“Di dîrokê de malbata Barzanî tim xiyanet kiriye, kes nikare vê veşêre”

ROJHILAT –  Endamê Koordînasyona Komelgeha Ciwanên Rojhilat (KCR) Tolhildan Zîlan li ser bûyer û pêşketinên dawî yên li Kurdistanê ji Ajansa me Nûçe Ciwan re axivî. Zîlan bal kişand ser astengiyên li pêşiya destkeftiyên gelê Kurd û xiyaneta malbata Barzanî.

Zîlan destnîşan kir ku di dîroka gelê Kurd de tim êrîş li ser Kurdan bûye û got: “Dijminên gelê Kurd xwestiye gelê Kurd qir û tine bikin. Tim xwestiye Kurdan bê maf bihêlin. Lê tevî her tiştî jî gelê Kurd di dîrokê de li ber xwe daye, nasname û çanda xwe parastiye. Ti demê dagirkerî û mêtingeriya li ser xwe jî qebûl nekiriye.”

Tolhildan Zîlan anî ziman ku di serdsala 20’an de Kurdistan hate parçekirin û li ser Tirkiye, Sûriye, Îraq û Îranê hatiye parçekirin. Zîlan got: “Gelê Kurd li her çar parçeyan jî dev ji xebata xwe nedaye. Di roja îro de destkeftiyên li Başûrê û Rojavayê Kurdistan bi saya vê têkoşînê pêk hatiye.”

Zîlan qala xeta xiyanetê jî kir û wiha domand: “Tevî ewqas berxwedan û têkoşîna tê kirin jî xeta xiyanetê jî tim derketiye pêş. Xeta xiyanetê kiriye ku têkoşîna ku tê kirin negihêje armancên xwe. Meşandina siyaseta şaş a li gel dijmin kiriye ku îro em bibin hezar parçe. Ji bo wê pêwîste her ferdekî Kurd êdî baş vê siyaseta dijmin a dagirker fêm bikin. Êdî divê em bikarin dawî li vê xeta xiyanetê bînin ya ku li pêşiya azadiya Kurd dibe asteng.”
Zîlan da xuyakirin ku divê ciwanên Kurd nekeve wê xefletê ku pirsgirêka Kurd çareser nabe. İro gelê Kurd xwedî raman, îdeolojî û destkeftî ne.

Zîlan bal kişand ser xiyaneta Barzanî û wiha pêde çû: “Ji bo vê ji bo ev destkeftî ji dest nece, karê me yê yekem em li pêşiya xeta xiyanetê rawestin. Xeta xiyanetê bi hemû rengî red bikin. Di dîrokê de malbata Barzanî tim xiyanet kiriye, kes nikare vê veşêre. Ji şoreşa Qazî Muhemed bigire heta niha bi belge xiyaneta wan eşkere ye. Yên li pêşiya xebata Qazî Muhemed û têkoşîna wî bûn asteng her Barzanî û rêxistinên girêdayî wê bûn. Ma kes dikare bêje ev nerast e? Bi sedan belge li ser vê yekê heye.

Başûrê Kurdistanê dema Şoreşa Eylûlê de xwedî hêzekî 150 hezar pêşmerge bû, gel çi bû sedem ku çek dane? Hinek ji pêşmergeyên wê demê xwe kuştin, hinek teslîm bûn gelo ev ne xiyanet e li hember vîna milyonan kesî? Ya îro li Heftanîn û Xakûrkê tê kirin mîna salê 31’ê Adarê ya li dijî YNK’ê bû. Niha jî pêşiya dagirkeriya Tirk ketine û tînin xaka Başûr dagir dikin. Her heman malbat bû li Şengalê xiyanet li Êzidiyan kirin ku bi hezaran hatin qetilkirin. Her ev bûn ku bi kolana xendekan Başûr û Rojava kirin du parçe.”

Tolhildan Zîlan herî dawî bang li gelê Kurd kir ku li dijî xeta xiyanetê bibin xwedî helwest û êdî rê nedin xiyanetê.