NAVENDA NÛÇEYAN – 1’ê Mijdarê roja cîhanî ya Kobanê ji bo bîranîna berxwedana leheng a gelê Kurd û hêzên YPG û YPJ’ê yên ku têkoşîna wan bû sedema têkçûna çeteyên DAIŞ’ê ye. Berxwedana Kobanê xwe wekî dîrokekî ji tîpên zêrîn di nava rûpelên mirovahiyê de nivîsand û bandora xwe li hemû cîhanê kir. Cîhan bi Kobanê re berxwedana leheng a têkoşîna azadiya Kurdistanê û şoreşa Rojava nas kir.
Gelê Kurd bi Kobanê re nîşanî tevahî cîhanê da ku bi yekîtiya xwe ya neteweyî û berxwedana xwe ya fedayî li hemberî hemû zehmetî û êrîşan xwedî hêz e. Yek ji kesên ku di vê berxwedana bi heybet de cih girt jî fermandara YPJ’ê Sorxwîn Cûdî ye ku ji Rojhilatê Kurdistanê tevlî berxwedana Kobanê bû. Derbarê roja cîhanî ya Kobanê de Sorxwîn Cûdî ji ajansa me re axivî.
Sorxwîn diyar kir ku hîna ji destpêka berxwedanê de DAIŞ bi bin ket, ji ber ku di Kobanê de rihê netewî û hestên welatparêziyê xwe ji destpêkê de dan der û vê jî DAIŞ di aliyê manewî de têk bir.
Bi temamî axaftina fermandara Yekîneyên Parastina Jin YPJ’ê Sorxwîn Cûdî bi vê rengî ye;
“Di serî de em roja cîhanî ya Kobanê li Rêberê Rêberan Rêber Apo pîroz dikin. Yê ku ji mirovahiyê re dîsa fikrên azad ava kir û bi pêş xist Rêber Apo ye. Em roja cîhanî ya Kobanê li tevahî têkoşînvan, şervan û gelê bindest ku ji bo azadiyê têkoşîn dikin pîroz dikin.
BERXWEDANA NETEWÎ
Kobanê di dîroka Rojavayê Kurdistanê de girînge, ev girîngiya wê jî bi berxwedana ku hatî meşandin derdikeve pêş. Berxwedana ku di Kobanê de hatî meşandin berxwedanekî netewî bû, ji ber vê jî 1’ê Mijdarê bû roja cîhanî ya Kobanê. Kobanê ji bo tevahî mirovahiyê weke kûpriyekê ye, û bû dergûşa mirovahiyê. Di serxistina şerê Kobanê de rola ciwanan a ji her netewê hebû. Gotina Serokatî ku dibêje “Me bi ciwantî destpêkir, emê bi ciwantî jî serbikevin” xwe di berxwedana Kobanê de da der. Di Kobanê de du xet derketin pêş, xetek jê xeta DAIŞ’ê barbar û xetek jî xeta fedayîtiyê bû.
HESTÊN WELATPARÊZÎ
Di vê berxwedanê de hestên welatparêziyê hem di jin, ciwan û hem jî di tevahî civakê de derket pêş. Li pêşiya herkesî tenê du biryar hebûn, an welatê xwe terk bike û xwe teslîm bike an jî wê bimîne û li berxwe bide. Lê belê piraniya wan riya berxwedan û azadiyê ji xwe re hilbijartin û di wê oxirê de jî şehîd bûn. Mirov dikare bêje Kobanê bi hêsanî nehatî bi dest xistin, Kobanê bi xwînê hatiye şûştin. Kobanê bi pêşengên weke Arîn Mîrkan, Rêvan Kobanê û Egîdan hat bi ser xistin. Herkesî digot ji vê berxwedanê em gav paş de navêjin, gav paş de avêtin îxanet e.
DAIŞ BI BIN KET
Pêvajoya destpêkê ku DAIŞ di Kobanê de şikestî ez bi xwe weke destana Sersûrî bi nav dikim, pêvajoya duyemîn şikandina DAIŞ’ê jî di pêşxistina xeta Rêvanan de bû. Şikandina sêyemîn jî xeta Arîn Mîrkan, Rojhat û Egîdan e. Bi baweriya fikrên azad bi ser dijmin de çûn û xwe teqandin. Di vê demê de DAIŞ bi bin ket. DAIŞ di aliyê manewî de ji zû de li hember berxwedana gelê Kurd û netewên din ve şikest. Di Kobanê de rihê netewî li pêş bû.
LI RUXMÎ DERFETÊN KÊM, LÊ ME ŞER BI SER XIST
Di rizgarkirina Kobanê ji DAIŞ’ê de rola ciwanên Bakur zêde bû, mirov nikare viya înkar bike. Li ruxmî ku wê demê di destê me de ewqas derfet nîn bû, me bi destên vala berê xwe dida tangan, bi bombeyekê em bi ser de diçûn, lê tenê tiştek me hebû ew jî îradeya me ya ji pola bû. Bi vê rihê herkesî berê xwe dida nava vê berxwedanê. Ev rih jî rihê azadiyê ye, ew rihê ku li Kobanê derketî îro li tevahî Kurdistanê belav dibe. Ev rih jî rihê gerîlayên Kurd bû. Mirov dikare bêje têkoşîna 40 salî di Kobanê de bi encam bû. Bi rihê wan şoreşgerên Kurd bû ku îro jî li çiyayên Kurdistanê şer dikin e. Bi rihê Baz Mordeman bû, ku kêlî bi kêlî bê navber di Kobanê de şer kir, Kobanê radestî gelê wê kir û piştre jî berê xwe dayî çiyayên Kurdistanê bû.
HETA NEFESA DAWÎ BERXWEDANÎ
Li çiyayên Kurdistanê jî li hember şerê bê exlaqî, çekên qedexe li berxwe dide. Ev dewleta hêza wî nîne ku were sîng bi sîng şer bike, serî li rêbazên hovane da. Şehîd Baz Mordem çawa di Kobanê de şer kir û DAIŞ bi bin xist, bi eynî rihê li çiyayên Kurdistanê jî şer kir. Heta nefesa xwe ya dawiyê berxwedaniyeke bê hempa da meşandin, dev ji têkoşîna xwe berneda û di çeperên xwe yên şer jî bi vê rengî pêşengtî kir.
DAGIRKER LI BER RIHÊ BAZ MORDEMAN BI BIN KETIYE
Rihê 1’ê Mijdarê rihê Baz Mordema ye. Ev rih binkeftina dewleta Tirk dide nîşan danê. Eger rastî jî Tirkiyê xwe weke dewlet dibîne, wê wisa şer nede meşandin û çekên kîmyawî li dijî ciwanên Kurd bikarneyîne. Hêza wî ya şerkirinê nîne, bi riya teknîka sedsala 21’an û bi riya hevkar û nokeran êrîşî gerîla dike. Ev nêzkatiyê Tirkiyê jî nîşan dide ku li hember rihê Baz Mordem û rêvehevalên wê ve bi binketiye.”
NC// Baran Mawa
