Navenda Raghandin û Çapemeniyê ya QSD`ê bi daxuyaniyeke nivîskî bîlançoya şerê 24 saetên dawî eşkere kir.
NAVENDA NÛÇEYAN – QSD`ê diyar kir ku 5 wesayîtên leşkerî hatine rûxandin û bi dehan leşker û çete hatine kuştin. Dîsa QSD’ê ragihand ku artêşa Tirk û çeteyê wê welatiyên sivîl rast e rast dikin hedef.
Daxuyaniya QSD’ê wiha ye:
“Tevî ku biryara agirbestê ya Konseya Ewlehiyê ya Netewên Yekbûyî ya li gelemperiya Sûriyeyê jî, êrîşên artêşa Tirk û çeteyê wê dewam dike. Artêşa Tirk a dagirker hemû hêza xwe bi teknolojiya asta herî dawî ya leşkerî bi armanca qirkirina gelê Efrînê bikar tîne. Ji ber vê yekê hêzên me neçar man mafê xwe yê parastina rewa bikar bîne û bersivên êrîşan bide.
QSD’ê di daxuyaniya xwe de ev agahî da:
“MABATA/ MABETLÎ:
Artêşa Tirk a dagirker û çeteyên wê (Cebhet El-Nusra/ DAIŞ) ji beriya çend rojan ve hewl didin li gundê Badîna pêşde bicin. Li hemberî van hewldanan hêzên me di nava berxwedanê de ne. Duh piştî nîvro li derdora gund şer rû da û heta saetên ber êvarî dewam kir. Di encamê de gelek leşker û çete hatin kuştin. Bi şêweyeke giştî 30 leşker û çete hatin kuştin û hejmarek jî birîndar bûn.
Derdora gundê Mîrkan li dijî deverên sivîlan topbaran hatin kirin. Ji ber topbaranê kuştî û birîndarên sivîlan çêbûn.
RACO
Hêzên me tevgera wesayîtên leşkerî yên artêşa Tirk a dagirker û çeteyên wê li gundê Gewende şopand û yekser lêdan. Di encamê de wesayîtek wan hate rûxandin û 7 terorîst ku li ser bûn hatin kuştin. Di heman demê de jî derdora gundê Mûsaka û Racoyê hatin topbarankirin.
Li derdora navçeya Racoyê de ji saetên sibehê heta vê kêliyên di navbera hêzên me û leşkerên artêşa Tirk a dagirker û çeteyên wê şer rû didin.
CINDIRÊS
Balafirên artêşa Tirk a dagirker duh ji saetên 09:00‘ê bi şevê heta derangiya şevê gundên Remadiyê û Hemîlka bomberdûman kirin.
Dewleta Tirk dîsa jî bi armanca qirkirinê, sivîlan dike hedef. Di vê çarçoveyê de tankên Tirk duh wesayîteke ku sivîl ji cihê şer ên gundê Hecîler kirin hedef û lêxistin. Di encamê de 8 sivîlan jiyana xwe ji dest dan û 12 jî birîndar bûn. Dewleta cenazeyên şehîdan û birîndar birin navçeya Reyhanli yê Hatayê.
Hêzên me, kiryarên çeteyên bi navê Koma “Lîwa Sultan Mihemed El-Fatih” ku gundên Baflorê talan dikirin, şopand. Li vir jî Hêzên me yekser 4 wesayîtên wan kirin hedef, di encamê de kesên li ser sîwar bûn, hatin kuştin.
Li eniya gundê Celemê wesayîteke leşkerî ku hewl da pêşde biçe, ji aliyê hêzên me ve hate rûxandin.
ŞERA
Eniya Şerayê ji şevê din heta saetên ser vê sibehê ve hate topbarankirin. Giraniya topbaranê li ser gundê Sînka/ Sinkerlî, Berava, Kefer Cenê û navenda bajaroka Şera bû.
Di heman demê de, êrîşên hewayî li ser bargeha leşkerî ya Kefer Cenê, Sînka/ Sinkerlî, Çema, Xeraba Şera û Baflonê hatin kirin.
Şer li derdora gundê Baflonê û Çemayê berdewam e. Di şerê li vir de, saetên sibehê şervanên me du wesayîtên BMB rûxandin û 16 çete û leşker kuştin.
Hêzên me li eniya Baflonê, vê sibê saet di 10:00‘an de wesayîteke leşkerî îmha kir, çeteyên li nav jî hatin kuştin. Her wiha di saetên piştî nîvojî jî wesayîteke ku doçka li ser barkirî rûxand. Şer heta vê kêliyê berdewam e.
Vê sibehê ji saet 05:00-10:00’an nuqteyên Yekîneyên Gelerî yên girêdayî Artêşa Sûriyê bûn hedefa bombarana balafirên Artêşa Tirk a dagirker.
Balafirên artêşa Tirk saetên piştî nîvro gundê Mişelê bombebaran kir. Bombebaran heta vê kêliyê berdewam e. Li gorî agahiyên destpêkê 5 sivîl şehîd bûne û hejmareke din jî birîndar bûn. Tîmên rizgarkirinê ji ber êrîşan nikarin xwe bighînin gund.5
