LÛZERN – Pêngava ku di 10’ê Cotmehê de ji aliyê dostên gelê Kurd ve li cîhanê hate destpêkirin bi çalakiyên curbecur her ku diçe mezin dibe.
Di çarçoveya pêngavê de, bi pêşengiya Kongreya Civaka Demokratîk a Kurdistaniyên Ewropa (KCDK-E) di 8’ê Çile de kampanya kartpostalê dest pê kir.
Îro saet di 13:00 de bi pêşengiya endamên Tevgera Ciwanên Şoreşger (TCŞ) û Jinên Ciwan ên Têkoşer bi beşdariya Kurdistaniyan bi dehan kartpostal li Postexaneya Navendî ya Luzernê ber bi Îmraliyê ve hatin şandin.
Li ser navê çalakgeran Ercan Guneş jî axivî. “Zêdetirî 35 meh in em ji Rêber APO ti agahî nagirin. Ev nebûna ragihandinê me nerehet dike. Tenê gotinek Rêber APO derkeve jî malbat û parêzer nikarin hevdîtinê pêk bînin. Destûr nayê dayîn. Em bêdengiya CPT, NY û AÎHM’ê ku di vê rewşa heyî de bêdeng in, şermezar dikin. Ji bo azadiya fîzîkî ya Rêber APO bê misogerkirin em bang li têkoşînê dikin.
Hin ji peyamên ku ji Rêber APO re hatine şandin wiha ne:
“Birêz Abdullah Ocalan,
Ez ji bo hevgirtinê ji we re dinivîsim. Îro jin li her derê ji bo mafên xwe têdikoşin. We got: “Heta ku jin azad nebe civak azad nabe.” Her wiha we dirûşma Jin, Jiyan, Azadî da cîhanê! Ez tevlî we dibim û daxwaza azadiya we dikim, da ku hûn bi tevgerên wekheviyê re li her derê teoriyên xwe yên azadiya jinê pêş bixin û bi cih bînin.”
***
“Birêz Abdullah Ocalan,
We got ‘birçîbûn, betalî, şer, talanî encamên îxaneta li ekolojiyê ye û civakeke ku xwe dispêre ekolojiyê nikare saxlem be’. Ez bi dil û can bi perspektîfa we re dipejirînim û daxwaza azadiya weya fizîkî ya tavilê dikim da ku hûn ramanên xwe yên derbarê ekolojiya civakî de pêş bixin.”
****
“Birêz Abdullah Ocalan,
Ez vê peyamê ji bo piştgiriya xwe dişînim. Şer û pevçûn li hemû cîhanê zêde dibin. Ez bi dil û can bi nêrîna we re me, ‘Di navbera aştî û şer de, helbijartina şer helbet dijwartir e, lê ez difikirim ku aştî ya watedar û serkeftî ye.’ Ez bi dil û can bi fikra te re dipejirînim û daxwaza azadiya te ya fizîkî ya tavilê dikim da ku hûn felsefeya xwe hîn berfirehtir bikin.”
