NAVENDA NÛÇEYAN – Koordînasyona YPS-YPS JIN’ê di daxuyaniya xwe de nasnameya Zozan Azak parve kir û Şehîd Zozan ku di 2’ê cotmehê di sala 2015 lî Ferqîn şehîd ketibû bi bîr anî. Koordînasyona YPS-YPS JIN di daxuyania xwe digot:
“Dewleta Tirk bi ‘plana têkbirinê’ re li hemberî gelê Kurd pêkanînên qirkirinê plan kir, bi êrîşên li ser gerîla hewl da gelê me bêparastin bihêle û ji bo ku komkujiya Kurdan pêk bîne hemû hêza xwe ya leşkerî û saziyên xwe kir tevgerê. Li ser vê yekê gelê Kurd li hemberî dewleta Tirk û rejîma AKP’ê xwe birêxistin kir, li Sûr, Nisêbîn, Şirnex, Cizîr û hwd. li Kurdistanê xwerêveberiya xwe îlan kir, hêza xwe ya rewa birêxistin kir û li dijî faşîzmê têkoşiya. Bi berxwedana ku kolan bi kolan, tax bi tax destpê kir, li ber rejîmê rabû, bi taybetî maskeya Tayyîp Erdogan û hikûmeta wî xist û ji hemû cîhanê re nîşan da ku ew firawnê serdema nû ye. Malbata heval Zozan ji ber kiryarên dewleta qirker a li hemberî malbatên Kurdan, koçî Mersînê bûye. Heval Zozan li Mersînê ji dayîk bû û mezin bû. Malbata heval Zozan ji eksa dewletê, hevala Zozan bi dengbêjên Kurd re mezin dike, ziman û çanda xwe da hevala Zozan. Hevrêya me Zozan a ku bi hişmendiya welatparêziyê mezin bû, di temenê xwe yê ciwantiyê de bi rastiya ‘Kurdistan mêtîngeh e’ re rû bi rû ma. Ji bo ku pêşî li polîtîkayên înkar û îmhaya li ser gelê xwe bigire, biryara tevlîbûna berxwedana xwerêveberiyê da. Hevrê Zozan ku di sala 2015’an de li Amedê di nava xebatên rêxistinkirina hucreyê de cih girt, bi kelacan û morala xwe hêz da hevreyên xwe. Hevrê Zozan ku evîna xwe ya azadiyê bi kenê xwe nîşan da, bi hevreyên xwe yên ku ji tevlîbûna wê ya berxwedana Sûrê bandor bûn, derbên mezin li leşkerên Tirk ên faşîst xistin.
Hevrê Zozan weke şervaneke xwedî tecrûbe pêşengiya berxwedana li Farqînê kir û bi awayekî çalak beşdarî têkoşînê bû. Heval Zozan a ku hevrêyên wê beriya saeteke êrîşên dijmin xwest wê ji qadê derbixin, li gel hemû israran jî çûyîn qebûl nekir. Li hemberî êrîşên giran ên dewleta mêtîngeh a faşîst bi ruhê Apoyî têkoşîneke mezin nîşan da. Li hemberî her cûre êrîşên dewleta mêtîngeh bi cesareteke mezin şer kir û dema ku xwest biçe hevreyên xwe yên birîndar rizgar bike, şehîd bû.
Hevrê Zozan ku daxwaza wê ya herî mezin çiyayên azad bû, di berxwedana xwerêveberiyê de di têkoşîna hebûn û tinebûna gelê xwe de bi lehengî şer kir, celadên rejîma faşîst li hemberî milîtanên fedayî yên Rêber Apo nekarîn serê xwe ji ser çeperan derbixin. Em bi baweriya lehengên berxwedana xwerêveberiyê ku gotin, wê dawî bi heybet be û li hemberî têkoşîna ku li dijî dijminê qirker nîşan dan, careke din soz didin ku em ê parastina xwe li ser bingeha kesayet û gelê rêxistinkirî xurttir bikin û dijminê mêtîngeh ji Kurdistanê derxin.
Em sersaxiyê ji malbata hevrê Zozan ku di berxwedan xwerêveberiyê de bi ruhê fedayî tevlî têkoşînê bû û ji hemû gelê xwe yê welatparêz re dixwazin ku li dijî qirkirina gelê Kurd li ber xwe didin.
Agahiyên li ser nasnameya hevrêya me ya şehîd wiha ye:
Nav û Paşnav: Zozan Azak
Cihê ji dayîkbûnê: Mersîn
Navê Dayikê: Munevver
Navê Bav: Fehîm
Dem û cihê şehadetê: 2’ê Cotmeha 2015 – Farqîn”
