ŞENGAL- Xelkê Şengalê bi pêşengiya TAJÊ komkujiya Parîsê ku sê jinên şoreşger û pêşeng Sakîne Cansiz, Fîdan Dogan û Leyla Şaylemez şehîd bibûn, bi meşeke girseyî şermezar kir. Di meşê de peyama, ‘Gavên ku TAJÊ di Şingalê de avêtiye tovên 30 saliya tekoşîna Sara ne. Ta dawiyê emê li ser şopa wan tekoşîna xwe bidomînin. Wê tekoşîna Jin Jiyan Azadî biserbikeve û wê dijmin têk biçe û civaka me biserbikeve’ hate dayîn.
Komkujiya Parîsê ku 9’ê Çileya 2013’an ji aliyê MİT’a Tirk ve pêkhat û di encamê de yek ji damezrînera PKK’ê û Tevgera Azadiya Jinên Kurd Sakîne Cansiz (Sara), Fîdan Dogan (Rojbîn) û Leyla Şaylemez şehîd bûn, li nahiya Sinûnê ya Şengalê bi meşeke girseyî hate şermezarkirin.
Meşa bi pêşengiya Tevgera Azadiya Jinên Êzidî (TAJÊ) pêkhat, li ber avahiya Meclîsa Gel a Sinûnê ta qada Mam Zekî dewam kir. Di meşê de ala ku wêneyê Rêberê Gelê Kurd Abdullah Ocalan li ser, wêneyên şehîdên komkujiya Parîsê hatin hildan. Di meşê de bênavber dirûşmeyên ‘Jin Jiyan Azadî Sara Rojbîn û Ronahî û Bê Serok Jiyan Nabe’ hatin gotin. Li qada Mam Zekî piştî deqeyek rêz hat girtin Berdevka TAJÊ Riham Hico bi navê girseya gel û jinana axaftin kir.
Rîham Hico berdevka TAJÊ di daxuyaniyê de komkujiya Parîsê û armanca wê bibîr xist û wiha got: ‘Di kesayeta şehîdên Parîsê yên komkujiya yekem û duyem de em hemû şehîdên şoreşê bibîr tînin û soza xwe nû dikin. Em komkujiyên dûrî exlaq, Tirsonek û durî wijdanê mirovahiyê şermezar dikin. Herdû komkujî li Paytexta Firansa Parîsê pêkhat, cihê ku qaşo pir ewle ye. Pêşengên Kurdan, pêşengên jinan û pêşengên hûnerê li Paytexta Firansa Şehîd bûn. Rojane li herçar perçeyên welat êrîş li dijî Kurd û Kurdistanê têne kirin. Gelê Rojavayê Kurdistanê eve 14 sale tekoşîna azadiyê didin meşandin, xweseriya xwe ava kirin û dinava aramiyê de jiyan dikirin. Li seranserî herêmê îroj bûne hedefa êrîşên dewleta Tirk ya dagirker. Li seranserî Rojava hêzên parastinê li himberî hêzên tarî berxwedaniyekî mezin didin meşandin. Berxwedaniya ku li wir tê meşandin ji Şingalê ne qute. Xeteriya li ser Rojava li ser Şingalê jî heye. Mînaka wê jî dema fermanê êrîşên li ser rojava û Şengalê bi hevre bûn.’
‘Tovên tekoşîna Sara me li ser piyan hiştiye’
Rîham Hico di dawiyê de êrîşên li ser rojava jî bibîr xist û silav kir û da zanîn ku ewê li ser şopa Sarayan tekoşîna xwe dewam bikin û wiha got: Jinên Êzidî û Kurd bihevre tekoşînekî mezin ji bo azadiya hemû jinan didin meşandin. Xelkê rojava ji bo piştevaniya hêzên xwe berê xwe dan çeperên şer, lê konvoya gel ji aliyê dewleta Tirk ve rastî êrîşan hat û komkujiyek li wir çêbû. Di wê êrîşê de rêveberiya rêxistina Zenûbya tevî 4 kesan şehîd bûn û birîndar jî hebûn. Dewleta Tirk û çeteyên wê li dijî her kesî şer dikin, em jî vê dibêjin bav û bapîrên Erdogan ferman anîn serê me û em tune nekirin wê jivir û şûnde jî me tune neke. Wê şengal bi pêşengtiya jina fermandar û azad ber bi serkeftinê ve bimeşe. Em dev ji doza Sakîne, Leyla û Ronahî bernadin, em bi tekoşîna wan liser piyane. Gavên ku TAJÊ di Şingalê de avêtiye tovên 30 saliya tekoşîna Sara ne. Ta dawiyê emê li ser şopa wan tekoşîna xwe bidomînin. Wê tekoşîna Jin Jiyan Azadî biserbikeve û wê dijmin têk biçe û civaka me biserbikeve.’
Daxuyanî bi dirûşma, ‘Jin Jiyan Azadî’ bi dawî bû.
