NAVENDA NÛÇEYAN – Komelgeha Jinên Azad a Rojhilatê Kurdistanê (KJAR) têkildarê qetilkirina jina ciwan ya ji Seqiza Rojhilatê Kurdistanê Jîna Emînî (Mehsa) ya ji aliyê hêzên rejîma Îranê ve daxuyaniyeke nivîskî weşand. KJAR’ê şermezarkirina qetilkirina Jîna Emînî ji aliyê hêzên rejîmê ve şermezar kir, sersaxî ji malbata Emînî re xwest û hevxemiya xwe ragihand.
Di daxuyaniya KJAR’ê de îşaret bi daxwazên mafdar û rewa yên jinên Îranê hat kirin û ji bo pêşî li tawanên mêr û rejîma Îranê ya li dijî jinan bangên giring hatin kirin.
Di daxuyaniya KJAR’ê de ji jinan hat xwestin ku li dijî pêkanîn û sûcên rejîmê bibin yek û ev peyam hat dayîn: “Hîn çend roj li ser jidestdayîna jiyana xwe ya Şilêr Resûlî re derbas nebûn, agahiya jidestdayîna jiyana xwe ya Jîna Emînî (Mehsa) belav bû. Ev her du mirin li du cihên cûda çêbibin jî, jin tê de hedef hatine girtin. Jin di vê serdema tijî karesat a desthilatdariya Îranê de rola pêşengiyê ya werçerxan û guhertinê girtine ser milên xwe. Jin tu astengiyên rejîma dîkdator û zilamsalar ên Îranê nas nakin, li dijî wê li ber xwe didin. Jin li Îranê ne di nava malê de ne jî li derve parastî ne. Lê ji bo nasnameya xwe amade ne canê xwe jî bidin. Di bin navê namûs, kevneşop û çarenûsê de yasa danîne û ferman dane ku hemû dem û dezgehên xwe ji bo êrîşê jinan bikin. Ew sûcê li dijî Jîna hate kirin, nîşaneya asta rewşa xirap û aloz a Îranê ye.’’
Di berdewamiya daxuyaniya KJAR’ê de behsa du bûyerên sosret ên di van demên dawîn de li Îran û Rojhilatê Kurdistanê rû dane hat kirin û wiha hat gotin: û wiha hat gotin: ‘’Di van du hefteyên dawîn de li dijî mirina Şilêr Resûlî û Jîna Emînî nerazîbûnên hemû beşên civakê bi pêş keint û berbelav bûn. Di vê demê de herçend rejîm hewil dabe rastiyê înkar bike jî, jin zêdetir bi israr bûne. Çiqas hewil bidin bi çewisînin û bêdeng bikin jî, jin zêdetir dengê xwe bilind dikin, hev digirin, rejîm çiqas hewil da rewşa xwe asayî bide nîşan jî, lê jin asta aloziyên li nava Îranê eşkere kirin. Beriya niha jin li Merîwanê bûn dengê Şilêr Resûlî û niha jî li Tehranê bûne hawara Jîna Emînî. Di nava 10 rojan de du tawanên li dijî jinan hatin kirin û du jinan jiyana xwe ji dest da.”
Em weke KJAR’ê qetilkirina Jîna Emînî şermezar dikin, sersaxiyê ji malbata Emînî re dixwazin û dibêjin: “Qetilkirina Şilêr û Jîna sûcek e ku ji aliyê hişmendiya zilamsalar a Îranê ve hatiye kirin û eger li dijî vê bêdeng bimînin ne dûr e ku heman sûc li dijî jinên din jî bibe. Duh Goran li Merîwan kujer bû, îro “Polîsê Exlaq” li Tehranê, wê sibe dezgehên din vê bikin. Ji bo têkoşîna li dijî rejîmê pêwistî bi dayîna berdêl heye û jin jî pêşengên civakê ne. Jin li Kurdistanê pêşengiya raperîna nerazîbûnên li dijî rejîmê dikin. Ev çalakî hêja ne, lê divê li seranserê Îranê berbelav bibin. Ya jin daxwaz dikin, mafê wan ê xwezayî ye. Helwesta civakê û bi taybet jî ya jinan a li dijî desthilata Îranê rewa ye û pêwist e di rojên pêş de were berfirehkirin. Wek KJAR jî em daxwazê ji jin, ciwan, rêxistin û çalakvanên medenî dikin ku roja Duşemê piştgiriya çalakiyên jinan û civaka Rojhilatê Kurdistan û Îranê bikin.’’
