TÎŞRÎN- Tevî hemû êrîşên dewleta Tirk a dagirker ji 8’ê Kanûnê û vir ve, şervanên QSD, YPJ û YPG’ê li tunelên şerê Tişrînê berxwedaneke bêhempa û destanî nîşan didin.
Şervanê YPG’ê Nîdal Egîd û şervanên YAT’ê Kawa û Şoreş di tunelên şerde berxwedaniya ku li dijî êrîşên dewleta Tirk a dagirker û çeteyên wê pêşdikeve nirxandin û diyar kirin ku ew di berxwedana parastina xak û gelên Bakur û Rojhilatê Sûriyê de israr dikin.
Şervanan di axaftinên xwe de behsa berxwedana dîrokî ya Tişrînê jî kirin û banga xwedîderketina li berxwedanê û hilanîna tola şehîdan kirin.
Di dawiyê de şervanan bang li ciwan û jinên ciwan kirin ku tevlî nava refên QSD û YPJ’ê bibin.
Şervana YGP’ê Nîdal Egîd jî diyar kir ku ew li dijî her cure êrîşên dewleta Tirk a dagirker parastina gel û axa xwe dikin û got, “Ez weke şervaneke ku di nava refên Yekîneyên Parastina Gel de ji bo ku vî gelî biparêzin, nirx û dîroka vî gelî biparêzin li dijî dijmin şer dikim.”
Şervanê YPG’ê da zanîn ku moral û berxwedana rêhevalên li vir encama fêkiyên ku van gelan çandiye û got, “Têkoşîna me ne tenê di bendavan de ye, em gerîlayên qehreman ên li çiyayan de bi awayekî bênavber li ber xwe didin, mînak digirin. Ji ber vê yekê em li vir ji bo parastina gelê xwe li ber xwe didin.”
Nîdal Egîd, bang li hemû ciwan û jinên ciwan ên ku dikarin çekan hilgirin, ji bo parastina gelê xwe di eniya şer de cih bigirin û got, “Dijmin ji yekitiya me ditirse, lewma dema em li aliyekî bin weke Ereb, Kurd, Aşûrî û pêkhateyên din ên herêmê wê herî zêde dijmin bitirsîne. Em dixwazin îro jî weke berê di nava gel de berdewam bike. Weke gelên herêmê, divê em çawa ku hevre jiyan dikin, hevûdu bi hev re jî biparêzin. Banga min ji hemû ciwan û jinên ciwan ên herêmê re ew e ku ji bo parastina herêm, ax, nirx û dîroka xwe tevlî nava refên QSD û YPJ’ê bibin.”
Şervanê YAT’ê Şoreş da zanîn ku bi hemû çekên xwe yên giran, keşf û balafirên şer li dijî dewleta Tirk a dagirker li ber xwe didin û got, “Em soza xwe ya bi gelê xwe, hevrê û şehîdên xwe re dubare dikin.”
Şervanê YAT’ê Kawa diyar kir ku ax namûs û şeref e û got, “Em Kurd in, serê me hişk e û em serbilind in, divê dewleta Tirk a dagirker vê fêm bike, em dest ji axa xwe bernadin.”
Şervanê ku bang li hemû gelê Kurdistanê kir ku ji bo tolhildana şehîdan û gelê xwe tevlî şer bibin û got, “Em weke şervan ji bo gelê xwe amade ne ku xwe feda bikin. Weke zarokên vî gelî em niha li ber xwe didin. Di vî şerî de li dijî pergala dagirker a Tirk, li dijî faşîzma Tirk cihê xwe girtin. Dewleta Tirk a dagirker li Efrînê, Serêkaniyê û herî dawi jî Şehbayê çî anî ser gelê me hemûkes dît. Divê em haddê wî bidinê.”
Şervanê YAT’ê Kawa silav li gelê beşdarê berxwedana Bendava Tişrînê kir û daxwaza serkeftinê kir û got, “Em hêvîdar in ku gel vê têkoşînê bidomîne da ku xwîna şehîdên me bê tol nemîne. Weke şervanên YAT’ê em amade ne. Ji bo ku êdî dayikên me negirîn, bila her kes bi coş be. Her kes têkoşîna dîrokî ya li Tişrînê dibîne.”
