BEHDINAN – Yek ji fermandarên Yekîneyên Parastina Rojhilatê Kurdistanê (YRK) Şiyar Şevger têkildarî êrîşên dewleta Tirk û Îranê ji ANF’ê re axivî. Şevger diyar kir ku êrîşên li ser gelê Kurd ên li çar parçeyên Kurdistanê bê navber didome û got”Îran, Tirkiye û Iraqê li hev kirine ku tevgerên azadiyê yên Kurdan çekê berdin.”
Yek ji fermandarên YRK’ê Şevger, diyar kir ku Îran û Tirkiyeyê biryar dane ku li dijî PJAK’ê têbikoşin. Şevger got “Ji bo ku îstîxbarata Îranê agahiyên derbarê PJAK’ê bide dewleta Tirk û hêzên dewleta Tirk jî di çarçoveya van agahiyan de êrîşan pêk bînin, lihevkirinek hatiye kirin. Helwesta me ya li hember vê rewşê diyar e; ger tevgereke ku îdiaya têkoşîna şoreşgerî dike dev ji têkoşîna çekdarî berde, ev ji bo wê tê wateya mirinê. Di vê sedsala ku em tê de dijîn de heke ne xwediyê hêza leşkerî û parastinê be, bi îrade û hêza xwe ya xweser nikaribe civakê biparêze, wê tu wateya têkoşîna şoreşgerî jî tunebe.”
LI ROJHILAT TEVGERA HEWAYÎ ZÊDE BÛ
Fermandarê YRK’ê Şevger bal kişand ser vê yekê ku li qadên Rojhilat tevgera hewayî zêde bûye û got “Balafirên keşfê her roj li ser herêmên me digerin, agahiyên ku tên berhevkirin bi rêya PDK û Îranê ji dewleta Tirk re tê şandin û piştre jî êrîşî me dikin. Lê belê dewleta Tirk û Îranê di van êrîşan de ti encam bi dest nexistin û li hemberî tevgera me ya Apoyî têk diçin.
Şevger da zanîn ku li Rojava, Başûr, Bakur û Rojhilat êrîşên dijwar û mezin tên kirin û got, “Em bi cesaret û baweriyeke mezin li hemberî van êrîşên dijwar li ber xwe didin û em ê li ber xwe bidin.”
Şevger serhildanên par li Rojhilat û Îranê bi dirûşmeya ‘Jin, jiyan, azadî’ pêk hatin û li cîhanê deng veda, bi bîr xist. Şevger got “Gelê me bi gelên Belûç, Azerî, Fars û Ereb re li dijî zilm û zordestiya rejîmê têkoşîneke hevpar da meşandin. Di têkoşîna ku gelê me bi fikir û felsefeya Rêber Apo de cih girt, gelek berdêl hatin dayîn.”
EM LI GORÎ AGIRBESTÊ TEVDIGERIN DIVÊ DEWLETA ÎRANÊ JÎ WISA TEVBIGERE
Şevger, anî ziman ku di çarçoveya agirbestê de tevgeriyane û got “Em li gorî agirbestê tevdigerin, divê dewleta Îranê jî wisa tevbigere. Em ji bo welat, gelê xwe û gelên bindest têdikoşin û hêzeke parastinê ne. Em alîgirê diyalog û çareseriyê ne, em ne alîgirê şer in. Lê heke êrîşî gelê me were kirin, em ê bersiva vî tiştî bidin.”
Şevger, bang li dewleta Îranê jî kir ku ‘nekevin fêl û xefikên dewleta Tirk’, diyar kir ku hêzên dewleta Îranê di demên dawî de êrîşî Merîwanê kirine û wiha got: “Her wiha li Kosalanê jî hin êrîş pêk hatin. niyeta wan heye ku li ser çend girên li wir bi cih bibin. Lê divê ji bîr nekin; Em gerîla ne û li her derê Kurdistanê ne. Li gorî wan ger ku hin gir û deran bistînin, gerîla êdî nikare li wir bimîne.Stendina wan giran şaşiyeke , divê dewleta Îranê ya faşîst û mêtinger agirbestê ji xwe re neke firsend. A niha hevalên me xwe digirin ku êrîş nekin.”
JI QADÊN GERÎLA DÛR BISEKININ
Yek ji fermandarên YRK’ê Şevger diyar kir ku, di demên dawî de polîtîkayeke qirêj ketiye meriyetê û hewl tê dayîn hin rastî werin berevajîkirin û bal kişand ser van mijaran: “Wiha dibêjin; ‘Li dijî dewleta Îranê şer nekin’. Em jî hewl didin pirsgirêkan bi diyalogê çareser bikin. Lê hin hêzên herêmî bi meşandina siyaseteke qirêj hewl didin gel li hemberî me sar bikin. Ji ber vê yekê divê gelê me li hemberî vê siyasetê hişyar û hesas be.”
Şevger da zanîn ku, divê gelê Kurd li dijî cihên ku dijmin lê dixwaze bi cih bibe helwesta xwe nîşan bide û bikeve nava tevgerê û bang li hêzên paramîlîter ên Besîç ên dewleta Îranê û hêzên hevkar ên herêmê kir û got, “Ji qadên gerîla dûr bisekinin, zirarê nedin têkoşîna azadiyê û nekevin pey gerîlayan.”
ŞEHÎD ERDAL AMED SEMBOLA BERXWEDANÊ BÛ
Fermandarê YRK’ê Şiyar Şevger, gerîlayê azadiyê Erdal Amed (Hesen Mihemedî) ê ku di êrîşa hewayî ya dewleta Tirk a bi balafirên bê mirov ên li Çiyayê Asos ê li bejahiya gundê Gelale de di 4’ê Hezîrana 2023’yan de şehîd bibû, bi bîr anî. Şevger bi bîr xist ku Erdal Amed di sala 2013’an de ji Merîwanê tevlî tevgera azadiyê bû û wiha dewam kir:
“Hevrê Erdal ku berê welatparêzekî Kurd bû, ji aliyê hêzên dewleta Îranê ve dîl hat girtin û tevî êşkenceyên giran, peyvek jî negot û piştî ku hat berdan tevlî refên PJAK’ê bû. Hevrê Erdal sembola berxwedanê ya li dijî faşîzmê bû. Em soz didin ku ji bo bîranîna wî em ê têkoşînê mezin bikin. Ciwanên Merîwanî ji bo parastina vê mîrateya têkoşînê divê li ser şopa wî bimeşin û çeka wî li erdê nehêlin.”
