STUTTGART – 15’ê Tebaxê bi pêşengiya TekoJIN li Stûttgartê bi meşeke bi coş hat pîrozkirin.
Ciwanên endamên TekoJIN (Jinên Ciwanên Têkoşer) û TCŞ (Tevgera Ciwanên Şoreşger) li qada Stûttgartê li hev civiyan û 41. salvegera 15’ê Tebaxê pîroz kirin. Ciwanên endamên TekoJIN û TCŞ’ê li ser navê şehîdên Kurdistanê 1 deqîqe rêz girtin. Piştî deqîqeya rêzgirtinê, bi dirûşme û muzîkê ber bi qada bajêr ve meş pêk hat.
Di meşê de bê navber dirûşmeyên “Bijî Serok APO, Fermandar Egît Dijîî, PKK li ber xwe dide, Ciwan Fedayî yê Rêber APO ne, Jin Jiyan Azadî” hatin berzkirin. Meşê heta meydana Stûttgart Schlossplatzê berdewam kir. Li qada Schlossplatzê li ser navê TekoJIN’ê bi zimanê Elmanî daxuyanî hat dayîn. Daxuyanî wiha ye:
“Hevalên hêja,
Di 40. salvegera destpêka berxwedana me ya ku di dilê bi mîlyonan mirovan de hêvî û cesaret anî, em fermandar û hevrêyê xwe yê efsanewî Egîd û her kesê ku di têkoşîna şoreşgerî de şehîd ketine bi rêzdarî û minetdarî bi bîr tînin.
Şoreşa 15’ê Tebaxê pêvajoya dîroka gelê Kurd guhert û cesaret û bawerî da wan. Di demekê de ku kesî newêrîbû jê re bigota Kurdistan, fîşeka destpêkê ji bo têkoşîna rizgariya vî welatî hat avêtin. Roja 15’ê Tebaxê ku li dijî zilm û kolonyalîzmê fîşeka yekem hat avêtin, di heman demê de bû destpêka tolhildaneke mezin. Di pêşengiya fermandar Egîd de têkoşîna me ya serketî bû rastî.
Di heman demê de 15’ê Tebaxê di nava gel de xwebawerî û îradeya nû ya serxwebûnê afirand û bû bingeha hişmendiya xweparastinê. Peyama ku gelê Kurd êdî biparastin bû, gihîştibû desthilatdaran. Zilma nemirovane ya rejîma Tirk a faşîst a di salên 1980’an de di bîra civakê de şopên kûr hiştin.
Li aliyê din berxwedana pêşeng a kadroyên PKK’ê yên li girtîgeha Amedê, baweriya jiyana azad afirand. Di 15’ê Tebaxê de ruhê azadiyê bi serketinê re bû yek. Ev ruh îro li çar parçeyên Kurdistanê pêşengiya têkoşîna li dijî faşîzmê dike. Ruhê fermandar Egîd ê li dijî faşîzma AKP-MHP’ê ya ku di barbarî û hovîtiya li Kurdistanê de sînoran nas nake, ye. Ev ruhê vejînê ku bi nirxên ku derdixe holê bûye cîhanek, divê li her derê û li her qadê bikeve jiyanê.
Her kesê ku ji jiyana azad û demokratîk bawer dike û di têkoşîna li dijî faşîzm, zext û zordariyê de berpirsyar dibîne, divê beşdarî berxwedana hevpar bibe. Tenê bi yek dilî têkoşînek dikare jiyana demokratîk pêk bîne. Pêngava 15’ê Tebaxê ku pêngava yekemîn a xweseriya demokratîk a Kurdistanê ye, di heman demê de pêngava yekemîn a jiyana hevpar û konfederal a gelên Tirkiye û Rojhilata Navîn e. Pêkanîna vê ramanê pêkan e. Li hemberî sînerjiya ku bi yekîtî û hevkariya kolektîf a jin, ciwan, komên bindest û daxwazên demokrasiyê pêk tê, ti rejîmek dîktator nikare bijî. Mehkûmê hilweşînê ye.
Bişeng Brûsk ku nûnertiya gelek leheng û lehengên li çiyayan dike, jineke ciwan e û endama Komîteya Ciwanan e û berpirsyara kordînasyona civaka ciwanan e. Ji jiyanê hez dikir û li her çar parçeyên Kurdistanê çalak bû. Bi kenê xwe yê germ, çavên xwe yên geş û bi baweriya xwe ya bêdawî ji bo siberoja azad bû mînak, çavkaniya hêz û moralê. Di 28’ê Tîrmeha 2023’an de Bîşeng tevî rêhevala xwe Sara Hogir di kemîna artêşa Tirk de şehîd bûn. Di nameya xwe ya herî dawî de wiha got: “Çiqas êrîş bikin jî nikarin hêvî û hezkirina me ya ji bo welatê me tune bikin. Em ê li welatê rojê bijîn. Rojên azad û xweş nêzîk in. Her çend rojên dijwar demeke dirêj berdewam bikin jî, rêwîtiya vê rêyê û jiyaneke bi rûmet ji her tiştî bi qîmettir e.”
Weke jinên ciwan em soz didin ku em ê li ser şopa Şehîd Bîşeng ji Bakur heta Başûr, ji Rojava heta Rojhilat bişopînin.”
Çalakî bi dirûşmeyên “Bijî Berxwedana Gerîla!” bi dawî bû.
