Bi bûneya salvegera şoreşa Rojavayê Kurdistanê ku di 19’ê Tîrmeha 2012an çiroska wê ji Kobanê bi pêşengtiya ciwanan dest pêkir Kordînasyona Yekîtiya Ciwanên Rojava û Yekîtiya Jinên Ciwan daxuyaniyek nivîskî weşand.
QAMIŞLO – Kordînasyona YCR û YJC’ê di daxuyaniya xwe de got: Em soza xwe nû dikin heta rizgarkirina Efrînê, hilweşandina dagirkeriyê û azadiya Rêber APO em ê têkoşîn bikin, tola şehîdên xwe yek bi yek hilînin û xwîna wan li erdê nahêlin.
Daxuyaniya kordînasyonê wiha ye:
Ji gelê me yê welatparêz û tevahî ciwanên Rojava re!
Em salvegera 6’êmîn a Şoreşa 19’ê Tîrmehê li tevahî gelê me, li Rêber APO û şervanên azadiyê pîroz dikin. Beriya niha bi 6 salan di şaxsê Kobanê de destpêkirina Şoreşa Rojava, şoreşa gelan bû, çirûska pêkanîna xewn û xeyalên şehîd û gelên bindest ên sedan salan.
Hîn beriya wê gelên herêmê bi taybetî li Misir û Tunis rabûbûn serhildanê. Buhara ereban Rojhilata Navîn hejand û qalibên paşverû yên hêzên desthilatdar şikand. Li Sûriyê jî rabûna gel gav bi gav ber bi şerekî herî dijwar a
sedsala 21’êmîn ve diçû. Di kesayeta şoreşa Rojava de buhara ereban veguherî buhara gelan. Binkeftina serhildanên di welatên erebî de hatin jiyankirin, ji bêrêxistinbûnê, ji bê alternatîf bûne bi şoreşa Rojava re derketinekê xwe yê nû dîtin, meşa bi îsrar ber bi serkeftinê, ber bi azadî, biratiya gelan û netewa demokratîk. Di vê demê de aloziya herêmê veguherî asta şerê cihanê yê sêyemîn.
Di nava wê de hêzên desthilatdar ên herêmî yên paşverû û hêzên emperyalîst ên navdewletî bi her awayî hewldidin li ser esasê bercewendiyên xwe pîlan û projeyên xwe yên îqtîdar û desthilatdarî bi her awayî biserbixînin, li ser gelên herêmê ferz bikin. Ji ber vê Libya, Yemen û Misir ketin nava kaosekê kûr û ji ber vê bi taybetî li Sûriyê heta îro şer di asta herî jor de tê domandin, lê di Sûriyê de xetekê din jî derket holê, berxweda û xwe da îspat kirin, ev yek xeta gelan, xeta demokratîk û jiyanaazad.
Şoreşa Rojava bû bingeh û navenda van hêviyên azadiyê û bû esasa şoreşa Rojhilata Navîn. Di heman demê de jî Şoreşa Rojava bi temamî şoreşekî Kurdistanî ye, di nava xwe de bi hezaran şehîdên ji çar perçeyên Kurdistanê heta ji derveyî welat jî dihewîne, bi xwîna wan şehîdan êrîşên herî dijwar li ser xwe şikand, xwe parast û mezin bû. Şoreşa Rojava di sedsala 21’emîn de, şoreşa Kurdistanê, şoreşa Rojhilata Navîn û hêviya mirovatiyê ye. Îro di 19’ê Tîrmeha 2018’an em bi êrîşekê topyekun ji aliyê hêzên dagirker ve rû bi rû ne.
Dewleta Tirk a dagirker û faşîst tevahî Rojava, Bakurê Sûriyê heta Başûr û Bakurê Kurdistanê jî kir hedefên xwe yên herî sereke. Di şerekî ku 2 mehan zêdetir Efrînê hat dagirkirin û niha jî hewldanên dagirkirina Qendîlê dike, lê li hemberî van pîlanên qirêj yên Erdoğan em bê deng namînin, bi rihê şoreşa 19’ê Tîrmehê em ê heta serkeftinê berxwebidin, li ser bingeha bîranîna tevahî şehîdên şoreşê em ê roj bi roj têkoşîna xwe bilindtir bikin!
Di vê roja dîrokî ya pîroz de em soza xwe nû dikin heta rizgarkirina Efrînê, hilweşandina dagirkeriyê û azadiya Rêber APO em ê têkoşîn bikin. Em ê tola şehîdên xwe yek bi yek hilînin, em xwîna wan li erdê nahêlin. LI ser vî bingehê em bang li tevahî ciwanên têkoşer û welatparêz dikin ku bi rihê 19’ê Tîrmehê werin nava hemleya me ya Serî Hilde de cihê xwe bigirin. Bi hev re em li dijî dagirkeriyê mil bi mil şer bikin û Efrînê azad bikin!
