxistin bikin. Werin em vê ronahiyê li her derê li dijî kesên dixwazin ronahiya Rojava qut bikin belav bikin. Em ji bîr nekin ku yekane bersiva mîrateya şehîdên me avakirina jiyana azad a xeyalên wan e.
“Em soz didin wan. Em ê bi awayekî bênavber li pey rastiyan bin. Em ê agirê azadiyê ku wan li hemû cîhanê pêxistî vêxin. Axaftin bi van gotinan bi dawî bû: “Bi paradîgmaya Rêber APO, di pêşengiya şehîdên xwe de em ê Kurdistanê azad bikin, Rêbertî azad bikin, em ê bi hev re civaka azad û cîhanek azad ava bikin.”
Piştî axaftinan sînevîzyona ji bo bîranîna şervanên jin hatibû çêkirin hate pêşandan.
Piştî pêşandana sînevîzyonê, bîranîn bi xwendina nameyên Şehîd Berjîn Zenda û Şehîd Sara Tolhildan bi dawî bû.
Di bîranînê de bê navber dirûşmeyên “Şehîd Namirin”, “Jin Jiyan Azadî” û “Bê Serok Jiyan Nabe” hatin berzkirin.
