NAVENDA NÛÇEYAN – Tevî peymana agirbestê, hê jî artêşa dewleta Tirk a dagirker herêmê bi balafiran bombebaran dike û çekên giran û çeteyan derbasî Serêkaniyê dike. Her wiha jî êrîşî Nexweşxaneya Roj a Serêkaniyê ku tê de tijî birîndar hene, kir.
Tevî peymana agirbestê jî, artêşa dewleta Tirk a dagirker bi çekên giran û balafirên şer êrîşî bajarê Serêkaniyê û gundewarên wê û şervanên QSD’ê yên li bajêr kir.
Her wiha jî çeteyên artêşa dewleta Tirk a dagirker bi çekên sivik, nuqteyên şervanên QSD’ê li derdora Çerxerêya Şehîdan û Nexweşxaneya Roj a Serêkaniyê ku tê de sivîlên ku di topbarana artêşa Tirk a dagirker de berê birîndar bûne, kir.
Bi encama tunebûna derman û nehiştina dewleta Tirk a dagirker a tîmên tenduristiyê ya derbasbûna bajêr de, 2 şervanên QSD’ê ku di Berxwedana Rûmetê de birîndar bûne, şehîd bûn.
Tevî ragihandina agirbestê, hê jî dewleta Tirk a dagirker hewldanên xwe yên dagirkirina herêmê ranewestandine. Di sibeha roja înê (duh) de artêşa dewleta Tirk a dagirker êrîşî gundê Um Xêr ê girêdayî navçeya Serêkaniyê kir ku şervanek şehîd bû û 2 jî birîndar bûn.
Êrîşên çeteyên girêdayî dewleta Tirk a dagirker, 3 şervan birîndar kirin ku rewşa yekî giran e.
Binpêkirinên çeteyên dewleta Tirk a dagirker û êrîşên wê di vir de nesekinîn, lê dikan û malên şêniyên Serêkaniyê vekirin, dizîn, talan kirin û derbasî xaka Tirkiyê kirin.
Karwanekî şêniyên herêma Cizîrê berê xwe da bajarê Serêkaniyê yê dorpêçkirî da ku alîkariya sivîlên li wir bikin û birîndarên ku di topbarana dewleta Tirk a dagirker û çeteyên wê li ser bajêr de çêbûne, derxin. Lê artêşa dewleta Tirk a dagirker êrîşî karwana şêniyên sivîl kir ku li gundê Mişrafa yê Serêkaniyê rawestî.
Li gundê Mişrafa, karwanê şêniyên herêma Cizîrê, 16 cenazeyên şehîdên sivîl ji bin kafil û enqazan ku balafirên dewleta Tirk a dagirker bombe kiribûn, derxistin.
Ji wê zêdetir jî, çeteyên dewleta Tirk a dagirker dêrên li Serêkaniyê topbaran kirin ku xiristiyanên li bajêr, bang li civaka navdewletî û Neteweyên Yekbûyî (NY) kir ku wan ji êrîşên artêşa dewleta Tirk a dagirker û çeteyên wê rizgar bikin, dêr û milkên şêniyan ji topbaran û talankirinê biparêzin.
Duh, sibehê balafirên dewleta Tirk a dagirker navçeya Zirganê ya bajarê Serêkaniyê bombebaran kir. Di encamê de 8 sivîl birîndar bûn û rakirin nexweşxaneya Hesekê da ku tedawî bibin. Lê belê 3 birîndar şehîd bûn. Ji wan jî Newaf Hac Elî yê endamê Partiya Çepgir hat nasîn û nasnameyên 2 kesên din jî nehatin nasîn.
Duh li asîmanê navçeya Dêrikê ya kantona Qamişlo, balafira keşfê ya dewleta Tirk a dagirker digeriya.
Dewleta Tirk sûcên şer pêk tîne
Rêxistina Efûyê ya Navdewletî, raporek li ser malpera xwe weşand ku li ser pêkanîna artêşa dewleta Tirk a dagirker û çeteyên wê ya li ser sûcên şer nivîsand. Her wiha rêxistinê, mixabîniya xwe der barê paşguhkirina Tirkiyê û çeteyên wê ya bangên dubare ya parastina jiyana sivîlan, anî ziman. Li rexê jî li ser kuştina bimebest û êrîşên derqanûnî ku kuştin û birîndarên sivîl çêbûne jî daxuyand.
Li gorî rojnameya The Guardian a Brîtanyayê, venêrînerên çekên kîmyewî yên girêdayî NY’yê ragihand ku dê piştî tawanbariyên hêzên Tirkiyê ku fosfora spî ya qedexekirî li dijî zarokên li Bakur û Rojhilatê Sûriyê di demeke berê ya vê hefteyê de bi kar aniye, kom bikin.
Dewleta Tirk agirbestê binpê dike
Fermandariya QSD`ê yê bajarê Serêkaniyê raber kir ku artêşa Tirk hevpeymana agirbestê binpê dike û êrîş berdewam in, lewma ew ê parastina rewa bidine meşandin û bersiva êrîşên dagirkeriyê bidin.
Berdevkê QSD`ê Kîno Gabrîel bi bîr xist ku piştî agirbestê hêzên wan êrîş nekirine, lê belê artêşa Tirk û çeteyên wê hêj êrîşan pêk tînin. Nîşana vê yekê ji dema agirbest hatiye ragihandin 13 şervan û 5 sivîl şehîd bûne, li ser vî esasî ew bang li aliyên peywendîdar dikin ku yekser li gorî hevpeymanê tev bigerin.
Endamê Desteya Rêveber a TEV-DEM’ê Aldar Xelîl destnîşan kir ku ew li gorî agibestê tev digerin, lê belê dewleta Tirk binpê dike û ev jî nîşana binpêkirina aştiyê ye. Xelîl bal kişand ser ku piştî berxwedana hêzên gelên wan û zextên ji dewletên navdewletî, Tirkiye neçar ma ku agirbestê ragihîne, ev jî serkeftina şoreşê ye. Di gel hevpeymana agirbestê dê ji hevpeymana bi rejîmê re nebe asteng û dê banga berdewama berxwedanê dikin, ji ber hêj tahlûke heye.
Rêveberiya Xweser a Bakur û Rojhilatê Sûriyê bang li gel kir ku heta biryara agirbestê pêk were destekê bidine QSD`ê û amade bin.
Di heman demê de Meclisa Sûriya Demokratîk (MSD) ragihand ku Enqere hevpeyman binpê kir, ji ber vê ew bang li civaka navdewletî dikin ku çavdêrên navdewletî ji bo parastina hevpeymana agirbestê bişînin.
