NAVENDA NÛÇEYAN –
Weysî Tallî Nivîsand
Di demekê de ku artêşa tirk a êrîşên xwe li her alî dijwar dike, nikare berxwedana gelê kurd bişkîne, dîn û har bûye. Bi taybet ku li çiya li ber gurzê gerîla tarumar bû, li Rojava hewldana çeteyên wan ên DAIŞ’ê ji aliyê şervanên HSD’ê dê ve bi pêngava ‘Gurzê Gelan’ hat serobinkirin, Tirkiye ji bo vê binketinê û rojeva esasî ya PKK ji lîsteya terorê bê derxistin li her alî geşûgur bûye, bi êrîşên li ser Rojava, Mexmûr û Şengalê re dixwaze bi temamî rojeva gelê kurd bide guhertin.
Dîsa yek ji mijara din a herî girîng ku rojane êrîş û bomberdûmanên balafirên şer ên tirk li ser qadên gerîla bigotina wan ‘em rê nadin serê xwe rakin’ Komîteya Navendî ya PKK’ê bi tevlibûna 27 endaman kongreya xwe ya salan lidar xist. Piştî ragihandina vê peyamê, dewleta tirk gotin li cih be, dîn bû. Çawa dibe ku ewqas êrîş û bomberdûman tê kirin, PKK dikare bicive û civîna xwe ya salane lidar bixe.
Di demek wiha de her kêlî êrîş û faşîzm heyî li Kurdistanê civîneke wiha xwedî girîngiyeke mezin e. Ji nû ve avabûn û dîsa plansaziyên sala nû û geşkirina têkoşînê hatiye destgirtin û biryarên ku faşîzmê hilweşîne li seranserî Kurdistanê hatin girtin.
Ev yek hemû plan û êrîşên dagirkeriyê ya tirk vala derxist. Ev yek nîşan dide ku dewleta tirk li çiya windakiriye, li ber gerîla winda kiriye, li ber gelê kurd tev winda kiriye. Ev yek ji aliyê her kesê ve hat dîtin, ji bo vê mijarê binixûmîne û rojeva gelê kurd a esasî ya azadiya Rêber Apo, derxistina PKK’ê ya ji ‘lîsteya terorê’ û dîsa di qada dîplomasiyê de pêşketinên derdikevin, di serî de faşîzma AKP-MHP’ê û dîsa dewleta kûr a tirk pir tengav kir.
Bi taybet bi îlana Înîsiyatîfa Navneteweyî ya Ji Bo Kurdan Edalet ji bo derxistina PKK’ê ji lîsteya ‘Rêxistinên Terorîst’ li seranserê welatên Ewropayê kampanyaya îmzeyan ku berhevkirina 4 milyon îmze daye ber xwe ku bi pêşengiya 1003 rewşenbîr, akademîsyen, siyasetmedar, zanyar, hunermend, aktîvîstên sosyalîst ji parzêmîna Ewropa, Asya, Awûstralya, Afrîkayê jî di nav de ji 30 welatan hatibû destpêkirin îmze kir û şûnde, hem li Kurdistan û taybet bi tevlibûna kesayetên naskirî yên mafê mirovan diparêzin û xwedî xelata nobelê ne, kir ku faşîzma tirk xwe li vê ranegire û hemû qirêjî û hovîtiya wan derkeve.
Bi xurtbûna vê kampanyê re dewleta tirk a serkêşiya wê dîktatorên cêwî Erdogan-Bahçelî dike, bikevin nava lêgerînê û gelê kurd û raya giştî ya cîhanê ji vê rojevê dûr bixe, di serî de 1’ê çileya 2022’yan di serî de bi balafirên şer li Kampa Penaberan a Şehîd Rûstem Cûdî ku bi Mexmûr tê nasîn, Şengal û rojavayê Kurdistanê bi dijwarî bomberdûman kir.
Bi êrîşên li ser van her sê qadan, bi taybet jî Mexmûr û Şengal xwestin bi temamî rojeva gelê kurd ji rojeva esasî bidin guhertin. Dîsa di qada navneteweyî de kampanyaya bidin sekinandin û li gel wê bikarin li ser rojeva esasî balê bidin alî.
Taybet di demekê de ku ev kampanya xurt dibe, aliyê siyasî û dîplomasiya Tirkiyeyê tengav dike, bala cîhanê dide hovîtiyên Tirkiye, bi zanabûn û plankirî bi erêkirina DYE, NATO û hevkariya Iraq û PDK’ê li Mexmûr û Şengal, bi hevkariya Şamê jî li Rojava êrîşên bi balafiran pêk anî.
Ev aliyek aliyê din em di meha sibatê de ne ku bi komployên li ser pêşengên kurdan weke mehek reş tê zanîn di nava kurdan de û bi nêzîkbûna 15’ê Sibatê Komploya Navneteweyî ya li ser Rêber Apo re xwestin peyamek din bidin. Peyama jî, heta hûn li ber xwe bidin, em ê êrîş bikin. Heta hûn serî rakin em ê we tune bikin.
Hedefgirtina Mexmûr û Şengal jî di vê çarçoveyê de hat kirin. Mexmûr û Şengal nîşan û sembolên berxwedanê ne ku yekane cihên serî li ber zilm, zordarî û êrîşan tu carî netewandine. Di şexsê Mexmûr û Şengalê de xwestin peyam bidin hemû qadên li ber xwe didin, her cihê li ber xwe bidin, em ê lê bidin. Dîktatorên cêwî Erdogan-Bahçelî jî dizane ku êdî ev gel serî natewîne, ji ya xwe danakeve; ji bo wê tim êrîş dike, bombe li wan dibarîne.
Em divê baldar bin, armanc û hedefên van êrîşan di demek wiha de çima tê kirin? Divê zêdetir rojeva xwe ya esasî bigirin û xurttir li ser kar bikin. Jixwe em vê bikin, wê hemû êrîşên dijmin vala derbikevin. Di serî de kampanyaya ‘Dem dema azadiyê ye’ û kampanyaya ‘PKK’ê ji lîsteya terorê’ derxînin xurtir bikin û belavî her derê cîhanê bikin.
Kengî me karî van mijar û rojevên esasî xurt bikin, em ê bikarin faşîzmê û hevkarê wan têk bibin. Ji xwe êrîşên tên kirin, diyar dike ku em li ser rêya rast in, rojevên me di cih de ne û wan tengav dike. Em torên xwe yên piştevanî û dostaniya enternasyonalîst zêde dikin û her gavê tecrîd û faşîzma dîktatorên cêwî Erdogan-Bahçelî tehşîr bikin.
Dem û cih, roj û kêlî; erka esasî li pêşiya me tevan ev e. Ji xwe Komîteya Navendî ya PKK’ê jî di encamnameya xwe ya civînê de li ser van teweran sekinî û peyamên xurtkirina vê da. Ev jî nîşaneya ku ev kampanya û rojevên me faşîzma tirk tengav dike û ber bi hilweşînê ve dibe. Çiqasî em vê xurt bikin, em ê bikarin ewqasî faşîzmê li erdê bidin.
Ji bo vê li her derê, her fersend û kêliyê ji bo vê kar bikin, teqez encamên baş em ê bi dest bixin û faşîzma tirk ber hilweşînê ve kaş bikin. Ji bo vê Ewropa qadeke baş a propaganda ajîtasyonê ye. Em bikaribin baş bikar bînin em ê bikaribin qada navneteweyî, siyasî û dîplomasî de encamên xurt bigirin.
Ev yek me ji çalakî û pêngavên hatî destpêkirin dît, ji bo vê di çarçoveya kampanyaya ‘Dem dema azadiyê ye’ û ‘PKK ji lîsteya rêxistina terorê’ derbixîn, çalakiyê xwe xurtir bikin.
