BEHDÎNAN – Navenda Ragihandin û Çapemeniyê ya HPG’ê ragihand ku Rûkiye Çekîç (Gulan Gabar) sala 2017’an di êrişa hewayî de şehîd bûye.
Daxuyaniya HPG’ê wiha ye:
“Hevrêya me Gulan Gabar di 26’ê Kanûna 2017’an de li Herêmên Parastiyê yên Medyayê di encama êrişa hewayî de şehîd bû.
Agahiyên li ser nasnameya hevrêya me ya şehîd bûye, wiha ne:
Nasnav: Gulan Gabar
Nav paşnav: Rûkiye Çekîç
Cİhê jidayikbûnê: Colemêrg
Dayik-Bav: Sûltan-Kûvat
Dem û cihê şehadetê: 26’ê Kanûna 2017 / Herêmên Parastinê yên Medyayê
ZAROKA ÇIYAYÎ YA ZAGROSAN: GULAN
Hevrêya me Gulan li quntarê Zagrosan, li navçeya Geverê ku weke bajarê serhildanê tê naskirin, li nava malbat û derdoreke welatparêz ji dayik bû. Hevrêya me Gulan li nava kevneşopiya gelê Kurd a kevnar a bi hezaran salî, li nava çanda welatparêziyê û atmosfera têkoşînê ya Tevgera Apoyî mezin bû. Hîn di zarokatiya xwe de hezkirina gel û welat kete dil û mejiyê. Hevrêya me Gulan, zext, zilm, polîtîkayên asîmîlasyonê yên dewleta Tirk a qirker ên li ser Kurdistanê û şewitandina gundan bi xwe dît, lewma hem rastiay dijmin zû nas kir, hem jî bi hêrseke mezin mezin bû. Piştî ku ev hêrsa li dijî dijminê qirker bi eşka welatê xwe ya di dilê wê de bû yek, di temenê ciwantiya xwe de tevlî nava refên gerîla bû.
Hevrêya me Gulan ku zaroka çiyayî ya Zagrosan bû, bêyî ku zor û zehmetiyê bibîne zû hînî jiyana gerîla bû. Li ser şopa civaka xwedawend a pîroz a dayik-xweda, ku Zagrosan malovanî jê re kir, meşiya. Xwe gihand ser serê çiyayên Kurdistanê ku textê pîroz ê xweda û xwedewendan e. Bi hêrseke mezin a li dijî jinbûyîna kole, paşverû û kevneşop a li civakan tê ferzkirin, hevrê Gulan weke jineke Kurd a azad her tim hewl da ku xwe bi felsefeya Apoyî ji nû ve biafirîne, di xeta jinê ya azad de kûrtir bibe û bibe jineke Kurd a azad a pêşeng.
MILÎTANEKE APOYÎ, FERMANDAREKE ŞAREZA
Hevrê Gulan li ser vê bingehê bi eşq, kelecan, coş û kedeke mezin tevlî têkoşînê bû, ji Garê heta Zapê, ji Zapê heta Erzîromê, ji Erzîromê heta Cîlo û Avaşînê, ji fermandariya YJA Starê heta pratîka YPS’ê li gelek qadan û di gelek karî de bi roleke girîng rabû. Lêgerîn û eşqa xwe ya li rastiyê, daxwaz û kelecana xwe ya azadiyê ti carî kêm nebû, berpirsyariyên têkoşîna şoreşê timî hilda ser milê xwe û bi vî rengî bû milîtanek Apoyî, bû fermandareke şareza ya YJA Starê. Her timî berê xwe li serketinê bû, di armanca xwe de zelal bû û sekneke wêrek nîşan dida ku bi ruhê fedayî bi ser dijmin ve diçû. Bi vê sekna xwe bû fermandareke şareza ku hem bi salan şer kir, hem hevrêyên xwe da şerkirin, hem jî ew parast. Bi dilnizimiya xwe, bi kedkarî û fedakariya xwe, bi dilê xwe yê samîmî yê ji bayê xwedawendiyê, bi dilê xwe yê jinê cihê xwe di dilê hevrêyên xwe hemûyan de girt. Fermandarek bi mînak bû ku hevrêyên wê hemûyan jê hez dikir û şûna wê xuya bû.
Hevrêya me Gulan bi fermandariya xwe ya şareza, ji Zapê heta Erzîromê, ji Erzîromê heta Zagrosan ji bo mezinbûn û xurtbûna artêşbûna jinê timî têkoşiya, bû şopdareke mezin a Bêrîtan, Azîme, Zîlan, Zelal, Sara, Delal û Berçeman û ala têkoşînê ya jinên Kurd a azad bilind kir. Di serî de jinên li herêma Geverê, jin û ciwanên Kurd hemû, wê fermandariya jinên Kurd a azad ku di şexsê Berçem Gever û Gulan Gabar de temsîla xwe dît, meşa wan a bi rûmet a ku bi şehadetê tacîdar bû, ji xwe re bikin hinceta têkoşînê. Çanda xwedawendiya qedîm a hezaran salî ya jinên Kurd, kevneşopiya berxwedanê ya esîl û ruhê azadîparêz ê teslîm nayê girtin, ji lûtkeya Zagrosan heta çiya, gund û bajarên Kurdistanê hemûyan, li her derê bi pêşengiya PKK û PAJK’ê wê bi şerê gel ê şoreşgerî têbikoşe û teqez bi ser bikeve.
Li ser vê bingehê ji malbata welatparêz a hêja ya hevrêya me Gulan, ji malbatên şehîdan, gelê xwe yê Geverê û gelê Kurdistanê hemûyî re sersaxiyê dixwazin. Em; hevrêyên hevrê Gulan soza xwe dubare dikin, soza mezinkirina têkoşînê didin.”
