PARÎS – Ji beşdarên Konferansa Ciwanan a Cîhanê Romain Katabara, destnîşan kir ku ew sûdê ji têkoşîna ciwanên Kurd werdigirin. Romain Katabara bal bire ser girîngiya konferansê û got, “Li Kurdistanê, li La Réunion, li Malî, li Emerîkaya Latîn yan jî Asyayê, li ku dibe bila bibe karê me ye ku em ciwanan bixin nava liv û tevgerê ji bo pêşengiyê ji têkoşînê re bikin.”
Emperyalîzm global e
Romain Katabara got, “Emperyalîzm global e” û ji ber wê “divê em xwe bi rêxistin bikin, bi hev re li ber vê sîstema zordar rabin”. Wî bang li ciwanan kir da ku têkoşînê mezin bikin.
Katabara ku endamekî Pan-Afrîkanîst û Rêxistina Serbixwe Ka-Ûbûntû ye, anî ziman ku ew dixwazin mafê tayînkirina çarenûsa gelên hindikahiyên Efrîkayî û yên Efro, ji bo rizgariya Girava Réunionê têbikoşin û Pan-Efrîkanîzmê yanî li dijî emperyalîzmê yekîtiya Parzemîna Efrîkayê ava bikin.
Katabara diyar kir ku welatê wan ê li peravê Madagaskarê, hîna di bin mêtingeriya Fransayê de ye û got, “Li ser her tiştên têkildarî me li Parîsê biryar tê dayin. Ji ber vê yekê, em ji bo serxwebûna welatê xwe, serxwebûna Girava Réunionê têdikoşin. Em dixwazin xwedî hêza siyasî bin, li dijî newekheviya aborî û civakî ya li welatê me têbikoşin. Jixwe, ev newekhevî ji koletiyê heta sala 2023’yan hîna jî dewam dike.”
Rêya siyasetê ya ciwanan heye
Katabara bal bire ser pêwîstiya sekna hevpar û birêxistinbûna li dijî emperyalîzmê û got: “Rewşa têkildarî ciwanan jî bi heman rengî ye. Pirsgirêk ew e ku ciwan depolîtîze bûne. Haya xwe ji sîstema mêtingeriyê û pirsgirêkên têkildarî sîstema kapîtalîst nîne. Dawiya dawî haya wan jê nîne ku divê ji bo edaletê bêhtir têbikoşin. Qederperestiyeke bi vî rengî di nava ciwanên me de heye. Qederperestiyeke welê ye ku bindestiyê qebûl dike û têkoşînê nake. Qisekerekî li konferansê got, ciwanan polîtîka bi dest xistine. Em dibînin ku ciwanên li Réunionê ji siyasetê dûr ketine, ji ber ku elîtên siyasî yên li welatê me demeke dirêj e desthilatdar in, tenê ji bo berjewendiyên xwe li wir in. Lewma baweriya ciwanan a bi siyasetê û polîtîkayên welêt hîn zêdetir e. Ji ber vê jî em ê bibêjin, ji bo kirina polîtîkayê rêyeke cuda heye. Rêyek heye ku mirov ji bo xwe siyasetê bike.
Ji ber vê jî em weke Ka-Ûbûntû dibêjin, divê ciwan ji bo mafên xwe berê xwe bidin têkoşîna siyasî. Ji bo mafê diyarkirina çarenûsa xwe, mafê rûmetê, mafê kar…”
Katabara anî ziman ku di konferansê de wan bi rêxistinên din ên şoreşger re têkilî daniye û got, “Ev konferans ji bo me gelekî girîng bû.”
Em ciwanên Kurd mînak digrin
Katabara peyamek ji bo ciwanên Kurdistanê da û anî ziman ku ew piştgiriyê didin têkoşîna li Kurdistanê. Katabara got, “Bi her awayî em gelekî sûdê ji şoreşa wan werdigirin. Dawiya dawî, divê em wan ji xwe re bikin mînak, di heman demê de piştgiriya têkoşîna wan bikin. Mîna ku Thomas Sankara got, ‘Ciwanên ketine nava tevgerê xurt in, ciwantiya ku ketiye nava liv û tevgerê ji bombeya atomê jî xurttir e.”
