WAN – Di çalakiyê de ku Platforma Saziyên Demokratîk pêşengî jê re kir, dirûşma “Bijî berxwedana Rojava” hate berz kirin û li dijî êrişên li ser Kurdan banga yekîtiyê hate kirin.
Girseya gel li Parka Kûrtûlûş li hev civiya û bi pankart û dowîzan hate qada Beşyolê meşiya.
Di meşê de ji bo berxwedana Rojava û QSD’ê dirûşmên piştevaniyê hatin berz kirin.
Parlamentera Wanê ya DEM Partiyê Gulcan Kaçmaz Sayyîgît li Qada Beşyolê axivî û anî ziman ku gelên Rojava modela jiyana bi hev re temsîl dikin. Sayyîgît destnîşan kir ku êrişên li ser taxên Şêxmeqsûd û Eşrefiyê êrişên li hemberî tevahiya gelê Kurd e.
Gulcan Kaçmaz Sayyîgît diyar kir ku li pişt êrişan dewleta Tirk û mejiyê netewe dewletê heye û got, dive Kurd li hemû parçeyan bibin yek.
Her wiha bang li hêzên navneteweyî jî kir û got, “Gelan biparêzin ne DAÎŞ’ê. Em ji vê derê bang li gelê Kurd jî dikin; yekîtiya xwe xurt bikin û ji bo destketiyên xwe rabin ser piyan.” Daxuyanî bi dirûşm û tilîliyan bi dawî bû.
