MEXMÛR – Şêniyên Wargeha Penaber ya Şehîd Rûstem Cûdî (Mexmûr) ji destpêkê de heya roja îro, her di bin êrîşên dagirkerî û qirkirinê de ne. Lê her kêliya jiyana xwe bi rihê berxwedanê hûnandine û xwe bi rêxistin kirin e. Bi girêdanbûyînên xwe yên bi fikir û felsefeya Rêberê Gelan Abdullah Ocalan bersivên herî xurt didin dagirkeriyê. Şêniyên ku di kampê de dimînin, şêniyên herêma Botanê ya Bakurê Kurdistanê ne. Botan bi xwe cihekî ku zemînên wê yên welatparêziyê vekiriye û mezin e. Ji ber vê jî PKK’ê ji dema avakirina xwe de heya roja îro, li Botanê rêxistinbûyîna xwe diparêze.
Şêniyên Botanê, îro ew rihê xwe yên serhildêr û berxwedêr heya li Kampa şehîd Rûstem Cûdî didin jiyanî kirin. Ji ber vê jî ew kamp rojane di hedefa êrîşên dijminan de ye. Bi dijminatiya PDK, bi çeteyên DAIŞ, bi balafirên bê mirov ên bi çek û bi şerê taybet, dixwazin sekna welatparêziyê û rihê berxwedanê ya gel tune bikin. Ji ber vê jî di van demên dawî de, kesên ku asta wan ya welatparêzbûnê bilinde, rihê berxwedanê jiyan dikin û ji bo gelê Kurd têkoşînê didin meşandin, bûn hedefa êrîşên dagirkeriyê de. Lê îradeya gelê Mexmûrê bi hêsanî nayê şikandin. Li ser vê esasê ciwanê bi navê Sîpan Yeman helwestên xwe yên li dijî dagirkeriyê raber kir û diyar kir ku ewê tu carî gavên xwe paş de nevêjin.
Sîpan Yeman destpêkê bi bal kişandina ser êrîşên dagirkeriyê yên li ser Mexmûr, Şengal û Rojava dest bi axaftina xwe kir; “Em weke ciwanên Wargeha Şehîd Rûstem Cûdî û heman demê de weke endamê saziya ciwanan, em destpêkê êrîşên dagirkeriyên yên li ser Mexmûr, Şengal û Rojava ve tên kirin, bê bersiv nehêlin. Emê tu carî gavên xwe şûnde nevêjin. Ji ber niha mirov dikare bêje şerekî taybet heye, hem bi riya teknolojiya hem jî bi riyên cuda dixwazin ciwanan ji vî şerî dûr bixin. Naxwazin ciwan bikevin rewşekê ku li hember wan şer bikin. Lê divê baş bizanbin, êdî ciwanên Wargeha Şehîd Rûstem Cûdî xwe baş perwerde kirine û hin polîtîkayên wan yên xapandinê derbas kirin e. Weke mirov dikare bêje, polîtîkayên îxanet û hwd êdî li şûn xwe hêştine. Ji têkoşîna li hember îxanetê zêdetir, azadiya welat armanca me ye. Emê jî her tim berê xwe bi vê riyê din, û di vê riyê de bimeşin.”
Heman demê de Sîpan axaftina xwe bi domandarî wiha got; “Rastî jî dema ku mirov ji bo welatekî ked bide divê berdêla wê jî bide. Weke mînak em niha Kurdistanekî azad dixwazin, helbet ji bo azadiya wê emê berdêlên pir giran jî bidin. Wê hevalên herî xwaşik di vê riyê de canê xwe feda bikin. Em jî weke ciwan amade ne ku, di vê riyê de canê xwe feda bikin. Weke tê zanîn di van rojên dawiyê de hevalê bi navê Ebû Zêd li vê derê şehîd ket. Rastî jî mirov dikare bêje jiyana wî bi bîranîn, bi ked, jiyana wî bi eşqa vê dozê ve pir mezin bû. Ev mirineke wisa hêja, mirineke wisa bi şeref û rûmet, nabe xisteya her kesî, em bi şihadetên bi vê rengî serbilind in, em na’êşin.”
Di dawiyê de Sîpan bang li tevahî ciwanan kir ku xwe perwerde bikin û ji şerê teknolojiyê dûr bikevin; “Bangawaziya min ji bo tevahî ciwanan ewe ku, divê êdî ciwan ji van riyên teknolojiyê derbikevin û bikevin ferqa hinek tiştan. Divê hîn zêdetir li erk û berpirsyartiyên xwe xwedî derbikevin. Ger ji jiyana teknolojiyê dûr bikevin dikarin xwe perwerde jî bikin. Dema ku ciwanek bi xwe jî bikeve ferqa vê taybetmendiya sîstemê, wê di kesayeta xwe de pêşeketinên pir mezin ava bike.”
NC// Rizgar Adanmiş
