HESEKE – Xwendekarên Peymangeha Tenduristî ya Heseke derbarê êrîşên dewleta Tirk a dagirker li ser Bakur û Rojhilatê Sûriyê û bi taybetî li ser Bendava Tişrînê daxuyaniyekî dan. Xwendekar şervanên QSD û nobedê gel li Tişrînê silav kirin û destnîşan kirin ku êrîşên dewleta Tirk li ser Bendavê metirsiyekî mezin li ser herêmê ne. Her wiha, banga raya giştî kirin da ku li hemberî êrîşên dagirkeriyê rawestin û Sûriyekî azad, demokratîk û nenavendî ava bikin.
Daxuyanî bi vî rengî ye:
“Daxuyanî ji Raya Giştî re:
Zêdeyî mehekê ye ku li Bendava Tişrînê, li Bendava Şehîdan rastî êrîşên herî hovane yên ji aliyê dewleta Tirk a dagirker û çeteyên wê ve bi topbarana tund û êrîşên hewayî yên bênavber tê.
Ev êrîş dibin metirsiyeke rasterast li ser derketina bendavê ji xizmetê, ku dibe sedema karesateke mirovî û jîngehê ya giran bo herêmê û navçeyên derdor.
Bendav ji xizmetê derkeve dê bibe sedema herikîneke mezin a avê, ku dê di encamê de deverên berfireh ên zeviyên çandiniyê di bin avê de bihêle û gund û deverên derdora çemê Firatê bifetisîne.
Balafirên keşfê yên dewleta Tirk a dagirker karwanê sivîlan a li bendavê, ku bi hezaran şêniyên herêmên Bakur û Rojhilatê Sûriyê di nav de ne û erebeyên Heyva sor a Kurd kirin armanc. Ew gelê me ku bi armanca şermezarkirina êrîşên li ser bendavê û piştgiriya xwe ji QSD’ê re ber bi bendavê ve diherikîn hedef girtin. Di encana êrîşa hovane de, 21 ji sivîlan jiyana xwe ji dest dan û 203 jî birîndar bûn.
Em dibînin ku ev hemû binpêkirin li ber çavê hemû cîhanê pêk tên, bêyî ti şermezarkirin û bertek li hember metirsiya li ser jiyana sivîlan û binpêkirina rêgezên mafên mirovan were diyarkirin.
Ji vî alî ve em bang li civaka navdewletî û hevpeymaniya navdewletî dikin ku erk û berpirsyariya xwe yên mirovî û exlaqî yên li hember gelên herêmê bi cih bînin û ji bo rawestandina bombebarana berdewam û tundiya Tirkiyê li ser herêmên Bakur û Rojhilatê Sûriyê tedbîrên lezgîn bigirin. Ji bo ku karesateke mirovî li herêmê rû nede û parastina sivîlan û binesaziyê misoger bibe.
Bi navê peymangeha Tenduristî ya bajarê Hesekê em van êrîşên hovane yên li dijî sivîlan, ku armanca wan şikandina vîna gel û berxwedana dîrokî û tunekirina hebûna Kurdan e, bi tundî şermezar dikin. Îradeya azad a gelê me û sekna wan a di pêngava bendava Tişrînê de, fedakariyên mezin ên hêzên me, Hêzên Sûriyeya Demokratîk û Yekîneyên Parastina Jin ku mezintirîn destanên lehengiyê li ber çavan dinivîsin, bi rêzdarî silav dikin.
Dagirkeriya Tirk û çeteyên wê dê vê berxwedana mezin ji bîr nekin, ku wê bi tîpên zêrîn bê nivîsandin da ku nifşên paşerojê bikaribin wateya rastîn a berxwedanê fêr bibin.
Em bang li hemû gelên ku bi hesreta azadiyê ne û bi rûmet bijîn dikin ku ji bo li dijî dagirkeriya dewleta Tirk a ku niha bi hevgirtina me, bi hêza îradeya me re ewlekarî û rewşa herêmê dixe xetereyê bisekinin, mil bidin milê hev û dagirkeriyê têk bibin û serketinê bi dest bixin. Em ê bibin mertalê xurt ê hêzên xwe.
Rêz û hurnetî ji bo şehîdên leheng.
Ji birîndaran re şifaya lezgîn.
Bijî Sûriyeyeke azad, demokratîk û nenavendî.
Bijî biratiya gelan.”
Her wiha, xwendekarên Peymangeha derbarê êrîşên dagirkeriyê û erkên gelê welatparêz axivîn û diyar kirin ku amade ne ji bo pişgirî bidin QSD û gelê ku nobed li Tişrînê digire di warê tenduristiyê de.
