NAVENDA NÛÇEYAN – Civîna 4’emîn a Komîsyona Hevgirtina Neteweyî, Xwişk-Biratî û Demokrasiyê bi dawî bû. Komîsyon wê sibê Dayikên Aştiyê û Dayikên Şemiyê guhdarî bike.
Civîna 4’emîn a Komîsyona Hevgirtina Neteweyî, Xwişk-Biratî û Demokrasiyê ya ku ji bo çareserkirina pirsgirêka Kurd li Meclîsê hatiye avakirin, bi dawî bû. Civîna ku bi rûniştinekê bi dawî bû ji sazî, komele û xizmên kesên ku di dema şer de jiyana xwe ji dest dane guhdarî kir.
Wezîra Malbat û Xizmetên Civakî Mahinur Ozdemir Goktaş a ku bi vexwendinê beşdarî civîna komîsyonê bû, pêşkêşiyek kir. Komîsyonê nûnerên weqf û komeleyan guhdarî kir: “Nûnerên Komeleya Gaziyên Şer a Tirkiyeyê, Komeleya Jinebiyên Şehîd û Sêwiyan, Weqfa Gaziyên Şer û Malbatên Şehîdan a Tirkiyeyê, Weqfa Hevgirtina Xizmên Şehîdan û Gaziyên Şer a Tirkiyeyê, Komeleya Gaziyên Teşkîlata Wazîfeya Ewlehiyê, Weqfa Malbatên Şehîdan û Dayikên Diyarbekirê.”
Civîna 5’emîn a komîsyonê wê sibê pêk were û wê nûnerên Dayikên Şemiyê, Dayikên Aştiyê, Weqfa Maf, Azadî û Alîkariya Mirovî (ÎHH), Komeleya Mafên Mirovan (ÎHD), Komeleya Mafên Mirovan û Hevgirtina bi Mazluman re (MAZLUM-DER) û Weqfa Mafên Mirovan a Tahir Elçî guhdarî bike.
Civîna ku ji aliyê Serokê Meclîsê Nûman Kurtulmuş ve tê birêvebirin, wê sibê saet 14:00’an de dest pê bike. Tê payîn ku civîna sibê wê ji du rûniştinan pêk were.
