NAVENDA NÛÇEYAN– Hêzên Rizgariya Efrînê bi daxuyaniyekî nivîskî ve şehadeta hevrê Soro Berxwedan eşkere kir.
Daxuyanî wuha ye:
Ji Çapemenî û Raya Giştî Re!
Hevrêyê me Soro Berxwedan ku di çarçoveya qonaxa duyemîn a Berxwedana Serdemê ya Efrînê de têkoşîn û berxwedaniya me ya li hember dewleta Tirk a dagirker û komên çeteyên wê didome de kar û xebatên xwe li herêma Efrînê dida meşandin, di dîroka 9’ê Tebaxa 2024’an de dema li ser erka xwe bû, tevlî karwanên nemiran bû.
Rêhevalê me Soro Berxwedan li warê berxwedana serdemê, li bajarê Efrînê di malbatekî welatparêz ku xwedî çand û kevneşopiya kurdewariyê ne, ji dayik dibe. Rêheval Soro jî weke her ciwanekî Kurd ên xwedî wijdan dema şoreşa Rojavayê Kurdistanê destpê kir, li ser gelê me û pêkhateyên heyî êrîş hatin destpêkirin, berê xwe dide nava refên şoreşê û bi erkên xwe yê welatparêziyê radibe. Bi taybetî piştî ku ji hêla dewleta Tirk a dagirker û çeteyên wê ve bajarê Efrînê li pêş çavê cîhanê hate dagirkirin û gelê me ji ber kiryarên dermirovî ên dagirkeran hatin neçar man ku ji warê xwe koçî cihekî din bibe. Ji ber van sedemên heyî hîn bêhtir kîn û hêrsa tol girtinê di dil û mejiyê hevrê Soro de xurt dibe, ji bo vê daxwaz û armanca xwe pêk bîne jî tevlî nava refên hêzên me dibe. Rêheval Soro bi taybetmendiyên xwe yên balkêş ku bala hemû hevrêyên xwe dikişand, hevalekî ku çi erk û wazîfe jê ra hate diyarkirin bi coş û kelecanekî mezin pê ra rabû, xwe ti deman neda aliyekî. Rêhevalek fedakar û kedkar bû. Hewl da di her milî de xwe pêş bixe. Bi perwerdeyên bîrdozî re hem di aliyê fikrî hem jî di aliyê pratîkê de, xwest ku ji daxwazên demê re bibe bersiv. Bê rawestan, li her deveran bi karê şoreşgertiyê rabû, heya kêliya xwe ya dawî jî her demê bi îrade û baweriyekî xurt ji bo rizgarkirina Efrînê û deverên din ên dagirkirî têkoşiya.
Em weke Hêzên Rizgariya Efrînê, di şexsê malbata hêja ya rêheval Soro Berxwedan de, em sersaxiyê ji tevahî gelê xwe yê welatparêz re dixwazin. Em weke hevrêyên wî careke din soz didin ku em ê erkên şoreşê yên ku hevrêyê me Soro radestî me kir bi cih bînin, di şexsê wî de hemû şehîdên şoreşê bi rêzdarî bibîr tînin.
Nasnameya rêhevalê me yê şehîd wiha ye:
Nasnav: Soro Berxwedan
Nav û Paşnav: Mihemed Hesen
Navê Dayikê: Ayşe
Navê Bav: Hesen
Cih û Dîroka Şehadetê: Herêma Efrînê / 9’ê Tebaxa 2024
Hêzên Rizgariya Efrînê
10’ê Tebaxa 2024
