NAVENDA NUÇEYAN- Ji pênûsa Gaziyê şer Rêzan Masîro ji bo Şehîd Vejîn Jiyan ku di dîroka 28’ê Tirmeh 2023 ‘an de di encama êrîşên balafirên şer â dewleta Tirk a dagirker de şehîd bû.
“Vejîn heqîqeta azadî û wekheviyê ye. Geh dibe fikreke çavên xwe bi Rêbertiyê vedike, geh dibe xwedawendeke azadiyê ava dike. Vejîn dibe jiyan. Hemû têgihiştinên paşdemayî parçe dike, ji têkoşîna jinan û bindestan re dibê Vejîn.
Yek ji nûnera herî mezin bû ya rêûresma bi Sarayan dest pê kiribû. Hevrê Vejîn dijminê zilmê bû. 24 saetan xwe bêsekn têrûtijî derbas dikir. Zehmet bû mirov rojekê yan jî kêliyekê bibîne ku hevrê Vejîn rûniştiye. Her tim ji bo doza pîroz dixebitî. Timî ji bo têkoşînê difikirî û tişta difikirî pratîze dikir.
Soz dabû gelê xwe yê bi sedê salan e li hember dagirkerî û mêtinkariyê şer dike. Her wiha soz dabû zarokên Kurdistanî yên bi kevirên di destê xwe de li hêzên dagirkeran dixistin. Soz dabû şehîdên di oxira azadiyê de bibûn nemir.
Jiyaneke besît li xwe heram kiribû. Ji gotina Rêber Apo ya “Jiyan eger wê hebe divê azad be” bi hemû kesayeta xwe bawer kiribû û li ser vî esasî tevlî Rêbertiyê bibû. Her wiha dilsoza gotina heval Zîlan a “Serokê min! Eger ji canê min cudatir tiştekî din hebûya min ê ew jî daba” bû. Ala bi heybet a ji Sarayan girtibû heya dawiyê bilind kir. Hevrêyeke welê bû ku bi hêrsa li hember komkujiyên li Kurdistanê rû didan dijiya.
Sala 2015’an di pêvajoya berxwedana rêveberiyên xweser ên li Bakurê Kurdistanê de dema dewleta Tirk a dagirker bi hovîtî û bi awayekî dijmirovî êrîşî Cizîra Botan kir, hevrê Vejîn li hemberî vî dijminê xwînxwar derket. Hevrê Vejîn sala 2016’an jî cihê xwe yê pîroz ê di nav şoreşa Rojava de girt.
Hevrê Vejîn a di armanc û xwestekên xwe de pir zelal bû, di nav refên azadiyê de bi ruhê xwe yê ciwan, bi israr û biryardariya xwe ya di xeta jiyan azad de di demeke kurt de fêrî jiyana şoreşgerî bû.
Di nav refên şoreşê de xweperwerdekirin û avakirina kesayeta xwe yek ji faktorên herî girîng e. Hevala Vejîn a xwe ji perwerdeyê paşde nedida, bi ruhekî ku xwe ji perwerdekirina ciwanan berpirsiyar didît, bi sedan ciwanên Bakur û Rojhilatê Sûriyeyê perwerde kir. Bi duristî û cesareta xwe di dilê hemû hevalên xwe de cih girtibû.
Li Rojava hêza esasî ya domandin û pêşxistina şoreşa jinê, ruhê jinên ciwan e. Şoreşa bi îrade û bîrdoziya jinan ava bû, bi pêşveçûna modernîteya neteweya demokratîk re tevlîbûna jinan careke din xurttir dike. Jinên di nav refên YPJ’ê de cih digirin hebûna xwe gihandin asta herî bilind. Di vê xisûsê de bandora hevalên weke Vejîn pir zêde heye.
Li erdnîgariya Botanê têgînên berxwedan û serhildanê xwedî heman wateyê ne. Bi taybet jinên Botanî bi Rêbertî ve girêdayî ne û di têkoşîna azadiyê ya gelê Kurd de timî bi rola pêşeng rabûne. Ev sekn û ruhê berxwedana esî û pîroz a xwe di têkoşîn û karaktera hevala Vejîn de bi zelalî nîşan dida, bi hemû hêz û heybeta xwe berdewam dike.”
