AMED- Pîrozbahiya Cejna Newrozê ya Amedê ku bi dirûşma “Rabe dema azadî û serketinê ye” li Parka Newrozê ya Rezanê tê lidarxistin, dest pê kir.
Dika pîrozbahiyê bi pankarta ‘Zimanê me rûmeta me ye” û “Ciwan temînata azadiyê ne” hate xemilandin.
Endamên Piştevaniya Xwendekarên Azad a Dîcleyê bi slogana “Bijî Berxwedana Ciwanan” bi pankarta “Bi giyana Rehşan û Mazluman silav Li Tekoşeran” bi coş û kelecan ketin qada Newrozê ya Amedê.
Li qada Newrozê wêneyên Kemal Kûrkût, Denîz Poyraz û Jîna Emînî hatin daliqandin.
Ji welat û derveyî welat gelek mêvan ji bo Newroza Amedê hatin vexwendin. Dayikên ku ji bo azadiya Rêberê Gelê Kurd Abdullah Ocalan di Nobeda Edaletê de ne tevlî Newrozê bûn.
GUH NEDAN BARANÊ: DIRÛŞMA ‘BIJÎ SEROK APO’ BILIND DIBE
Ji 6 nuqteyên cuda bi deh hezaran kes bi alên DEM Partiyê herikîn qada pîrozbahiyê. Girseya gel guh neda baranê û li ber dahol û zirneyê dest bi gerandina govendê kir.
Ji qada Newrozê dirûşmên “Bijî Serok Apo” û “Bijî berxwedana zindanan” bilind dibe. Her wiha peyamên têkildarî azadiya Abdullah Ocalan têne dayin.
Tevlîbûna zêde ya ciwanan balê dikişîne. Ciwanên ku alên DEM Partiyê hildane, bi stranên berxwedanê coşeke mezin didin pîrozbahiyê. Beşeke mezin a beşdaran jî kincên neteweyî li xwe kirine.
Pîrozbahiya Newrozê bi coş dewam dike.
