MARSÎLYA – Li Marsîlyaya Fransayê, komxebateke “Ciwanên Welatparêz” bi pêşengiya endamên Ciwanên Kurdistaniyên Fransayê (CKF) hate lidarxistin.
Ciwan û Kurdistanî li Navenda Civaka Demokratîk a Kurd a Marsîlyayê kom bûn da ku li ser welatparêziyê nîqaş bikin û lêkolîn bikin ka çawa dikare jiyana komunal were avakirin.
Pêvajo hate nirxandin û pêvajoya “Aştî û Civaka Demokratîk” hate nîqaşkirin. Girîngiya vegera welat û welatê xwe careke din hate tekez kirin, peyamên ku Rêber APO ji gelê Mexmûr û gelê welatparêz ê Kurd ê li dîasporayê dijîn re şandibû, li ser bingeha prensîbên vegera gund û welatê xwe, hatin bibîranîn.
Komxebat bi balkişandina ser rol û mîsyona ciwanan di avakirina jiyana komunal de berdewam kir. Di vê çarçoveyê de, beşdarên ciwan bal kişandin ser gotinên Rêber APO , “Divê hûn xezîneya xwe li cihê ku we winda kiriye li wir bigerin”, û girîngiya têkoşîna li Kurdistanê tekez kirin. Hate gotin ku ev têkoşîn li ser bingeha çand û welatparêziyê pêşketiye, û hêza pratîkî ya pêkanîna xeyalên şehîdên têkoşîna 52 salan bi ciwanan re ye.
Piştî nîqaşan, vîdyoyek li ser jiyana komunal û vegera Endama Koordînasyona Komalên Ciwan Lêgerîn Artemetan bo welêt hate nîşandan. Komxebata ku coş û hêviyek mezin çêkir, bi dirûşmeyên ku ji aliyê ciwanan ve hatin gotin bi dawî bû.
Piştî komxebatê, ciwanên Delîl Serhed, Gokhan Amed, û Salîh Bîrhat nirxandinên xwe parve kirin.
Delîl Serhed di nirxandina xwe de ev tişt got:
“Îro me li Marsîlyayê komxebatek li dar xist. Em pir kêfxweş bûn ku gelê xwe yê welatparêz di nav me de dît. Wêneya ku îro derket holê careke din nîşan da ku rojên azadiyê nêzîk in.”
Gokhan Amed di axaftina xwe de wiha got:
“Îro li Marsîlyayê, me wekî Tevgera Ciwanên Şoreşger komxebatek li dar xist. Ev komxebat pêvajoya ‘Aştî û Civaka Demokratîk’ a ku ji hêla Rêber Apo ve di 27ê Sibatê de hatiye destpêkirin, nîqaş kir. Wekî tevgereke ciwanan a welatparêz, me rola ji nû ve avakirinê li dîasporayê girtiye ser xwe. Divê li gorî vê paradîgma û pêvajoyê bêtir xebat were kirin. Divê her ciwanek rola xwe di siyaseta demokratîk de bilîze. Divê em wekî ciwan destê Rêber Apo di vê pêvajoyê de xurt bikin. Li Rojhilata Navîn, li Bakurê Kurdistanê û li Tirkiyeyê, Civaka Demokratîk hewce dike ku bigihîje qonaxa xwe ya herî pêşketî. Bi ruh û moralek fedakar, divê em vê pêvajoyê bi hemû gelên ku aştiyê dixwazin re xurt bikin.”
Di nirxandina xwe de, Salih Bîrhat bal kişand ser vegera cewher û komunalîzmê:
“Wekî ciwanên Kurd ên welatparêz li Marsîlyayê, me komxebatek li ser girîngiya vegera bo cewhere xwe û jiyana komunal li dar xist. Komxebat bi beşdariyeke bilind dît, ku bi giranî ji aliyê ciwanan ve dihat birêvebirin. Vegera bo cewhere xwe me pêvajoyek e ku ji aliyê hişmendiya welatparêz ve tê avakirin. Çawa ku li Rojava hatiye pratîkkirin, jiyana hevbeş jî dê bi heman awayî were avakirin. Her ku em bêtir rêxistin bibin, em ê ewqas bêtir vegerin bo cewhere xwe û Kurdistanê. Ev tenê bi rêxistinkirin û komunalbun mimkun e,” wî diyar kir.
