NAVENDA NÛÇEYAN – Xebatên ji bo “Meşa Dirêj” ku her sal ji bo azadiya fîzîkî ya Rêber APO tê lidarxistin, dest pê kir. Rêya Meşa Dirêj a îsal di navbera bajarên Bielefeld û Duisburg ên eyaleta Nordrhein-Westfalena Elmanyayê (NRW) de ye.
Çalakiya Meşa Dirêj wê di 15’ê Îlonê de bi panêla “Rêber APO û Ciwan” bi dirûşmeya “Ji Rêber APO re azadî, Ji pirsgirêka Kurd re çareserî” destpê bike.
Ciwan wê di navbera 16’ê Îlonê û 20’ê Îlonê de li eyaleta NRW’ê her roj li bajarên cuda bimeşin. Ciwanên Kurd û Enternasyonalîst ji bo azadiya fîzîkî ya Rêber APO wê li bajarên Bîelefeld, Hamm, Dortmûnd, Essen û Dûîsbûrgê li qadan bin.
Komîteya Amadekar a ku xebatên xwe yên dawî ji bo çalakiya ku wê ciwanên Kurd û Enternasyonalîst ên ji çar aliyê Ewropayê li hev bicivîne, li ser hesabên xwe yên medyaya dîjîtal dîmenê bangawaziyê weşand.
Di dema ku dîmena bangê bi zimanên Kurdî, Tirkî, Elmanî, Fransî, Îtalî û Îngilîzî hate weşandin, di vîdeoyê de detayên li ser rêya çalakiyê jî bi berfirehî hatin vegotin.
Di dema ku tê payîn ku ji çar aliyên Ewropayê ciwan beşdariyeke xurt bikin, daxuyaniya Komîteya Amadekar a Meşa Dirêj li gel vîdyoya banga nû wiha ye;
“Di çalakiya Meşa Dirêj de daxwaza me ya sereke ew e ku azadiya fîzîkî ya Rêber APO misoger bikin û ji bo vê yekê zanebûn ava bikin.
Tecrîd û qirkirin di şexsê Rêbertiya me de ji aliyê Komara Tirk a dagirker û rejîma AKP-MHP’ê ve li ser gelê me tê meşandin. Konsepta dagirkerî û êrîşên qirkirinê yên li Kurdistanê pêşketiye û li Bakur û Başûr jî tinekirina gelê me û şervanên leheng jî di meriyetê de ye.
Em weke ciwanên Kurd vê konsepta îmhayê nas nakin, çawa ku gerîlayê azadiyê li Avaşîn, Metîna û Zapê li dijî faşîzma Tirk têdikoşe, em ê jî bi Rêber APO re têkoşîna xwe ya azadiyê bidomînin. Li ser vê bingehê em bang li hemû ciwanên Kurd ên li Ewropayê dijîn dikin ku bi ruhê seferberiyê beşdarî çalakiya me ya Meşa Dirêj a ku em ê bi şîara “Ji Rêber APO re Azadî, Ji Pirsgirêka Kurd Çareserî” bê lidarxistin bibin.”
Hûrguliyên çalakiya “Meşa Dirêj”;
15.09.2024 – Civîn – Herbert Hinnendahl-Strasse 11, 33602 Bielefeld
15.09.2024 – Roj 1 – Konferansa Rêber APO
16.09.2024 – Roja 2 – Bielefeld
17.09.2024 – Roja 3 – Hamm
18.09.2024 – Roja 4 – Dortmund
19.09.2024 – Roja 5 – Essen
20.09.2024 – Roja 6 – Duisburg
Ji bo ragihandinê;
Mail: [email protected]
Instagram: @mesadirej2024
Telegram: @mesadirej2024
TikTok: @mesadirej2024
X (Twitter): @mesadirej2024
