MILANO – Ji bo azadiya Rêber APO û girtiyên siyasî yên din û parastina mafê diyarkirina çarenûsa xwe ya Kurdan, bi şiara ‘’Dema hêviyê ye’’ li Mîlanoyê ku bajarekê Îtalyayê ye, panelek konser çêbûn. Qada panel û konserê ku bi pêşengtiya Buroya Ragihandinê ya Kurdistanê li Îtalyayê, Rete Kurdistan-Îtalya û Partiya Komunîst Vesazbûnê li parka Dell Cascine di Chiese Rossayê bi tevlêbûna bi sedan kesan çê bûn, bi wêneyên Rêber APO û alên PKK’ê hat xemilandin. Pankartên li ser ‘’Bêyî edalet aştî çê nabe û ‘’Bêyî şert em bi Kurdan re ne’’ nivîsandî, daleqandî bûn. Pirtûkên Rêberê Gelê Kurd Abdullah Ocalan ên bi zimanên cuda weşandî li ser standan hatin firotin.
Çalakî, bi paneleke li ser fikirên Rêberê Gelê Kurd Abdullah Ocalan û Şoreşa Rojava dest pê bû. Siyasetmedara Kurd Hazal Koyûncûer panel bi rê ve bir. Karîkaturîstê Îtalyayî yê bi nav û deng Zerocalcare ku xebatên wî li ser Şoreşa Rojava ûRêber APO jî hene, Pûnto Rûsso ku pirtûkên Rêberê Gelê Kurd Abdullah Ocalan wergerandine Îtalî, edîtorê weşanxaneyê Roberto Mapellî û Rojnamevan Gîacomo Sînî ku gelek caran çûye Rojava, panelîst bûn.
‘GEL DAXWAZA AZADIYA ABDULLAH OCALAN DIKIN’
Siyasetmedara Kurd Hazal Koyûncûer ku pêşîn axivî, diyar kir ku çalakî di çarçoveya kampanyaya azadî ji bo Rêber APO dest hatiye lidarxistin pêşkêşiyek li ser giringiya fikirên Rêber APO ji bo gelên cîhanê, kir û got: Ji lew ma ye ku gel bi hev re daxwaza azadiya Abdullah Ocalan dikin.’’
MAPELLÎ: BANDORA FIKIRÊN ABDULLAH OCALAN LI SER MIN GELEK E
Bi pişt re wergêrê Îtalyan Pûnto Rûsso û edîtor Roberto Mapellî axivîn. Mapellî diyar kir ku bandora fikirên Rêber APO li ser wî gelek e û got ku wî ji wê boneyê pirtûkên Rêberê Gelê Kurd Abdullah Ocalan wergerandine Îtalî û wiha axivî: ‘’Tevî kapîtalîzmê îro li Rojava kes û civaka azad ava dike. Divê em bi van bizanin û daxwaza Abdullah Ocalan û parastina statuya Rojava bikin.’’
ZEROCALCARE: KURDAN BI DAYÎNA GELEK BEDELAN ŞOREŞA ROJAVA PÊK ANÎ
Bi dûv Mapellî re karîkaturîst Îtalyayî Zerocalcare dest bi axavtinê kir. Zerocalcare diyar kir ku bi berxwedana Kobanê re têkoşîna Kurdan sînor derbas kirine û got: ‘’Ez jî bo vê şoreş û têkoşînê ji nêz ve nas bikim û wê bibim Ewropayê min ev xebat kirin. Şoreşa Rojava, pêkhatina teoriya nîvcomayî ye ji bo sosyalîstan. Kurdan li Rojava gelek bedel dan û ev pêk anî.’’
‘DIVÊ ABDULLAH OCALAN AZAD BIBE Û QEDEXE JI SER PKK’Ê RABIBE’
Zerolcalcare bi dewamdarî got ku ji ber tirsa ji fikirên wî, Rêberê Gelê Kurd Abdullah Ocalan tê tecrîdkirin û ev tişt anîn ziman: ‘’Fikirên Abdullah Ocalan ne bi tenê ji bo gelên herêmê lê ji bo her kesî giring in. Ji bo fikirên wî pêk bên divê azad bibe.’’
Zerolcalcare her wiha rexne kir ku çima PKK di lîsta ‘teror’ê de tê girtin û wiha dawî li axavtina xwe anî: ‘’PKK’ê li dijî rêxistina terorî DAÎŞ’ê ku li serê dinyayê bûye bela, têkoşiya û ew têk bir. Tu boneyeke hêj PKK di lîsta terorê de bê girtin nîn e. Divê her kes ji bo azadiya Abdullah Ocalan û rabûna qedexeya ji ser PKK’ê tev bigere.’’
SÎNÎ: ŞOREŞA ROJAVA HÊVIYA ME HEMÛYAN E
Rojnamevanê Îtalyayî Gîacomo Sînî ku pişt re axivî, dîtînên xwe yên li ser Rojava û Şengalê gotin. Sînî diyar kir ku tevî gelek zehmetiyan hewila Kurdan ew e ku Şoreşa Rojava ji pêyan bihêlin û bi bîr xist ku dewleta Tirk ji bo rakirina şoreşê ji holê bi her awayî dikeve hewilê. Sînî destnîşan kir ku dewleta Tirk û çete ji bo rakirina Şoreşa Rojava ji holê bi hev re tev digerin û gotina xwe wiha qedand: ‘’Şoreşa Rojava hêviya me hemûyan e, ji bo parastina wê divê mirov li Rojava bibe xwedî.’’
