NAVENDA NÛÇEYAN – Li ser navê grtiyên PKK û PAJK’ê yên li zindanên dewleta tirk Denîz Kaya têkildarî çalakiya girtiyan a li dijî tecrîdê daxuyaniyek da. Berxwedêrên zindanan diyar kirin ku girtiyan mîna her demê bi wayekî rêxistinî tevlî pêngava ‘Ji Rêber Apo re azadî ji porsgirêka kurd re çareseriya siyasî’ bûn û wiha hat gotin: “Li gel zext, şert û mercên giran û her cûre êrişan, li dijî tecrîda girankirî ya li ser Rêbertî, bi dilsoziya bi kevneşopiya berxwedana zindanan a 45 salan, em tevlî pêvajoya pêngavê bûn. Greva birçîbûnê ya 27’ê Mijdara 2023’an li zindanan bi dorvegerî hate destpêkirin, bi 4’ê Nîsana 2024’an rojbûna 75’an a Rêberê me veguherî asta ‘Em di nava şert û mercên Rêberê xwe de bijîn’ û bi rengekî girîng bandor li derve jî kir û pêngav bi pêş ve bir.”
Berxwedêrên zindanan anîn ziman ku dewleta tirk a faşîst nekarî xwe li têkçûna hilbijartinê ya herî dawî ya li Kurdistanê rabigire, hewl da îradeya gelê kurd tune bihesibîne û wiha domand: “Li dijî van hewldanan di serî de xelkê Wanê li Kurdistanê berxwedaneke mezin hate nîşandan. Vê berxwedanê rêxistiniya çete ya AKP-MHP a faşîst hejand.”
Di daxuyaniyê de hate destnîşankirin ku ev rêxistiniya çete ya faşîst, pîvanên hiqûqî yên gerdûnî tine hesiband, êrişî gelê kurd kir; êrişên qirkirinê, desteserkirina îradeyê û êrişên dagirkeriyê yên lis er qadên azadiyê dewam dike.
Di daxuyaniya girtiyên ji doza PKK û PAJK’ê de bi dewamî hate gotin, “Lê belê gerîlayên azadiyê bi ruhê fedaî û teknîka xwe ev êriş têk bir. Gelê me yê bi rûmet û berxwedêr jî xwedî li Rêber Apo û îradeya xwe derket û bi sekna xwe pênga xurt kir.”
Di daxuyaniyê de hate bibîrxistin ku girtiyên ji doza PKK û PAJK’ê çalakiya greva birçîbûnê ya bi dorvegerî di 27’ê Mijdara 2023’an de dan destpêkirin, di 4’ê Nîsana 2024’an de veguherandin asta ‘Jiyana di nava şert û mercên Rêbertî’ de û hate gotin, “Di asta heyî de ev çalakî diqede. Di pêvajoya pêngava azadiyê, heta ku azadiya fîzîkî ya Rêber Apo bê misogerkirin, em ê bi çalakiyên cuda tevlî pêvajoya pêngavê bibin.”
Herî dawî bang li derdorên demokratîk, rewşenbîr û dostên gelê Kurd hate kirin ku di vê pêvajoya dîrokî de li dora pêngava ‘Ji Rêber Apo re azadî ji porsgirêka kurd re çareseriya siyasî’ bicivin û bang li gelê kurd ê berxwedêr jî hate kirin ku hîn bi berpirsyarî tevbigere.
