NAVENDA NÛÇEYAN – Rêber APO bi peyameke konferansa Dayikên Aştiyê silav kir û wiha got, “Hûn divê li rex nasnameya xwe ya dayîkbûnê di heman demê de bi nasnameya jina azad û hişmendiya xwe re têbikoşin.”
Meclisa Dayikên Aştiyê, piştî 12 salan bi dirûşmeya “Dayîk pêşengên civaka demokratîk û aşîtîyek mayînde ne” 3’yemîn konferansa xwe li ÇandAmedê li dar dixe. Ligel Dayikên Aştiyê, Tevgera Jinên Azad (TJA), rêxistinên DEM Partî û DBP’ê yên bajêr û navçeyan, hevşaredar, parlementerên DEM Partiyê û rêxistinên civaka sivîl beşdarî konferansê bûn. Li salona konferansê posterên Rêber Apo hatin daliqandin û wêneyên dayikên aştiyê yên jiyana xwe ji dest dane hatin daliqandin. Konferans dê du rojan bidome.
Paşê peyama Rêber Apo a ji bo konferansê hat şandin, hat xwendin. Peyama Rêber Apo bi vî rengî ye:
“Ez herî zêde ji dayika xwe rastiya jiyanê, sebrê hîn bûm, lê herî zêde jî sekna rast ya serbilind.
Ez, dayikên aşitiyê ku xwediyê vê sekna serbilind û rûmet in silav dikim û ji bo konferansa we serkeftinê dixwazim.
LI REX NASNAMEYA XWE YA DAYÎKBÛNÊ DIVÊ BI NASNAMEYA JINA AZAD Û HIŞMENDIYA XWE TÊBIKOŞIN
Jin çawa bixwaze divê wiha bijî, lê divê cesareta wan ya ji bo jiyaneke azad jî hebe. Min rêzgirtina xwe ya ji bo jinan li ser rêgeza ‘divê azadî bi ramanê dest pê bike’ ava kiriye.
Hûn wek dayikên aştiyê yên ku parastina jiyanê û berxwedana aştiyê di qadên herî pêş de dikin, her wext di tekoşîna azadî û aştiya me de di qadên herî pêş de cih girtiye. Helbet wek dayîk cihên we di berxwedana me de bênîqaş e. Lê belê, ez di vê baweriyê de me ku divê ew qalibên jinbûn û dayikbûnê ku civaka kevneşopî ferz dike bên bin şikandin. Hûn divê li rex nasnameya xwe ya dayîkbûnê di heman demê de bi nasnameya jina azad bi hişmendiya xwe re têbikoşin. Ev erdnîgariya ku yekem car civaka dayiksalar lê derketiye di heman demê de cihê nakokî û pirsgirêkên civakî yê yekem e. Kolekirina jinê û kolekirina civakê bi hev re dimeşe. Berevajiyê fikra ku tê zanîn kolebûn ne bi derketina dewletbûnê, lê bi kolekirina jinan dest pê kiriye.
RÊYA DERKETINA JI PIRSGIRÊKAN AVAKIRINA JIYANEKE KOMUNAL Û DEMOKRATÎK E
Ev nakokî û pirsgirêkên civakî ku qewimîne çavkaniya pirsgirêkên ku îro em dijîn pêk tînin. Rêya derketina ji vê pirsgirêkê bi hev re avakirina jiyaneke komunal û demokratik e.
Banga me ya ji bo aştî û civakeke demokratik ku me di 27’ê Sibatê de kir, erk û berpirsyariyekê li ser tevgera jinan û dayikên aştiyê bar dike. Serdemeke nû dest pê dike.
Rêxistinkirina jiyaneke sosyalîst li ser bingeha pergala komunal a demokratik dê bi aştiyê pêkan be. Li ser vî esasî ez hemû dayikên aştiyê silav dikim û di xebatên wan de serkeftinê dixwazim.
Abdullah Ocalan”
Konferans dê bi axaftinan bidome.
