NAVENDA NÛÇEYAN – Li Bakur û Rojhilatê Sûriyê parastina şoreş û civakê li hemberî dagirkeriyê bi rêya stratejiya şerê gelê şoreşgerî tê bi rêxistin kirin. Tê de divê hemû beşên civakê ji bo şer amade bin da ku xwe bi xwe warê xwe biparêzin.
Ciwanên Dêrazor û Tebqa li ser şerê gelê şoreşgerî û rola pêşeng a ciwanan bi Ajansa Nûçe Ciwan axivîn. Ciwanan diyar kirin ku divê ciwan rolekî sereke di parastin û pêşxistina civakê de bilîzin.
LI TEVAHÎ CÎHAN CIWAN PÊŞENGÊN ŞOREŞÊ BÛN
Mihemed El-Samir, Hevserokê Meclisa Ciwanan a Partiya Sûriyeya Pêşerojê ya Dêrazor wiha got: Bê gûman, me dît ku hemû şoreşên ku li Rojhilata Navîn û li tevahî cîhanê derketine, ji cewherê ciwanan in û me dît ku şoreşên weke şoreşê Vîetnamê, şoreşa Fransî û şoreşa Cezayîrê bi pêşengiya ciwanan pêk hatin. Ciwan bingehê civakê ne. Bi destên ciwanan wê guhertin di nav civakê de çêbibe, ciwan ew in ku pêşerojê ava dikin.
ÇARESERÎ FIKIRÊ RÊBER APO YE
Weke Rêber Apo got “Me bi ciwantî dest pê kir û emê bi ciwantî bi serbikevin”. Ciwan dikarin civak ji hemû bê edaletî, desthilatdarî û qirkirin rizgar bikin. Erkê me ye ku di warê fîzîkî, fikirî û eskerî amade bin li gorî stratejiya şerê gelê şoreşgerî da ku em planên dijminên gelê me têk bibin. Ew planên dewletên dîktatorî ku dixwazin civaka me bixin bin kontrolê xwe ne. Çareseriyê ji bo têkbirina van planan fikir û felsefeya Rêber Apo û netewa demokratîk e, ku edalet û wekhevî diparêze. Pêwîst e em Rêber Apo fîzîkî azad bikin, Rêber Apo her tiştên xwe feda kir ji bo azadiya gelan, ji ber wê dewletên desthilatdar wî qebûl nekirin. Divê em li hemberî van rejîmên dîktatorî û modernîteya kapîtalîst têbikoşin da ku em azadiya civakê bi dest bixin.
ŞER BERPIRSIYARIYÊ CIWANAN E
Muhanad El-Yusef, endamê Desteya Ciwan û Werzîş a Tebqayê, wiha got: Îro ez ê behsa Şerê Gel ê Şoreşgerî û rola ciwanan di Şerê Gel ê Şoreşgerî de bikim ji ber ku wek me dît, hemû şer bi ciwanan re girêdayî ne, şer berpirsiyartiya ciwanan e, ji ber ku ciwan xwedî enerjî û zindîbûn in. Di nav civakê de ciwan wek beşê herî saxlem û bi mînak tên dîtin. Di şer de jî, ciwan yên herî bi hêz in û ku dikarin civak û welatê xwe biparêzin. Ji ber ciwan zindîbûna civakê îfade dikin rolekî serekî di nav şerê gelê şoreşgerî de dilîzin. Ciwan jî beşê herî mezin ê civakê, ango beşê herî xurt ê civakê ne, enerjî û zindîbûn didin civakê, û dikarin guhertin di civakê de çêbikin da ku şoreşê bi serbixin.
JI BO ŞERÊ GELÊ ŞOREŞGERÎ RÊXISTINBÛN PÊWÎST E
“Em wek ciwan divê em enerjiya xwe bikarbînin ji bo em civakê ava bikin û şoreşê di herêmê serkeftî bikin. Em dibînin pir ciwan niha waxtê xwe û enerjiya xwe bi medyên dîjîtal xerc dikin û zanebûna xwe û ramanên xwe pêşnaxin. Kesayetên zayîf derdikevin holê. Em wek ciwanên herêmê û wek ciwanên şoreşger divê em ramanên xwe pêşbixin da ku em şoreşê bi serbixin. Erk dikeve ser me, ciwan, ku di serî de malbata xwe bi rêxistin bikin û piştre civakê bi rêxistin bikin ji bo şerê gelê şoreşgerî, ji ber ji bo pêkanîna şerê gelê şoreşgerî rêxistinbûn pêwîst e. Bi rêxistinbûn em dikarin civak û ciwanan pêş bixin. Em banga ciwanan dikin ku tevlî perwerdeyên me yên bîrdozî bibin, ramanên xwe berfirehtir bikin û fikir û felsefeya Rêber Apo nas bikin, ji ber bi xwe pêşxistin, pêşxistina ciwanan û bi naskirina fikir û felsefeya Rêber Apo em dikarin şerê gelê şoreşgerî bidin meşandin.”
