BASEL – Tevgera Ciwanên Kurd ên Ewropayê Tevgera Ciwanên Şoreşger, Jinên Ciwan ên Têkoşer û ciwanên enternasyonalîst ên Ewropayê li bajarê Basel ê Swîsreyê hatin cem hev, di daxuyaniya xwe ya çapemeniyê de diyar kirin ku ew pêngava 10’ê Cotmehê ya ji bo azadiya fizîkî ya Rêber APO û çareseriya pirsgirêka Kurd dane destpêkirin xwedî derdikevin.
Hevberdevkê TCŞ’ê Yûsûf Amed, endama TekoJIN’ê Dîlbîrîn Mêrdîn û li ser navê ciwanên navneteweyî Mîchele Romîto ku beşdarî daxuyaniya rêxistinên ciwanan ên Ewropayê bûn, bi Kurdî, Tirkî û Elmanî daxuyanî dan.
Ciwanan diyar kirin ku ew ê di vê pêvajoya dîrokî de di rol û mîsyonên ku APO ku Rêber Apo daye ciwanan de cih bigirin û bi yek dengî azadiya fîzîkî ya Rêber APO biqîrin. Wan diyar kirin ku armanca bingehîn a çalakiyên ku di pêngava hatiye destpêkirin de wê bi awayekî aktîf pêk bînin azadiya fîzîkî ya Rêber APO be û diyar kirin ku ew bi dirûşmeyan û meşaleyan ji vê pêvajoya dîrokî re amade ne.
Daxuyaniya ku bi Kurdî ji aliyê endamê TekoJIN’ê Dîlbirîn Mêrdîn ve hat xwendin wiha ye;
Rêber APO ji salên 1960’î vir ve ji bo nakokiyên li Rojhilata Navîn bi awayekî siyasî çareser bike têdikoşe. Weke Kurdekî dema Rêber APO dest bi têkoşînê kir, fêm kir ku pergaleke metînger a taybet li tevahiya Kurdistanê heye. Li ser vê yekê Rêber APO dest bi têkoşîna xwe ya mezin kir. Bi vî rengî bi dehan salan gelê Kurd û gelên Rojhilata Navîn ên ku li dijî faşîzm û mêtingeriyê her ku diçû radibûn ser piyan, bi rêxistin kirin û perwerde kirin. Vê yekê ne tenê planên dewleta Tirk, planên hêzên ku ji metîngerîya Kurdistanê û kaosa li Rojhilata Navîn sûd werdigirin jî xera kir. Di demeke ku hemû cîhan digot “sosyalîzmê winda kir” de, Rêber APO da xuyakirin ku wê sosyalîzma rast çawa be, ev yek jî ji bo gelan bû çavkanîya hêviyê. Ji ber vê rastiyê bi hevkariya hêzên Modernîteya Kapîtalîst û dijminên Kurdan bi komployeke navneteweyî hate dîlgirtin.
Rêber APO 25 sal in di bin tecrîd û pergala îşkenceyê ya li derveyî mirovahiyê de dîl tê girtin. Dewleta Tirk a dagirker û hêzên navneteweyî bi desteka hevkarên herêmî yên ku îxanet ji xwe re kirine nasname, dixwazin vê îşkenceya tecrîdê normal bikin û li ser gelê Kurd ferz bikin. Ji destpêka komploya navneteweyî heta îro, îşkenceya tecrîdê organîzetir û sîstematîktir bûye. Hewl didin hemû têkiliyên Rêber APO yên bi cîhanê re bi rengekî ku li tu derê cîhanê û di dîrokê de nehatiye dîtin, qut bikin. Ji sala 2011’an û vir ve hevdîtinên bi parêzeran re jî di nav de hemû hevdîtin û ji sala 2015’an ve ku êrîşên qirkirinê yên li dijî gelê Kurd hatin destpêkirin, hevdîtina bi malbat û heyetan re qedexe ye. Qedexe û pêkanînên keyfî yên ku li cîhanê li ser tu girtiyekî nayên meşandin, li ser Rêber APO tên meşandin. Cezayên dîsîplînê yên keyfî û qedexeyên serdanê tên dirêjkirin, serlêdanên hevdîtinê jî bi awayekî keyfî tên redkirin. Bi pêvajoya desthilatdariya faşîst a AKP-MHP’ê re, li Îmraliyê rejîmeke tecrîd û îşkenceyê ya derqanûnî û bêexlaqî hat avakirin û pêşî li Kurdistanê û piştre li tevahiya Tirkiyeyê belav bû.
Hevkarên herî mezin ên vê îşkenceyê dewlet û saziyên Ewropayê ne. Dewletên Ewropayê ku bi navê parêzvanên demokrasî û mafên mirovan in, hemû pêkanînên faşîzma AKP-MHP’ê li hemû girtîgehên Kurdistan û Tirkiyeyê bi taybetî li Îmraliyê bi bêdengî dipejirînin û bi her awayî hevkariya xwe di asta herî bilind de didomînin. Weke ciwanên Kurd ên li Ewropayê dijîn, em bêdeng nanemînin û vê rewşê qebûl nakin.
Weke tevgerên ciwanên Kurd ên li Ewropayê dijîn “Tevgera Ciwanên Şoreşger û Jinên Ciwan ên Têkoşer” em bi rola ciwaniyê ya pêşeng a ku Rêber APO daye me tevlî pêngava “Ji Rêber APO re Azadî, Ji Pirsgirêka Kurd re Çareserî ” dibin. Weke TCŞ û TEKOJÎN, bi vê pêngava ku weke pêngava fînalê ye emê li her qada ku em lê bin, heta ku azadiya fîzîkî ya Rêber APO mîsoger nebe emê bi yek dengî vîna Rêber APO qîr bikin . Li ser vê bingehê em bang li hemû ciwanên Kurd dikin ku di şexsê azadiya fîzîkî ya Rêber APO de tevlî vê pêngava ku Tevgera Azadiya Kurd û dostên wê ji bo azadiya jinê, jiyana demokratîk û ekolojîk daye destpêkirin, bibin.
