NAVENDA NÛÇEYAN – Fermandariya YPJ’ê bi daxuyaniyekê eşkere kir ku di berxwedana Tişrîn a 25’ê Kanûnê (2024) de Fermandar Ronahî Yekta şehîd bû.
Di daxuyaniyê de ev agahî hatin parvekirin:
“Hevrêya me Ronahî Yekta li eniya berxwedana dîrokî ya bendava Tişrînê, dema ku li dijî dewleta dagirker ya Tirk û çeteyên wî têkoşîn dikir, tevlî karwanên nemiran bû.
Fermandara YPJ’ê Arşîn Hisên bi nasnav Ronahî Yekta yek ji fermandarên leheng yên berxwedaniya bê emsal ya eniya bendava Tişrîn û Qereqozaxê bû. Armanca çeteyên girêdayî dewleta Tirkiyê gelên bakur-rojhilatê Sûriyê teslîm wergirtine, di heman demê de hemû nirxên civakî û mirovî ku gelên herêmê bi berdêlên giranbuha qezenc kirine, ji holê rakirine. Li gel vê yekê jî Sûriyê ji bo jinan, gelan û baweriyan kirina dojeheke ser erd, kiryarên esasî yên hovitiya komên çete yên girêdayî dewleta Tirkiyê ye. Komên girêdayî dewleta Tirk bi van armancan li dijî herêmê me êrîşên giran dane destpêkirin. Li beramberî vê zarokên herî egîd û canfeda yên gelên bakur-rojhilatê Sûriyê, li çeperên berxwedanê destanan dinivîsînin. Ne tenê dibin mîmarê vê rastiyê, her wiha bi fedakirina canê xwe yê pîroz nîşanî hemû cîhanê jî didin ku rûmeta jinên têkoşer û mirovên azad, dê li dijî her cure zordestî, zext û ferzkirinan serî netewînin û wê dubare hêviya jiyaneke wekhev û azad di dilê gelan de hêşîn bikin. Şervanên ku di çeperan li dijî çeteyên dagirkeriya faşîst ya Tirkiyê şer dikin, dizanin ku ev têkoşîna wan ji dîrokê re dibe mal, ev têkoşîn tarîtiya li ser siberojê radike. Li ser vê bingehê bê tirs û dudilî hebûna xwe feda dikin.
Rêheval û fermandara me Ronahî Yekta jî xwedî ruheke evçend berz, kesayeteke bilind ya şoreşgerî û dilekî bi qasî derya mezin bû. Wê di dilê xwe de tucar cih neda qirêjiya serdemê û qet jî qebûl nekir ku xirabî hakimiyetê li ser civakê ava bike. Ew li bajarê rûmet û berxwedanê Efrînê hate cîhanê. Di zarokatiya xwe de di nav xebatên çand û hunerê de cih girt. Jiyan hem bi ziravî û hunera hunermendekê hem jî bi pîvanên jineke şoreşger jiyan kir. Lewma bi gurbûna şoreşa azadiyê ya li Sûriyê re, wê jî berê xwe da çeperên têkoşînê. Di sala 2012’an de dema ku çeteyên El Nusra êrîşî Helebê kirin, li hemberî wê Ronahî rêka tekoşîn û berxwedanê hilbijart û beşdarî nava xebatên şoreşê bû.
Ronahî Yekta di xebatên Ciwanên Şoreşger de cihê xwe girt. Bû rêheval û hogira jinên ciwan û ciwanan. Ronahî bi evîna şoreşê ciwanan perwerde kir. Di hemû herêmên bakur-rojhilatê Sûriyê xebatên rêxistinkirinê meşand. Dema ku dewleta dagirker ya Tirk êrîşê Efrînê kir û trajediyeke mezin ya mirovahiyê hate jiyîn, Rêheval Ronahî bi hêrs û kîneke mezin soza tolhildanê da. Pêwîstiya jiyanî ya parastinê hîna kûrtir hîs kir û tevlî nava refên YPJ’ê bû û di demeke kin de xwe di warê hunera şer û parastina jinê de kûr kir. Bi perwerdeyên birdozî û leşkerî ku dît, bû yek ji fermandara ciwan ya YPJ’ê û bi kedeke bêhemta hem şervan perwerde kir, hem jî erk û berpirsyariyên parastinê bi cidiyeteke mezin pêk anî.
Şervan û hevrêyên Ronahî Yekta hêvî û coşa di kurahiya çavên wê de, di her kêliya jiyanê hîs kirin û jê hêz girtin. Ji ber Ronahî Yekta bi menewiyata bilind ya azadiya jinê xwe têr dikir. Lewma jiyana xwe jî bi dîsîplîn, rêhevaltî û têkoşîna li ser bingeha pîvanên şoreşgeriyê dineqişand. Rêhevala me Ronahî Yekta di 25’ê Kanûnê, dema di cenga li dijî dagirkeriya dewleta Tirk û çeteyên wî tevî hevalên xwe têkoşîneke mezin û dîrokî raber dikir û di encama êrîşa dewleta Tirk de gihîşt şehadetê.
Em, rêhevala xwe fermandar Ronahî Yekta bi hurmet û rêzdariyeke bêdawî bi bîr tînin, li pêşberî bîranîna wê bejna xwe ditewînin. Ji malbata wê ya welatparêz re, ji gelên bakur-rojhilatê Sûriyê û hemû rêhevalên wê re sersaxiyê dixwazin. Emê di têkoşîna xwe ya mafdar û birûmet de bîranîna Wê tim bidin jiyandin û em soz didin ku tola şehîdên xwe, bi misogerkirina jiyana azad û wekhev tacîdar bikin. Têkoşîna şehîdan ji her demê bêtir rêya me, doza me û armanca me ya serkeftinê ronî dike.”
Nasnameya Ronahî Yekta wiha ye:
Nav û Paşnav: Arşîn Hisên
Nasnav: Ronahî Yekta
Navê Dayik: Hesne
Navê Bav: Enwer
Cih û Dîroka Şehadetê: 25.12.2024/Bendava Tişrînê
