HESEKÊ – Mihemed Emîn Qasim got; “Dema Serok hate girtin 9 şevan ez ji malê derketim, û min gunehek jî wê demê kir. Piştre min bang li zarokê xwe kir, hemû li derdora xwe kom kir, min Qûran danî ber wan û ji wan re got; “Divê hûn destê xwe dayînin ser Qûranê û sond bixwin, ku emê dev ji Serok û partiya xwe heya mirinê bernedin.”
Dosyaya me ya beşa 8’emîn ya bi bavê Qasim re wiha ye;
Mihemed Emîn Qasim Qasim, bi navê bavê Qasim têm nas kirin. Serokê me di bin zilm û zorê de ye, emê çawa wisa rihet jiyan bikin, rihetî ji me re nîne, ez niha 70’ê salî me ger ez bimirim jî ez di bin bandora Serok û parêznameyên wî de bimirim. Carekê hin kes hatin gel min gotin xwe amade bike emê biçin gel Serok, min destpêkê qebûl nekir, min got pêwîste kesên ku hîna Serok nasnekirine, û nizanin ew kî ye, bila ew biçin, ya min kengî derfetekî din çêbibe ezê biçim. Lê wan qebûl nekir israr kirin ku ez biçim, ez jî herî dawî çûm. Em komek bûn em sibehê derketin çûn Şamê, em derbasî malê Kurmancên wê derê bûn.
Destpêkê ez Serok tiştek difkirîm û piştî min ew dît tiştekî din bû, hem axaftina wî û hem jî rûniştina wî pir bi heybet bû, Serok pir bi pîvan tevdigeriya. Çawa di ber mera derbas dibû, yekser em nas dikirin û fam dikir em çi êşê jiyan dikin. Em gelekî pê bandor bûn, ez nikarim wê bandorê jî bêjim. Serok xwast em biaxivin, dema ez axivîm kêfa wî gelekî ji axaftina min re hat. Min wê demê li herêma Cizîr a Rojavayê Kurdistanê kar dikir, min jî dema ku Serok ji min xwastî ez biaxivim, min jê re got; “Serokê min gelê me ji hemû daxwazên te re amade ye”, wî jî got; “Tişta ez dixwazim ev e”. Bi rastî li gorî ku ez dîndarim, li gor mele Ebdulriham, weke wî jî gotî; “Li gorî ku ez mele me, lê dema min Serok dît, ez nebûm nuqteyek ji ola îslamê.” Ji ber çi em wisa dibêjin, ji ber pratîkên ku Serok dike. Ger dema mirovek biaxive û bê pratîk be, însanekî bê feyîde ye. Weke komûnîstan, digotin emê wisa bikin, wisa bikin û her nekirin. Beriya ku Yekîtiya Sovyetan hilweşe, Serok bi salek-du salan got ewê hilweşin.
Em ji tevahî gel re dibêjin hûn dêndarê Serok in, divê hûn her tiştî ji bo Serok û Xweda bikin. Serok ji we re ewqas ked daye, hûn parastin e, ji we re gerîla bi pêşxistiye, divê hûn jî xebat bikin. Ev têkoşîna me bi karekî an jî du karan an jî sed karan bi dawî nabe. Weke mînak ez niha nimêjkar im, ma çêdibe ku ez bêjim ez êdî bûme 70’î sal ez nimêj nakim, tiştek wisa çênabe, guneh e, guneh jî kûfrî ye. Ji bo Serok jî wisa ye, çênabe ku tu dev ji Serokê xwe berde. Heya ku dilopa te ya xwînê hebe, tu yê kar bikî. Emê bi rihê welatparêziyê heya dawiya temenê xwe jiyan bikin.
Dema Serok hate girtin 9 şevan ez ji malê derketim, û min gunehek jî wê demê kir. Piştre min bang li zarokê xwe kir, hemû li derdora xwe kom kir, min Qûran danî ber wan û ji wan re got; “Divê hûn destê xwe dayînin ser Qûranê û sond bixwin, ku emê dev ji Serok û partiya xwe heya mirinê bernedin.”
NC// Dîren Bagok
