NAVENDA NÛÇEYAN- “Konferansa Aştî û Civaka Demokratîk a Navneteweyî” ya DEM Partî li Navenda Çandê ya Cem Karaca ya li Bakirkoy a Stenbolê li dar xist, bi dawî bû. Konferans bi axaftinên Parlamentera Îtalyayê Francesca Girra û Hevseroka Partiya Volt a Îtalyayê Daniela Patti bi dawî bû.
Francesca Girra ev tişt got: “Ez dixwazim piştgiriya xwe ya bi gelê Kurd û rêzdar Ocalan re dubare bikim û hêvî dikim ku ew di demeke nêz de bi rastî azad bibe. Salek berê, ligel şandeyek navneteweyî li Stenbol û Enqereyê bûm da ku daxwaza me ya serdanê bigihînim Wezareta Dadê. Dîsa di Tîrmehê de ji bo dubarekirina vê daxwazê li vir bûm, lê me encam negirt. Lêbelê, ez difikirim ku ji meha borî ve tişt bi rastî guherîne. Wekî ku peyamên ji me re hatine şandin jî îspat dikin, êdî her çend qismî be jî ne di tecrîdê de ye, lê cezayên girtîgehê yên wî û hemû girtiyên siyasî binpêkirinên mezin ên mafên mirovan in.”
‘DIVÊ EM AZADIYA WÎ BI DENGÊ BILINDTIR BIQIÎRIN’
Francesca Girra wiha pê de çû: “Niha divê em li Tirkiyeyê û li hemû welatên din ên cîhanê, soza xwe ya rastîn a ji bo aştî û demokrasiyê destnîşan bikin. Rojhilata Navîn di nava şer de ye, li Xezeyê qirkirin didome, bi ya min Ocalan di warê aştî, demokrasî, ekolojî, femînîzm û sosyalîzmê de peyamek şoreşgerî da. Tevî ku 26 sal in di girtîgehê de ye, bi ya min ev tiştek pir hêja û ronakbîr e. Di vê Sibatê de got divê PKK bê fesixkirin, ev mînakek mezin a cesaretê bû. Niha divê hemû welat wî bişopîne, piştgiriyê bide wî û piştgiriyê bide gelê Kurd. Ji bo em li her derê aştî û demokrasiyê bi dest bixin, divê em daxwaza azadiya girtiyê siyasî rêzdar Ocalan bi dengê bilind berdewam bikin.”
‘EM JI BO GOTINÊN OCALAN BIBIN WELATÊ XWE HATIN’
Hevseroka Partiya Volt a Îtalyayê Daniela Patti diyar kir ku paradîgmaya Rêber Apo dikare ji krîza Ewropayê re jî bibe pêşeng û wiha got: “Wek şandeya navneteweyî, em ên ku li vir di rêza pêş de rûniştine, em li vir in da ku piştgiriya xwe ya ji bo Tevgera Kurd nîşan bidin, lê heke rastî bê gotin, em li vir in da ku ji we îlhamê jî bigirin. Em li vir in da ku hêza gotinên rêzdar Ocalan bibin welatê xwe. Di vê rewşê de, tişta ku em li Ewropayê dibînin ew e ku tevgera konfederalîzma demokratîk ji bo me gelek girîng e; ji ber ku ev tê wateya derbaskirina netewe dewletan, vegerandina beşdariyê û vegera li cewherê. ”
DÊ ENCAMNAME BÊ AMADEKIRIN
Konferans piştî axaftinan bi dawî bû. Hat diyarkirin ku piştî berhevkirina notên li konferansê hatine girtin dê encamnameyek bê amadekirin û piştî du rojan bi raya giştî re bê parvekirin.
