RIHA – Endamê Komîsyona Girtîgehan a ÎHD’ê Parêzer Mûstafa Vefa diyar kir ku 14 girtiyên li girtîgeha T1, T2 ên Rihayê û Girtîgeha Tîpa T a Sêwregê 112 roj in di greva birçîbûnê de ne, li ber mirinê ne û got: “Êdî saniye jî pir girîng in.”
Li Girtîgeha Jimare 1 a Tîpa T û Girtîgeha Jimare 2 a Tîpa T a Rihayê û Girtîgeha Tîpa T a Sêwregê Sinan Çiçek, Ali Erden, Rıza Yuksekbag, Muhammed İlgun, Enver Kanmaz, Ugur Togyildiz, Selman Buyuktop, Omer Kaya, Mahmut Ongor, Sabiha Onder, Sunay Yaman, Sozdar Çiçek, Ayten Tikit û Serhat Yildiz ji 5’ê Çileyê ve di greva birçîbûnê de ne û her diçe rewşa wan xirabtir dibe.
‘NIKARIN LI SER PIYA BISEKININ’
Endamê Komîsyona Girtîgehan a Komeleya Mafên Mirovan (ÎHD) û Rêveberêê Şaxa ÎHD’a Rihayê Parêzer Mûstafa Vefa, diyar kir ku rewşa 14 girtiyên 112 roj in xirab e. Vefa, diyar kir ku hin girtî nikarin li ser piya bisekin, tiştek nayê bîra hinan û ji devê hinan jê jî xwîn û nikarin baixivin. Vefa, diyar kir ku girtî pir zihîf bûne.
‘HEFTÊ CAREKÊ TÊN KONTROLKIRIN’
Vefa, anî ziman ku herî dawî 6 roj berê çûne girtîgehan û hevdîtin bi girtiyên ji 5’ê Çileyê ve di greva birçîbûnê de ne kirine û got: “Hîn jî girtî bi awayekî rêk û pêk nayên kontrolkirin. Em tim ji îdareya girtîgehê re dibêjin, lê belê hîn jî ti gav neavêtine. Divê her roj tenduristiya wan bê kontrolkirin, lê belê girtî diyar dikin ku heftê carekê tên kontrolkirin.”
’10 ROJ IN ŞEKIRÊ WAN NEHATIYE KONTROLKIRIN’
Vefa, anî ziman ku dawiya hefteyê bi tu awayî nayên kontrolkirin û girtîgeh wekî hincet diyar dike ku bijîşk tune ne. Vefa, bilêv kir ku wexta tenduristiya girtiyan tê kontrolkirin jî baş nayê kontrolkirin û got: “Mesela li gitîgeha jimare 1, 10 roj in şekirê girtiyan nehatiye kontrolkirin.”
TIŞTÊN AVÎ NADIN WAN
Vefa, destnîşan kir ku hefteyeke îdareya girtîgehê tiştên avî ku girtiyan ji kantînê kiriye nade wan. Vefa, got: “Bivê nevêya grevên birçîbûnê vîtamîna B ye. Divê rojê du caran bê dayîn, lê belê carekê tê dayîn. Roj heye qet nayê dayîn.”
Her wiha Vefa, destnîşan kir ku ji bo girtî dev ji grevê berdin bijîşk, derûnas û gardiyan bis er girtiyan de diçin û tahdê li wan dikin.
LI BER MIRINÊ NE
Vefa, da zanîn ku girtiyê bi navê Selman Buyuktop bi zorê ji Girtîgeha Jimare 2 a Rihayê sewqî Girtîgeha Jimare 1 a Rihayê hatiye kirin. Vefa, anî ziman ku Buyuktop 112 roj in di greva birçîbûnê de ye û rewşa wî qet nebaş e, nikare bi tena serê xwe bimeşe, nikare biçe tuwaletê û têkeve xew. Vefa, anî ziman ku li Girtîheja Jimare 2’yan jî Ûgûr Togyildiz jî li ber mirinê ye, êdî tiştek nayê bîra wî û pir zihîf bûye. Vefa, diyar kir ku Sabîha Onder ku 112 roj in di greva birçîbûnê de ye tim xwîn ji deva tê û nikare bimeşe. Vefa, anî ziman ku li Girtîhega Jimare 1 jî girtiyê bi navê Alî Erden êdî nikare bimeşe, girtiyê bi navê Omer Kaya jî li canê wî pirzik çêbûne, canê wî tim dixurê û gurçikên wî xera bûne.
‘SANIYE JÎ GIRÎNG IN’
Vefa, destnîşan kir ku rewşa girtiyên ji 5’ê Çileyê ve di greva birçîbûnê de ne her diçe xirabtir dibe û got: “Her cara em diçin girtîgehê em dibînin ku bi zorê dimeşin. Hin jê nikarin werin cihê hevdîtinê. Ên tên jî me êdî me nas nakin.” Vefa, destnîşan kir ku êdî ji bo girtiyên di greva birçîbûnê de saniye jî pir muhîm in û bang li raya giştî kir.
