ÊLIH – Malbatên girtiyên li dijî tecrîdkirina Rêberê Gelan Abdullah Ocalan di greva birçîbûnê dene, xwestin gel xwedî berxwedana zarokên wan derkevin û rewşa tenduristiya zarokên wan asta krîtîkbûnê derbas kiriye.
Malbat û parazvanên mafên mirovan ên ji bo rojekê li Şaxa Komeleya Mafê Mirovan (ÎHD) a Êlihê beşdarî çalakiya nobetê bûn, diyar kirin ku rewşa tenduristiya çalakgeran asta krîtîkbûnê derbas kiriye û banga têkoşînek mezintir kirin.
‘BILA TENÊ QANÛNÊ XWE PÊK BÎNIN’
Dayika girtî Yekta Savaş Delîl ku ev 2 salin li Girtîgeha Tîpa T a Tarsûsê girtiye Gulnûr Delîl, diyar kir ku kurê wê ne tenê ji bo xwe ketiye greva birçîbûnê û wiha axivî: “45 rojin kurê min birçîye. Ji bo azadiya gelê Kurd û Ocalan têdikoşe. Daxwaza zarokên em ne ewqas mezine, bila tenê qanûnê xwe pêk bînin. Tecrîd zirarê dide gelên Kurd û Tirk. Bi rakirina tecrîdê dê aştî û hiqûr pêş bikeve.”
‘DIVÊ EM XWEDÎ DERKEVIN’
Dayika Savaş Altûn ê 42 rojin li Girtîgeha Tîpa F a Kirikkale di greva birçîbûnê deye Peyrûza Altûn jî, anî ziman ku têkoşîna zarokên wan ji bo azadiya gelane û wiha got: “Di têkoşîna azadiya gelê Kurd de gelek xizmên jiyana xwe ji dest dane. Di vê têkoşînê de berî 27 sal biraziyê min rojnameger Cengîz Altûn û birayên min şehîd ketin. Kurê min jî li ser şopa wan çû. Îro jî ji bo azadiya gelê xwe di greva birçîbûnê deye. Kurê min zarokê vî geliye. Ev zarok, zarokên gelin û divê gel jî xwedî wan derkeve. Niha berxwedanek mezin nîşan didin. Werin em bi hevre xwedî têkoşîn, ziman, çand û pêşeroja xwe derkevin.”
‘LAZIME KU EM JI BO WAN TÊBIKOŞIN’
Dayika Adnan Yigîttekîn ê 9 salin li Girtîgeha Tîpa D a Amedê girtiye Fatîme Yigittekîn jî, da zanîn ku dema kurê wê hat girtin hîna 18 salî bû û wiha axivî: “Di temenê xwe yê zaroktiyê de dest bi vê têkoşînê kir. Îro jî 95 rojin di greva birçîbûnê deye. Em dayik naxwazin cenaze ji girtîgehan derkevin. Bila êdî dayîk negirin. Ger em wisan dibêjin, wê demê divê em ji bo wan têbikoşin.”
‘ÇARESERÎ PIR HÊSANE’
Hevserokê Şaxa ÎHD’ê yê Êlihê Devran Yildiz jî, dest nîşan kir ku daxwazên girtiyên di greva birçîbûnê dene hiqûqiye û wiha axivî: “Pergala hiqûqî ya li Tirkiyeyê ger bê bi cih anîn dê ev pirsgirêk ji holê rabe. Li gelek girtîgehan vîtamînin nadin girtiyan. Fikarên me derbarê rewşa girtiyan de hene. Divê demildest tecrîda li ser Ocalan rabe û hevdîtin bên kirin. Em weke parazvanên mafên mirovan mafê jiyanê pîroz dibînin. Ji ber vê emê heya dawiyê piştgiriyê bidin girtiyan.”
