NAVENDA NÛÇEYAN – Tevgerên şoreşgerî, enternasyonal û taybet PKK’ê cih û zemîneke mezin daye ciwanan ji bo bikare vê hêz û mîsyona xwe ya li ber civakê bi cih bîne. Qad jêre veqetandiye, bi hêz kiriye, rêkxistiye, kiriye artêş û gihandiye wê asta bi xwe biryar bide û bi xwe pêk bîne. Bi taybet di nava Tevgera Azadiyê ya Kurd de ciwan xwedî rist û mîsyoneke ya xuliqandin û ji nû ve avakirinê ye. Ji bo wê PKK ti demê ruhê wê pîr nabe û tim ciwan e, dihilberîne û mezin dike. PKK a weke tevgereke ciwanan derket ser dika dîrokê, ta îro bi vî ruhî û vê helwestê ji bo doz û azadiya gelan têdikoşe. Bi vê ruh û hişmendiyê di roja îro de weke tevgereke humanîst û enternasyonalîst her diçe mezin dibe û berfireh dibe.
Li ser asta cîhanê ji hemû netew, ol, bawerî û rengî cihê xwe li nava vê tevgera ciwanan dît û ji bo heman dozê şer dike. Şerê van ciwanan yê bi navê şerê rizgariyê îro bûye ‘Şerê Gel ê Şoreşgerî’ ango şerê gelan, şerê rizgarî û serfiraziyê ya gelan. Şerê serxwebûna netewan. Nimûneya vê îro di Şoreşa Rojava de şênber e. Berxwedana li Rojava destpê kir û di qonaxa xwe ya herî hestyar de, hemû tabû serûbin kir; xwe gihand lûtkeya serketinê. Vê jî bi hêz û mîsyona ciwanên di serî de çar parçeyên Kurdistan û şoreşgerên derveyî welat. Niha jî ji bo encameke dawî ya serketinê em di qonaxa herî germ a ‘Şerê Gel ê Şoreşgerî’ de ne. Ji bo vê divê em li gorî vî ruh û hestê bikevin nava liv û tevgerê. Di vê demê de ku her tişt bikeve xizmeta şer û serketinê, nabe ciwan xwe ji vê sist bike û gavê şûn ve bavêje. Di vê pêvajoyê de ku şer her alî germ e, dijmin lewaz bûye; divê ciwan çenteyê xwe nede pişt û ji şoreşê bireve. Reva ji şoreşê reva ji xwe ye, reva ji hebûn û neteweya xwe ye. Li cihekê dê-bavê xwe bihêlî û pişta xwe bidî biçî, ne ciwanî û ne jî ciwantî ye.
Xeyalê ber bi jiyanek nû çûyîn, vala ye. Ji ber ku jiyîn li ser xaka tu lê hatî dinê ye. Welatê tu ber wî diçe, welatê ku warê te tine dike ye, te dikuje ye. Qesta dijminê xwe kirin, teslîmbûn e. Ji xwe dijmin jî vê dixwaze. Kes vê weke propaganda nebîne, ev heqîqeteke ku neguher e. Reva ji şoreşê, çûna jiyaneke takekesî û xwe tenê rizgarkirine. Ji hemû rastî û heqîqeta xwe ya welat û şerê li welat rû dide dûrketine. Di demekê de ciwanên enternasyonalîst û şoreşger bi hewara mirov tê, divê mirov li gel wan be. Wan bi tenê nehêle. Ev şer ne şerê Kurdan tenê ye, ev şer şerê gelan e. Gelan hebûna xwe rastiya xwe di rastî û heqîqeta gelê Kurd de dîtiye. Ji bo wê şoreşger û hêzên enternasyonalîst di roja îro de li her derê xwedî li vê dozê derdikeve, cih têde digire. Ji bo wê pêşengtîkirina ciwanên Kurd a doza serketinê erk û wezîfeyeke nebe nabe ye.
Ji Bakur bigire heta Başûr ji Rojhilat heta Rojava ciwanên Kurd divê li ser lingan be, li rê û rêbazên herî xuliqkar ên serketinê bigire. Li kû dibe bila bibe, çawa dibe bila bibe, armanca esasî li dijmin dayîn be. Hemû sazî, kesayet û nokerên hevkarên dijmin di hedefê de bin. Dema me bi vî rengî fikirî û ketin tevgerê wê demê serketina ‘Şerê Gel ê Şoreşgerî’ teqez dibe. Wê demê biratiya gelan û hêzên şoreşger pêkan dibe. Wê demê em dikarin neteweyên demokratîk û biratiya gelan a li ser heqîqeta jiyana azad biafirînin, bijîn. Wê demê her war dibe warê jiyanê. Wê demê ciwan nayên kuştin, qetilkirin û destdirêjî li ser wan nayê kirin. Wê demê war û welateke bê şer û tundî dikare bê avakirin.
Her kêlî li ser vê hişmendî û ferasta ku Serok Apo dayî avakirin, ketin nava tevgerê; li gorî pêwîstiyên wê xwe rêkxist û bûn pêşeng em ê bikarin, ji bo nifşê nû jiyaneke bi aram ava bikin. Em ê bibin parçeyek ji jiyana xwezayî ya modernîteya demokratîk a hevjiyana azad. A niha ji ciwanan tê xwestin bi vî awayî bihizire û bi vî awayî bikeve tevgerê. Hêz û qudretê ji berxwedana gerîla bigire, bi heman ruhî li her cihê lê şer bike, tevlî çalakiyê bibe. Dema wê yekê hatiye em di serî de Rêberê xwe, welat û hebûna xwe ji bin dagirkeriyê rizgar bikin.
Weysî Tallî Ji Bo Ajansa Nûçe Ciwan Nivîsandî……..
