NAVENDA NÛÇEYAN- Cenazeyê Nûreddîn Sofî ku di 6`ê Nîsana 2021`an li herêma Garê şehîd bûbû û duh (11`ê Tebaxê) ji aliyê Navenda Çapemenî û Ragihandinê ya HPG`ê ve şehadeta wî hatibû ragihandin, ji Dêrikê anîn Qamişloyê.
Karwanê cenazeyê Fermandar Nûreddîn Sofî li ber bend ketina bajarê Qamişlo de, bi girseyekê ji aliyê pêkhateyên herêmê ve hate pêşwazîkirin.
BI DEH HEZARAN KES TEVLÎ MERASÎMÊ BÛN
Cenazeyê Fermandar Nûreddîn Sofî bi dirûşmeya “Şehîd Namirin” û li ber strana Hunermendê Kurd Mihemed Şêxo ya bi navê “Ay Gewrê” li ser milan hate rakirin.
Karwanê cenazeyê ku ji sedan seyareyan pêk dihat, derbasî nava kolanên sereke yên bajarê Qamişlo bû û berê xwe da mizgefta Qasimo ya li taxa Xerbî li bajarê Qamişlo.
Piştre ji bo pêkanîna merasîmê oxirkirinê karwan berê xwe da Stada Şehîdên 12`ê Adarê. Bi deh hezaran pêkhateyên Herêma Bakur û Rojhilatê Sûriyeyê, ji bajarê Dêrikê heta Kobanê beşdarî merasîmê bûn. Di merasîmê de fermandarên Yekîneyê Parastina Gel (YPG), Yekîneyên Parastina Jin (YPJ) û Hêzên Sûriyeya Demokratîk (QSD) û Hevserokên Rêveberiya xweser û Nûnerên Rêveberiya Xweser hazir bûn.
Welatî, jin, ciwan û dayik bi rakirina wêneyên Fermandar Nûreddîn Sofî derbasî cihê merasîmê bûn. Li kêlek wê bi dehan dezgehên çapemaniyê li qada merasîmê amade bûn.
Merasîm bi toreneke leşkerî ji aliyê Yekîneyê Parastina Gel (YPG), Yekîneyên Parastina Jin (YPJ) û Hêzên Sûriyeya Demokratîk (QSD) ve dest pê kir.
MAZLÛM EBDÎ: EM MINETDARÊ HEVAL NÛREDDÎN SOFÎ NE
Fermandarê QSD’ê Mazlûm Ebdî di merasîma Fermandar û Pêşengê Şoreşa Rojava Nûreddîn Sofî de axivî û got: “Gelê Bakur û Rojhilatê Sûriyê ji ber keda heval Nûreddîn Sofî ya di şoreşê de minettarê wî ye. Em di hizura şehîdan û gel de soz didin ku em ê ala te hildin.”
Fermandar Mazlûm Ebdî diyar kir ku heval Nûreddîn Sofî di salên 90’î de beşdarî şoreşê bû, berî 35 salan dest bi şoreşê kir û li ser wî esasî xebatên xwe meşandin.
Mazlûm Ebdî got: “Heval Nûreddîn li her çar parçeyên Kurdistanê têkoşiya. 24 salan tevayî çiya û parçeyên Kurdistanê geriya û ew nas kirin. Di nava gerîlla de giha astên herî bilind. Îro çiyayên Kurdistanê gerîlayên li wan çiyayan heval Nûreddîn weke şervan û fermandarek bi cesaret nas dikin.
Heval Nûreddîn piştî 24 salan li çiyayê Kurdistanê bi herfên zêrîn navê xwe neqişand. Li ser xwesteka hevalên wî, li ser xwesteka me hemûyan 2013 tevlî şoreşa Rojava bû heta şehadeta xwe. Di tevayî saziyên şoreşê de keda heval Nûreddîn heye. Di şoreşê de bi navê Adil xebat da meşandin”.
‘JI REQA HETA DÊRAZORÊ FERMANDARÎ KIR’
Mazlûm Ebdî anî ziman ku hemû hevalên li Rojava ew weke pêşengek nas kirin û wiha domand: “Keda wî di hemû saziyên me de heye. Di zansita gel de, di biratiya gelan de kedek wî ya mezin heye. Sala 2017’an bi awayek xurt tevlî şerê dijî DAÎŞ’ê bû. Heval Nûreddîn di hemû operasyonan de cih girt ji Reqa heta Dêrazorê fermandarî kir. Li Baxozê fermandarê wê cengê bû.”
‘LI HER QADÊ BANDORÊ WÎ HEYE’
Mazlûm Ebdî têkoşîna Fermandar Nûreddîn a di Berxwedana Serdemê de bi bîr anî û wiha got: “Li wir hêza me rêve dibir. Heta dawî Berxwedana Serdemê bi rê ve bir. Em dikarin bêjin şoreşa Rojava Bakur û Rojhilatê Sûriyê di tevayî ast û qadên wê de heval Nûreddîn hebû. Kedeke xwe ya mezin hebû. Ji bo wê em dibêjin Şoreşa Bakur û Rojhilatê Sûriyê minettarê heval Nûredddîn e. QSD, xebatên siyasî minetdarên heval in. Pêşketina tifaqa gelan minettarê heval Nûreddîn e. Ji ber ku pêşengî kir, bi her kesî re di têkiliyan de bû. Bi Ereban re Ereb bû, bi Kurdan re Kurd bû, bi Suryanan re Suryan bû. Vê jî serkeftin ji Şoreşa Rojava re anî.”
Mazlûm Ebdî got: “Em careke din dibêjin, dê xebata me bidome. Îro em piştî 14 salên şerê dijwar di pêvajoyeke diyalogê. Şehîdên me xwîna xwe rijandin. Em dixwazin bi encam bikin. Em di hizûra şehîdan de soz didin, çawa me xebata li dijî DAÎŞ’ê da meşandin, em ê vê xebatê jî bidomînin. Dê xwîna şehîdan vala neçe. Îro dê QSD, saziyên me ku heval Nûreddîn têde cih girt, di Sûriyeya nû de cih bigirin. Çawa ku gelê me li cem şehîdên xwe û hêzêne xwe cih girt dê îro jî li gel wan cih bigire. Çawa ku hevalên me bi qehremanî ev şer dan meşandin, niha jî dê vê pêvajoyê bimeşîne. Em hêvîdarin ku çawa gelê me di pêvajoya şerê li dijî DAÎŞ’ê de piştgirî da QSD’ê, dê niha jî bi heman awayî piştgiriyê bide”.
PEYAMA JI BO GELÊ EREB
Fermandar Mazlûm Ebdî bi zimanê Erebî bang li gelê Ereb ê beşdarî merasîmê bibûn kir û got: “Baweriya heval Nûreddîn bi hevgirtina gelan hebû û di wê rêyê de têkoşiya. Têkiliya wî bi gelê Ereb re xurt bû û hêzên me yên Ereb pir jê bawer bûn. Ew yek ji hevalên destpêkê bû ku pêkhate di nava Rêveberiya Xweser de bicih kir. Em bi hevalê xwe serbilind in”.
Mazlûm Ebdî gotinên xwe wiha bi dawî kir: “Em di hizûra we, şehîdan de dibêjin şoreşgerê mezin fermandarê hêja, rêheval Adil, rêheval Nûreddîn Sofî em bi te serbilind in, hevalê te û gelê te bi te serbilind in. Bila rihê te şand be. Tu caran bila çavê te pişt nemîne em hevalê te gelê emê ala te hildayî hildin. Em soza serkeftinê didin. Oxirbe hevalê delal Nûreddîn oxirbe ey şehîd.”
