QAMIŞLO – Duh di pêşengtiya ciwanan de bi sedan şêniyên navçeya Til Hemîs bi armanca şermezar kirina êrîşên dewleta Tirk ya dagirker ên li ser herêmên Bakur- Rojhilatê Sûriyeyê û bi armanca piştgirî dayîna Hêzên Sûriyeya Demokratîk meşekê li darxistin û gotin, “Bi ruhê berxwedana şehîdan û bi ruhê berxwedana jinan, em dîsa piştgiriya xwe ya bi Hêzên Sûriya Demoqratîk re nû dikin. Yên ku li dijî çeteyên DAIŞ’ê şer kirin û ew têkbirin, niha jî dîsa xaka Bakur-Rojhilatê Sûriyeyê, ji êrîşên dewleta Tirk û çeteyên wê ve diparêzin.
Bi sedan şêniyên navçeya Til Hemîs û endamên saziyên sivîl ên Rêveberiya Xweser li pêşiya navenda Trafîkê ya li başûrê navçeya Til Hemîsê kom bûn û alên Hêzên Sûriyeya Demokratîk, alên Partiya Yekîtiya Demokratîk û wêneyên Rêberê Gelan Abdullah Ocalan hildan. Meş ji ber navenda trafîkê destpêkir, û li kolanên sereke yên navçeyê geriyan û beşdaran pankartên ku li ser nivîsîbûn “Riya we riya me ye û armanca we armanca me ye” rakiribûn.
Beşdarvan heya ber bi sahaya şehîdan meşiyan û li wê derê ji bo tevahî şehîdên azadiyê deqeyekî rêz hate girtin. Piştî wê ji aliyê rêveberiya Meclîsa Ciwanan ya navçeya Til Hemîsê Ferah El-Selman ve daxuyanî hate dayîn. Di daxuyaniyê de bêdengiya Neteweyên Yekbûyî, yên ku bi erkên xwe yên mirovî ranabin, û rê li ber sûcên dij mirovî ya Erdoxan û çeteyên wî yên hov nagirin, hate şermezar kirin.
Her wiha Ferah destnîşan kir, ewê xwîna ku şehîdan dane û soza ku bi şehîdan re hatiye dayîn, tu carî ji bîr nekin, ji ber vê jî wê hertim welatê xwe biparêzin.
Piştre rêveberê Meclîsa Ciwanên navçeya Til Hemîsê Atallah El-Selam axivî û êrîşên dagirkeriya ya dewleta Tirk, ên li ser herêmên Bakur-Rojhilatê Sûriyeyê şermezar kir. Heman demê de Atallah bal kişand ser plana pêkanîna xeyalên Osmaniyên nû ku ji holê rakirina projeya Netewa Demoqratîk hedef digire.
Atallah destnîşan kir ku soza wan daye şehîdan wê heya dawiyê jî berdewam bike. Heman demê de Atallah bang li hemû ciwanan kir ku ji bo parastina destkeftiyên şehîdan, û li dijî êrîşên dagirkeriyê ya dewleta Tirk, cihê xwe di nava qadên leşkerî de bigirin.
Herî dawî çalakiya ciwanan bi berzkirina siloganên weke “Bijî Serok Apo, Bijî Berxwedana Gerîla, Bijî Hêzên Sûriya Demoqratîk” bi dawî bû.
