KOBANÊ- Endamên Tevgera Ciwanên Şoreşger û Yekîtiya Jinên Ciwan ên Kobanê bi boneya 4’ê Nîsanê 74’emîn salvegera rojbûna Rêber APO bi dehan şitil çandin. Ciwanan hestên xwe yên têkildarî 4’ê Nîsanê ji ajansa me re parve kirin.
Endama Yekîtiya Jinên Ciwan Îslim Îbrahîm Bekir di destpêka axaftina xwe de rojbûna Rêber Apo li hemû malbatên şehîdan û malbatên welatparêz pîroz kir.
Bekîr, diyar kir ku 4’ê Nîsanê ji bo hemû gelê Kurd pîroz e û got, “Em weke ciwan û jinên ciwan ji bo pîrozkirina rojbûna Rêber APO şitil û darên gulan diçînin. Ev roj ji bo me weke ciwanan rojeke dîrokî ye. Bi taybetî ji bo me jinên ciwan ev roj rojeke bi nirx û xwedî moral e.”
Jina ciwan diyar kir ku her dara ku tê çandin ji bo xweza û civakê ye û got, “Bi ruhê 4’ê Nîsanê em her derê bi kulîlk û darên rengîn xemilînin. Li vir me navê hevalekî şehîd da her dara ku me ji bo Rêberê xwe çandiye. Ji ber ku ev nirx nirxên şehîdên me ne. Ji ber ku ev xak bi xwîna şehîdên me hatine avdan.”
Endamê Tevgera Ciwanên Şoreşger Mûrat Kobanê jî diyar kir ku 4’ê Nîsanê roja vejînê ya gelê Kurd e û got, “Em weke ciwan û jinên ciwan ji bo rojbûna Rêbertiya xwe daran diçînin. 4’ê Nîsanê ji bo me xwedî wateyek mezin e, roja azadiya gelê Kurd e. Li ser vê bingehê her sal em bi hev re daran biçînin. Demêk nêzde hevîdarin Rêber APO azad be û em bi hev re biçînin.”
